സത്യസന്ധതയ്ക്ക് ഇവിടെ കാപ്പിയേക്കാള്‍ രുചിയും മണവും!: ഇന്ത്യൻ കോഫി ഹൗസില്‍ മറന്നുവച്ചത് 40 പവൻ സ്വര്‍ണമടങ്ങിയ ബാഗ്; തിരികെ നല്‍കി ഹോട്ടല്‍ ജീവനക്കാര്‍ മാതൃകയായി,,

തൃശൂർ: ഗുരുവായൂർ ക്ഷേത്രദർശനത്തിനിടെ കുടുംബം ഇന്ത്യൻ കോഫി ഹൗസില്‍ മറന്നു വച്ച സ്വർണമടങ്ങിയ ബാഗ് തിരികെ നല്‍കി ഹോട്ടല്‍ ജീവനക്കാർ മാതൃകയായി.

പയ്യോളി സ്വദേശി സുരഭി നിവാസില്‍ സതീഷ് ബാബുവിനാണ് നഷ്ടപ്പെട്ടെന്ന് കരുതിയ സ്വര്‍ണം തിരിച്ചുകിട്ടിയത്. ഗുരുവായൂർ ക്ഷേത്രദർശനത്തിന് എത്തിയ സതീഷ് ബാബുവും കുടുംബവും ചായ കുടിക്കാനായാണ് കോഫി ഹൗസില്‍ കയറിയത്. 40 പവന്റെ സ്വർണാഭരണങ്ങളടങ്ങിയ ബാഗാണ് മറന്നുവച്ചത്.

ഗുരുവായൂർ പടിഞ്ഞാറേ നടയിലെ ഇന്ത്യൻ കോഫി ഹൗസിലാണ് സംഭവം. കോഫി ഹൗസിലെ ജീവനക്കാരായ പാലക്കാട് സ്വദേശി വെളുത്തുള്ളി വീട്ടില്‍ ജയപ്രകാശ്, വരടിയം പണിയാട്ടില്‍ രമേശ് ബാബു എന്നിവരുടെ സത്യസന്ധത കാരണം ഉടമയ്ക്ക് 40 പവൻ തിരികെ ലഭിച്ചു.

വീട് പൂട്ടി വരുമ്പോള്‍ മോഷണം പോകാതിരിക്കാനായി സ്വര്‍ണാഭരണങ്ങള്‍ സതീഷ് ബാബു കൂടെ കൊണ്ടുവരികയായിരുന്നു. ഹോട്ടലില്‍ നിന്ന് മടങ്ങിയ ശേഷമാണ് ബാഗ് നഷ്ടപ്പെട്ട വിവരം അറിയുന്നത്. 

ബാഗ് കളഞ്ഞുകിട്ടിയോ എന്ന് അന്വേഷണത്തിനിടെ ഹോട്ടലിലും ചോദിച്ചു. ഹോട്ടല്‍ ജീവനക്കാർ ബാഗ് സൂക്ഷിച്ചു വച്ചിരുന്നു. ഉടമയുമായി ടെമ്പിള്‍ പൊലീസ് സ്റ്റേഷനിലെത്തി ബാഗ് കൈമാറി.