പിഞ്ചുകുഞ്ഞ് ലോഡ്ജില്‍ മരിച്ച നിലയില്‍; മാതാവും സുഹൃത്തും കസ്റ്റഡിയില്‍,

കൊച്ചി : പിഞ്ചുകുഞ്ഞിനെ ലോഡ്ജില്‍ മരിച്ച നിലയില്‍ കണ്ടെത്തി. കൊച്ചിയിലാണ് സംഭവം. ഒന്നര മാസം പ്രായമുള്ള കുഞ്ഞാണ് മരിച്ചത്.

കൊലപാതകമാണെന്ന് സംശയിക്കുന്നതായി പോലീസ് പറഞ്ഞു. കുഞ്ഞിന്റെ മാതാവിനെയും സുഹൃത്തിനെയും പോലീസ് കസ്റ്റഡിയിലെടുത്തു. കുഞ്ഞിന്റെ തലയ്ക്ക് ഗുരുതരമായി പരുക്കേറ്റിട്ടുണ്ടെന്നാണ് പോസ്റ്റ്‌മോര്‍ട്ടം റിപ്പോര്‍ട്ട്.

ഈ മാസം ഒന്നിനാണ് കുഞ്ഞുമായി ഇരുവരും കറുപ്പള്ളിയിലുള്ള ലോഡ്ജിൽ മുറിയെടുത്തത്. ഞായറാഴ്ച രാവിലെയോടെ കുഞ്ഞിന് അനക്കമില്ലെന്ന് പറഞ്ഞ് ഇവർ എറണാകുളം ജനറൽ ആശുപത്രിയിൽ എത്തുകയായിരുന്നു. 

ആറുമണിക്ക് ഉറങ്ങി എഴുന്നേറ്റപ്പോൾ കുട്ടിക്ക് ശ്വാസമില്ലായിരുന്നുവെന്നാണ് ആശുപത്രി അധികൃതരെ അറിയിച്ചിരുന്നത്. 

മരണം സ്ഥിരീകരിച്ച ആശുപത്രി അധികൃതർ കുട്ടിയുടെ ദേഹത്ത് മുറിവുകൾ കണ്ടെത്തിയിരുന്നു. പ്രാഥമിക പരിശോധനയിൽ അസ്വാഭാവികത തോന്നിയതോടെ വിവരം പോലീസിൽ അറിയിക്കുകയായിരുന്നു.