നവകേരള സദസ്സ് ഏഴുമുതല്‍ എറണാകുളം ജില്ലയില്‍,

കൊച്ചി: നവകേരള സദസിന്‍റെ ഭാഗമായി മുഖ്യമന്ത്രി പിണറായി വിജയനും മന്ത്രിമാരും ഏഴു മുതല്‍ ജില്ലയിലെ 14 നിയമസഭാ മണ്ഡലങ്ങളിലും സന്ദര്‍ശനം നടത്തും.,

നാലു ദിവസങ്ങളിലായാണ് ജില്ലയിലെ പരിപാടികള്‍. ഇതോടനുബന്ധിച്ച്‌ മണ്ഡലങ്ങളിലെ ക്ഷണിക്കപ്പെട്ട വ്യക്തികളുമായി കൂടിക്കാഴ്ച നടത്തുന്ന പ്രഭാത യോഗവും നിയമസഭാ മണ്ഡലം കേന്ദ്രീകരിച്ചുള്ള ബഹുജന സദസും നടക്കും. മണ്ഡലസദസ് തുടങ്ങുന്നതിന് മൂന്നു മണിക്കൂര്‍ മുൻപ് ജനങ്ങള്‍ക്ക് നിവേദനങ്ങള്‍ നല്‍കാന്‍ എല്ലാ മണ്ഡലങ്ങളിലും സൗകര്യം ഉണ്ടായിരിക്കും. 

ഏഴിന് രാവിലെ ഒൻപതിന് അങ്കമാലി അഡ്‌ലക്‌സ് കണ്‍വന്‍ഷന്‍ സെന്‍ററില്‍ ജില്ലയിലെ ആദ്യ പ്രഭാതയോഗം നടക്കും. തുടര്‍ന്ന് ചാലക്കുടി മണ്ഡലത്തിലെ ബഹുജനസദസ്. ഉച്ചകഴിഞ്ഞ് രണ്ടിന് മുഖ്യമന്ത്രിയും മന്ത്രിമാരും അങ്കമാലി സെന്‍റ് ജോസഫ്സ് ഹൈസ്‌കൂള്‍ ഗ്രൗണ്ടില്‍ അങ്കമാലി മണ്ഡലത്തിലെ നവകേരള സദസില്‍ പങ്കെടുക്കും.

 3.30ന് ആലുവ പ്രൈവറ്റ് ബസ് സ്റ്റാൻഡ് പരിസരത്തും 5ന് പറവൂര്‍ ഗവ. ബോയ്‌സ് ഹയര്‍ സെക്കന്‍ഡറി സ്‌കൂള്‍ മൈതാനത്തും നവകേരള സദസ് നടക്കും. എട്ടിന് രാവിലെ ഒൻപതിന് കലൂര്‍ ഐഎംഎ ഹൗസില്‍ പ്രഭാത യോഗം.

രാവിലെ 10ന് ഞാറക്കല്‍ ജയ്ഹിന്ദ് ഗ്രൗണ്ടില്‍ വൈപ്പിന്‍ മണ്ഡലത്തിലെയും രണ്ടിന് ഫോര്‍ട്ട്‌കൊച്ചി വെളി ഗ്രൗണ്ടില്‍ കൊച്ചി മണ്ഡലത്തിലെയും 3.30ന് പത്തടിപ്പാലം റസ്റ്റ് ഹൗസിന് സമീപം കളമശേരി മണ്ഡലത്തിലെയും വൈകിട്ട് 5ന് മറൈന്‍ഡ്രൈവില്‍ എറണാകുളം മണ്ഡലത്തിലെയും നവകേരള സദസുകള്‍ നടക്കും. 

ഒൻപതിന് രാവിലെ ഒൻപത് മണിക്ക് തൃപ്പൂണിത്തുറ കിഴക്കേക്കോട്ട സെന്‍റ് മേരീസ് ചര്‍ച്ച്‌ സിയോണ്‍ ഓഡിറ്റോറിയത്തില്‍ പ്രഭാതയോഗം. 10ന് കാക്കനാട് സിവില്‍സ്റ്റേഷന്‍ പരേഡ് ഗ്രൗണ്ടില്‍ തൃക്കാക്കര മണ്ഡലത്തിലെയും രണ്ടിന് പുതിയകാവ് ക്ഷേത്രമൈതാനിയില്‍ തൃപ്പൂണിത്തുറ മണ്ഡലത്തിലെയും വൈകിട്ട് 3.30ന് പിറവം കൊച്ചുപള്ളി മൈതാനത്ത് പിറവം മണ്ഡലത്തിലെയും അഞ്ചിന് കോലഞ്ചേരി സെന്‍റ് പീറ്റേഴ്‌സ് കോളജ് ഗ്രൗണ്ടില്‍ കുന്നത്തുനാട് മണ്ഡലത്തിലെയും നവകേരള സദസ് നടക്കും.

10ന് രാവിലെ ഒൻപതിന് വെങ്ങോല ഹമാരാ ഓഡിറ്റോറിയത്തില്‍ പ്രഭാതയോഗം. തുടര്‍ന്ന് 10ന് ബോയ്‌സ് ഹയര്‍ സെക്കന്‍ഡറി സ്‌കൂള്‍ മൈതാനിയില്‍ പെരുമ്ബാവൂര്‍ മണ്ഡലത്തിലെയും രണ്ടിന് മാര്‍ ബേസില്‍ ഹയര്‍സെക്കന്‍ഡറി സ്‌കൂള്‍ മൈതാനിയില്‍ കോതമംഗലം മണ്ഡലത്തിലെയും 3.30ന് മുനിസിപ്പല്‍ സ്റ്റേഡിയത്തില്‍ മൂവാറ്റുപുഴ മണ്ഡലത്തിലെയും നവകേരള സദസ് നടക്കും.