റോഡരികിൽ നിറുത്തിയിട്ട ലോറിക്ക് പിന്നിൽ ജീപ്പിടിച്ച് അപകടം: യുവാവിന് ദാരുണാന്ത്യം,

കോട്ടയം: എംസി റോഡില്‍ മണിപ്പുഴയില്‍ റോഡരികില്‍ നിര്‍ത്തിയിട്ട ലോറിക്ക് പിന്നില്‍ ജീപ്പിടിച്ചുണ്ടായ അപകടത്തില്‍ ഒരാള്‍ മരിച്ചു.

പെരുമ്പാവൂര്‍ സ്വദേശി ഉണ്ണികൃഷ്ണന്‍ (32) ആണ് മരിച്ചത്.ഇന്നലെ പുലര്‍ച്ചെ അഞ്ചരയോടെയാണ് അപകടം സംഭവിച്ചത്. കൊല്ലം അഞ്ചലില്‍ മുടിയേറ്റ് പരിപാടി കഴിഞ്ഞ് വന്ന സംഘത്തിന്‍റെ വാഹനമാണ് അപകടത്തില്‍പ്പെട്ടത്. 

ജീപ്പ് നിയന്ത്രണം നഷ്ടപ്പെട്ട് റോഡരികില്‍ നിര്‍ത്തിയിട്ട ലോറിക്ക് പിന്നില്‍ ഇടിക്കുകയായിരുന്നു.

ഇടിയുടെ ആഘാതത്തില്‍ ഗുരുതരമായി പരിക്കേറ്റ ഉണ്ണികൃഷ്ണനെ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. ഡ്രൈവര്‍ ഉറങ്ങിപ്പോയതാകാം അപകടത്തിന് കാരണമായതെന്നാണ് നിഗമനം.

എട്ട് പേരാണ് ജീപ്പില്‍ ഉണ്ടായിരുന്നത്. അപകടത്തില്‍ മറ്റാര്‍ക്കും പരിക്കില്ലെന്നാണ് വിവരം. സംഭവത്തില്‍ പോലീസ് കേസെടുത്തിട്ടുണ്ട്.