ഒരു വര്‍ഷം പഴക്കമുള്ള ബനാന ചിപ്സ് കഴിച്ചു; മൂന്നുവയസുകാരന് ഭക്ഷ്യവിഷബാധ,,

കോട്ടയം ജില്ലയില്‍ ഒരു വർഷം പഴക്കമുള്ള ബനാന ചിപ്സ് കഴിച്ച മൂന്നു വയസുകാരന് ഭക്ഷ്യവിഷബാധ. കോട്ടയം പള്ളം ബ്ളസി ഭവനില്‍ ജസ്മിൻ - പ്രവീണ്‍ ദമ്പതികളുടെ മകൻ നഥനേയലിനാണ് ഭക്ഷ്യവിഷബാധ ഏറ്റത്.

കഴിഞ്ഞ 30 ന് രാത്രി 11 നാണ് നഥനേയലിൻ്റെ മുത്തച്ഛൻ യേശുദാസ് കുട്ടിയ്ക്ക് ബനാന ചിപ്സ് വാങ്ങി നല്‍കിയത്.

നാട്ടകം മുളങ്കുഴയിലെ കടയില്‍ നിന്നാണ് ഇദ്ദേഹം ചിപ്സ് വാങ്ങിയത്. പിറ്റേന്ന് രാവിലെ കുട്ടിയും മുത്തശ്ശിയും ചിപ്സ് കഴിച്ചു. ഇതിന് പിന്നാലെ കുട്ടിയുടെ ശരീരം ചൊറിഞ്ഞ് തടിക്കുകയും അസ്വസ്ഥത അനുഭവപ്പെടുകയും ചെയ്തു.

തുടർന്ന് കുട്ടിയുമായി കോട്ടയം ഐസിഎച്ചില്‍ എത്തി. ഗുരുതരമായ അവസ്ഥയാണ് ഉണ്ടായതെന്ന് ഡോക്ടർമാർ പറഞ്ഞതായി കുട്ടിയുടെ പിതാവ് പ്രതികരിച്ചു . ഒരു ദിവസം ചികിത്സയില്‍ കഴിഞ്ഞ ശേഷം ഫെബ്രുവരി ഒന്നിന് ഉച്ചയ്ക്കാണ് കുട്ടിയെ ആശുപത്രിയില്‍ നിന്ന് വിട്ടയച്ചത്.

തുടർന്ന് കുട്ടിയുടെ പിതാവ് ജില്ലാ കളക്ടർക്കും കോട്ടയം നഗരസഭ അധികൃതർക്കും നഗരസഭ ആരോഗ്യ വിഭാഗം അധികൃതർക്കും പരാതി നല്‍കിയിട്ടുണ്ട്. കൊച്ചി ഇളമക്കരയിലെ ബിസ്മി സ്വീറ്റ്സ് എന്ന സ്ഥാപനം നിർമ്മിച്ച സ്വീറ്റ് ചിപ്സ് ആണ് കുട്ടി കഴിച്ചത് എന്ന് പിതാവ് പറയുന്നു.

2023 ജനുവരി ആറിന് ഈ ചിപ്സ് പാക്ക് ചെയ്തതായാണ് പാക്കറ്റില്‍ രേഖപ്പെടുത്തിയിരിക്കുന്നത്. പാക്ക് ചെയ്ത് 55 ദിവസത്തിനുള്ളില്‍ ഭക്ഷണം ഉപയോഗിക്കാം എന്നാണ് ഈ പാക്കറ്റില്‍ രേഖപ്പെടുത്തിയിരിക്കുന്നത്.