'കുഞ്ഞുമനസുകളില്‍ രാഷ്ട്രീയം കുത്തിവെക്കേണ്ട; ആവര്‍ത്തിച്ചാല്‍ കടുത്ത നടപടി':നവകേരള സദസ്സില്‍ ഹൈക്കോടതി.

കൊച്ചി: നവകേരള സദസ്സില്‍ വിദ്യാര്‍ഥികളെ പങ്കെടുപ്പിച്ച സംഭവത്തില്‍ സര്‍ക്കാരിനു മുന്നറിയിപ്പുമായി ഹൈക്കോടതി.

കോടതി ഉത്തരവുണ്ടായിട്ടും വിദ്യാര്‍ഥികളെ പങ്കെടുപ്പിച്ചത് ഗൗരവതരമാണെന്ന് കോടതി നിരീക്ഷിച്ചു. ആവര്‍ത്തിച്ചാല്‍ കടുത്ത നടപടിയിലേക്ക് കടക്കുമെന്ന് മുന്നറിയിപ്പും നല്‍കിയിട്ടുണ്ട്.

ജസ്റ്റിസ് ദേവൻ രാമചന്ദ്രനാണ് ഹരജി പരിഗണിച്ചത്. കുഞ്ഞുമനസുകളില്‍ രാഷ്ട്രീയം കുത്തിവെക്കേണ്ടെന്നും കോടതി പറഞ്ഞു. സര്‍ക്കാര്‍ സ്വീകരിച്ച തുടര്‍നടപടികള്‍ വ്യക്തമാക്കാൻ നിര്‍ദേശം നല്‍കിയിട്ടുണ്ട്. ഹരജി ഒരാഴ്ച കഴിഞ്ഞ് പരിഗണിക്കാൻ മാറ്റി.

നവകേരള സദസില്‍ വിദ്യാര്‍ഥികളെ പങ്കെടുപ്പിച്ചതിനെതിരെ എം.എസ്.എഫ് സംസ്ഥാന പ്രസിഡന്റ് പി.കെ നവാസ് നല്‍കിയ ഉപഹരജിയിലാണ് ഹൈക്കോടതി നിരീക്ഷണം. 

കുട്ടികളെ പങ്കെടുപ്പികണമെന്ന ഉത്തരവ് പിൻവലിച്ചുവെന്ന് സര്‍ക്കാര്‍ അറിയിച്ചതിന് ശേഷവും മലപ്പുറത്ത് വിദ്യാര്‍ഥികളെ അണിനിരത്തിയെന്നാണ് പരാതി. ഇക്കാര്യത്തില്‍ കാരണം കാണിക്കല്‍ നോട്ടിസ് നല്‍കിയിട്ടുണ്ടെന്നാണ് സര്‍ക്കാരിന്റെ വിശദീകരണം.