പാലാ - ഈരാറ്റുപേട്ട റോഡിൽ ഭരണങ്ങാനത്ത് സ്വകാര്യ ബസ് റോഡിൽ തെന്നി മരത്തിൽ ഇടിച്ചു, നിരവധി പേര്‍ക്ക് പരിക്ക്

ഭരണങ്ങാനം: ഈരാറ്റുപേട്ട റോഡിൽ ഭരണങ്ങാനത്ത് സ്വകാര്യ ബസ് റോഡിൽ തെന്നി മരത്തിൽ ഇടിച്ചു, നിയന്ത്രണം വിട്ടുണ്ടായ അപകടത്തില്‍ നിരവധി പേര്‍ക്ക് പരിക്ക്. 

ഞായറാഴ്ച രാത്രി ഒമ്പത് മണിയോടെ ആയിരുന്നു, പാലാ ഈരാറ്റുപേട്ട റോഡിൽ ഭരണങ്ങാനത്ത് സ്വകാര്യ ബസ് റോഡിൽ തെന്നി അപകടം. എറണാകുളത്തു നിന്നും ഈരാറ്റുപേട്ടയിലേക്ക് വരികയായിരുന്ന ക്രിസ്റ്റീന എന്ന ബസ്സാണ് അപകടത്തിൽപ്പെട്ടത്.

ഒരു ഗർഭിണിയും കുട്ടിയും അടക്കം 11 പേർക്ക് അപകടത്തിൽ പരിക്കേറ്റു. പരിക്കേറ്റവരെ തൊട്ടടുത്തുള്ള സ്വകാര്യ ആശുപത്രികളിൽ പ്രവേശിപ്പിച്ചു. പരിക്കേറ്റ യാത്രക്കാരിൽ 5 പേരെ മേരിഗിരി ഹോസ്പിറ്റലിലും ഏതാനും പേരെ പാലായിലും കൊണ്ടുപോയിട്ടുണ്ട്, ഡ്രൈവറുടെ കൈയ്ക്ക് പൊട്ടലുണ്ട്.

മഴ പെയ്തു കിടന്ന റോഡിൽ ബസ് തെന്നിയാണ് അപകടം ഉണ്ടായത്. ബ്രേക്ക് ചവിട്ടിയപ്പോൾ 3 തവണ തെന്നി ബസ്സ് വട്ടം മാറുകയായിരുന്നു. ബസ്സിന്റെ മുൻഭാഗം മരത്തിലും മതിലിലും ഇടിച്ചു. അപകടത്തിനുശേഷം ഫയര്‍ഫോഴ്സെത്തി റോഡില്‍ വെള്ളം ചീറ്റിച്ചു. മഴ പെയ്തതോടെ റോഡിലുണ്ടായിരുന്ന ഓയില്‍ പരന്ന് തെന്നലുണ്ടായതായിരിക്കാമെന്നാണ് കരുതുന്നത്.