തൃശ്ശൂരില്‍ ഗവര്‍ണര്‍ക്കെതിരെ പ്രതിഷേധം; ഏഴ് എസ്‌എഫ്‌ഐ പ്രവര്‍ത്തകരെ അറസ്റ്റ് ചെയ്തു

തൃശ്ശൂരില്‍ ഗവർണർക്കെതിരെ പ്രതിഷേധിക്കാനെത്തിയ ഏഴ് എസ്‌എഫ്‌ഐ പ്രവർത്തകരെ അറസ്റ്റ് ചെയ്തു പൊലീസ്. സംഘടനാ ജില്ലാ സെക്രട്ടേറിയറ്റ് അംഗം സ്വാലിഹ്, വിഷ്ണു ആർ എന്നിവരടക്കമുള്ളവരെയാണ് അറസ്റ്റ് ചെയ്ത് നീക്കിയത്.

 മെഡിക്കല്‍ കോളജിന് മുന്നില്‍ വച്ചായിരുന്നു ഇവരുടെ അറസ്റ്റ് . ഗവർണർ ആരോഗ്യ സർവകലാശാല ബിരുദ ദാന ചടങ്ങിനെത്തിയതായിരുന്നു. പ്രതിഷേധം ഉണ്ടാകാനുള്ള സാഹചര്യം കണക്കിലെടുത്ത് കനത്ത സുരക്ഷ പൊലീസ് ഒരുക്കിയിരുന്നു.

അതേസമയം, ഇന്നലെ വൈകിട്ട് ടൗണ്‍ഹാള്‍ പരിസരത്ത് നിന്ന് അഞ്ച് എസ്‌എഫ്‌ഐ പ്രവർത്തകരെ പൊലീസ് കസ്റ്റഡിയിലെടുത്ത് കരുതല്‍ തടങ്കലിലാക്കിയിരുന്നു. സി ആർ പി എഫ് സുരക്ഷ ഏർപ്പെടുത്തിയ ശേഷം ആദ്യമായാണ് ഗവർണർ ഇന്നലെ ജില്ലയില്‍ എത്തിയത്.

ഇന്ന് പേരകം വിദ്യാനികേതൻ സ്കൂള്‍ വാർഷികത്തിലും നാളെ വാടാനപ്പള്ളി എങ്ങണ്ടിയൂരില്‍ ചരിത്രകാരൻ വേലായുധൻ പണിക്കശേരിയുടെ നവതിയാഘോഷം ഉദ്ഘാടനച്ചടങ്ങിലും ഗവർണർ പങ്കെടുക്കും.