'കേരളത്തെ ഉന്നതവിദ്യാഭ്യാസ ഹബ് ആക്കണം; വിദേശത്തുനിന്ന് വിദ്യാര്‍ഥികളെ തിരിച്ചെത്തിക്കാൻ ആലോചന',,

കോഴിക്കോട്: കേരളത്തെ ഉന്നത വിദ്യാഭ്യാസത്തിന്റെ ഹബ് ആക്കി മാറ്റണമെന്ന് മുഖ്യമന്ത്രി പിണറായി വിജയൻ. രാജ്യത്തിന് പുറത്തുള്ളവർ കേരളത്തിന്റെ മികവ് അറിയണമെന്നും അതിന് ആവശ്യമായ പരിഷ്കാരം കൊണ്ടുവരുമെന്നും അദ്ദേഹം പറഞ്ഞു.

പൊതു വിദ്യാഭ്യാസ രംഗത്തുണ്ടായ നേട്ടം ഉന്നത വിദ്യാഭ്യാസ മേഖലയിലും വേണമെന്നും അതിന് ഇപ്പോഴുള്ള നേട്ടം മതിയാവില്ലെന്നും മുഖ്യമന്ത്രി കൂട്ടിച്ചേർത്തു. നവകേരള സദസിന്റെ തുടർച്ചയായി കോഴിക്കോട് വിദ്യാർഥികളുമായി സംഘടിപ്പിച്ച മുഖാമുഖം പരിപാടിയിലാണ് മുഖ്യമന്ത്രിയുടെ പ്രതികരണം. 

ഉന്നത വിദ്യാഭ്യാസ മേഖലയില്‍ ഉപരിപ്ലവമായ കേവല പരിഷ്കരണമല്ല, കാലാനുസൃതമായ ഉടച്ചുവാർക്കലാണ് സർക്കാർ നടത്തുന്നതെന്നും പിണറായി വിജയൻ പറഞ്ഞു. 

കേരളത്തെ വിജ്ഞാന സമ്ബദ്ഘടനയായി മാറ്റുകയാണ് ലക്ഷ്യം. ഹയർ എജ്യുക്കേഷൻ എക്കോ സിസ്റ്റം സജ്ജമാക്കേണ്ടതുണ്ട് ഇനിയും കൂടുതല്‍ മികവിലേക്ക് വിദ്യാഭ്യാസ സമ്ബ്രദായം എത്തിക്കണമെന്നും കൂടുതല്‍ നേട്ടം ഉണ്ടാക്കണമെന്നും മുഖ്യമന്ത്രി പറഞ്ഞു. 

ഡോക്ടർമാർ തൊഴില്‍ മേഖലയിലേക്ക് മാത്രമായി ചുരുങ്ങുന്നു. അത് പോര, ഗവേഷണ രംഗത്തേക്ക് വരണമെന്നും മുഖ്യമന്ത്രി കൂട്ടിച്ചേർത്തു. ഗവേഷണ മേഖലയില്‍ ലോക നിലവാരത്തിലേക്ക് എത്താൻ കേരളത്തിന് കഴിയുന്നില്ലെന്നും മുഖ്യമന്ത്രി പറഞ്ഞു..

സംസ്ഥാനത്ത് പ്രതിഭയുള്ള വിദ്യാർഥികളില്‍ പലരും വിദേശത്തേക്ക് ചേക്കേറുന്ന പ്രവണത വർധിച്ചിട്ടുണ്ട്. ഇവരെ തിരിച്ചെത്തിക്കാനുള്ള പദ്ധതികള്‍ ആവിഷ്കരിക്കുമെന്നും മുഖ്യമന്ത്രി പറഞ്ഞു.