വീണ്ടും പുലിയുടെ ആക്രമണം.

തൃശൂര്‍:തൃശൂര്‍ പാലപ്പിള്ളിയില്‍ വീണ്ടും പുലിയിറങ്ങി. എലിക്കോട് ആദിവാസി കോളനിക്ക് സമീപമാണ് പുലി ഇറങ്ങിയത്.

വീടിനു പിന്നിലെ തോട്ടത്തില്‍ നിന്ന പശുക്കിടാവിനെ കൊന്ന് തിന്നതായി പ്രദേശവാസികള്‍ പറഞ്ഞു. പാതി ഭക്ഷിച്ച നിലയിലായിരുന്നു പശുക്കുട്ടിയുടെ ജഡം.

സംഭവസ്ഥലത്ത് വനംവകുപ്പ് ഉദ്യോഗസ്ഥരെത്തി പരിശോധന നടത്തി. കുറച്ച് ദിവസങ്ങള്‍ക്ക് മുമ്പ് എച്ചിപ്പാറ, കുണ്ടായി, വലിയകുളം പ്രദേശത്തും പുലിയിറങ്ങി പശുക്കളെ കൊന്ന് തിന്നിരുന്നു.

പ്രദേശത്ത് കാട്ടാനശല്യവുമുണ്ട്. അതിനൊപ്പം പുലിയിറങ്ങാന്‍ തുടങ്ങിയതോടെ നാട്ടുകാര്‍ക്ക് പുറത്തിറങ്ങാന്‍ കഴിയാത്ത അവസ്ഥയാണ്.

പുലി പശുക്കളെ ആക്രമിക്കുന്നത് പതിവായതിനാല്‍ പുലിയെ പിടികൂടുന്നതിനുള്ള കൂട് സ്ഥാപിക്കണമെന്ന ആവശ്യവും ശക്തമാണ്.