തൃപ്പൂണിത്തുറ സ്‌ഫോടനം: അറസ്റ്റിലായ നാലുപേരും റിമാൻഡിൽ,

എറണാകുളം: തൃപ്പൂണിത്തുറ തെക്കുംഭാഗത്ത് പടക്ക സംഭരണശാലയിലുണ്ടായ സ്‌ഫോടനത്തിൽ അറസ്റ്റിലായ പ്രതികളെ റിമാൻഡ് ചെയ്തു.ശശി വിനോദ്, വിനീത്, സതീശൻ എന്നിവരെയാണ് റിമാൻഡ് ചെയ്തിരിക്കുന്നത്. ഇവരിൽ രണ്ടുപേർ ക്ഷേത്ര കമ്മിറ്റിക്കാരും രണ്ട്‌പേർ കരാർ തൊഴിലാളികളുമാണ്. ജാമ്യമില്ലാത്ത വിവിധ വകുപ്പുകൾ ചുമത്തിയാണ് പോലീസ് പ്രതികൾക്കെതിരെ കേസെടുത്തിരിക്കുന്നത്.

മനഃപൂർവമല്ലാത്ത നരഹത്യ (304), നരഹത്യ നടത്താനുള്ള ശ്രമം (308) എന്നീ വകുപ്പുകൾ ചുമത്തി സ്‌ഫോടക വസ്തു നിയമപ്രകാരമാണ് പ്രതികൾക്കെതിരെ കേസെടുത്തിരിക്കുന്നത്.

പാലക്കാട് നിന്നെത്തിച്ച പടക്കങ്ങൾ വാഹനത്തിൽ നിന്ന് ഇറക്കുന്നതിനിടെയായിരുന്നു സ്‌ഫോടനമുണ്ടായത്. 

സ്‌ഫോടനത്തിൽ ഗുരുതരമായി പൊള്ളലേറ്റ നാലുപേർ കളമശ്ശേരി മെഡിക്കൽ കോളേജിൽ ചികിത്സയിലാണ്. സമീപത്തെ 25 ഓളം വീടുകൾക്കും നാശനഷ്ടം സംഭവിച്ചിട്ടുണ്ട്. ഇതിൽ പത്തോളം വീടുകൾ പൂർണ്ണമായും തകർന്നു.