'കാര്‍ബണ്‍ ന്യൂട്രല്‍ അനന്തപുരി'; 100 ഇലക്‌ട്രിക് ഓട്ടോറിക്ഷകളുടെ സൗജന്യ വിതരണം തുടങ്ങി,,

തിരുവനന്തപുരം: തിരുവനന്തപുരം കോർപ്പറേഷനില്‍ കാർബണ്‍ ന്യൂട്രല്‍ അനന്തപുരി പദ്ധതിയിലൂടെ 100 ഇലക്‌ട്രിക് ഓട്ടോറിക്ഷകള്‍ സൗജന്യമായി വിതരണം ചെയ്യുകയാണ്.

സംസ്ഥാന പൊതുമേഖലാ സ്ഥാപനമായ കേരള ഓട്ടോമൊബൈല്‍സ് ലിമിറ്റഡാണ് ഈ ഓട്ടോറിക്ഷകള്‍ നിർമ്മിച്ചു നല്‍കുന്നതെന്ന് മന്ത്രി പി രാജീവ് അറിയിച്ചു. സ്മാർട്ട് സിറ്റി പദ്ധതിയില്‍ ഉള്‍പ്പെടുത്തി വിതരണം ചെയ്യുന്ന ഇ ഓട്ടോറിക്ഷകളില്‍ ആദ്യത്തെ 10 എണ്ണത്തിന്റെ വിതരണോദ്ഘാടനം നിർവ്വഹിച്ചു. 

കേരളത്തില്‍ സമീപകാലത്തായി വലിയ കുതിപ്പാണ് ഇലക്‌ട്രിക് വാഹനങ്ങളുടെ എണ്ണത്തില്‍ ഉണ്ടായിക്കൊണ്ടിരിക്കുന്നതെന്ന് മന്ത്രി രാജീവ് പറഞ്ഞു. ആധുനിക വ്യവസായങ്ങളുടെ കാര്യത്തില്‍ വലിയ നേട്ടം കൈവരിക്കുന്ന കേരളം ഇ വി മേഖലയിലും കുതിപ്പ് കൈവരിക്കുമെന്നുറപ്പാണെന്ന് മന്ത്രി പറഞ്ഞു. മഹാരാഷ്ട്രയിലേക്ക് ഉള്‍പ്പെടെ നിരവധി ഓർഡറുകള്‍ നേടാൻ സമീപ കാലത്ത് കേരള ഓട്ടോയ്ക്ക് സാധിച്ചിട്ടുണ്ടെന്നും അദ്ദേഹം അറിയിച്ചു. 

നൂറ് വാർഡില്‍ നൂറ് ഓട്ടോ പദ്ധതിയാണ് നടപ്പിലാക്കുന്നത്. ഉപജീവനമാർഗമില്ലാത്ത നിർധനർക്ക് കൈത്താങ്ങ് ആകുകയാണ് തിരുവനന്തപുരം കോർപ്പറേഷൻ. ഓരോ വാർഡിലേയും അർഹരായവരെ കൗണ്‍സിലർമാർ വഴിയാണ് കണ്ടെത്തിയത്. മലിനീകരണം ഒഴിവാക്കുകയെന്ന ലക്ഷ്യത്തോടെയാണ് ഇലക്‌ട്രിക്ക് ഓട്ടോറിക്ഷകള്‍ വിതരണം ചെയ്യുന്നത്..