ചൈനയിലേതിനു സമാനമായ ശ്വാസകോശരോ​ഗം വൈറ്റ് ലങ് സിൻഡ്രോം സ്ഥിരീകരിച്ച് രാജ്യങ്ങൾ

ചൈനയിലെ കുട്ടികൾക്കിടയിൽ പ്രത്യേകതരം ശ്വാസകോശരോ​ഗം വ്യാപിക്കുന്ന വാർത്തകൾ പുറത്തുവന്നുകൊണ്ടിരിക്കുകയാണ്.

രോ​ഗവ്യാപന പശ്ചാത്തലത്തിൽ കേന്ദ്ര സർക്കാരും സംസ്ഥാന-കേന്ദ്രഭരണ പ്രദേശങ്ങളിലെ ആരോ​ഗ്യവിഭാ​ഗങ്ങൾക്ക് മുൻകരുതൽ നിർദേശങ്ങൾ നൽകിയിരുന്നു. ഇപ്പോഴിതാ വൈറ്റ് ലങ് സിൻഡ്രോം എന്ന പേരിലുള്ള ഒരുതരം ന്യുമോണിയ വ്യാപനം ലോകത്തിന്റെ പലരാജ്യങ്ങളിലും സ്ഥിരീകരിക്കുന്നുവെന്നാണ് പുതിയ റിപ്പോർട്ടുകൾ. അമേരിക്ക, ഡെൻമാർക്ക്, നെതർലാൻഡ്സ് എന്നീ രാ​ജ്യങ്ങളിൽ വൈറ്റ് ലങ് സിൻഡ്രോം സ്ഥിരീകരിച്ചുവെന്ന് ദി മിറർ റിപ്പോർട്ട് ചെയ്യുന്നു.

ഡെൻമാർക്കിൽ മഹാമാരിക്ക് സമാനമായ അവസ്ഥയിലാണ് ഈ രോ​ഗമെന്നും നെതർലാൻഡ്സിലും നിരക്കുകൾ ഉയർന്നുകൊണ്ടിരിക്കുകയാണെന്നും റിപ്പോർട്ടുകളുണ്ട്. മൈകോപ്ലാസ്മ ന്യുമോണിയ എന്ന, ശ്വാസകോശരോ​ഗങ്ങൾക്കിടയാക്കുന്ന ബാക്ടീരിയൽ അണുബാധ കാരണം ബാധിക്കുന്ന രോ​ഗമാണിതെന്നാണ് വിദ​ഗ്ധർ പറയുന്നത്.

അമേരിക്കയിലെ ഒഹിയോയിൽ മാത്രം 150 കേസുകളാണ് കഴിഞ്ഞ ഒരുമാസത്തിനിടെ റിപ്പോർട്ട് ചെയ്തിരിക്കുന്നത്. എന്നാൽ ഇതിനു പിന്നിൽ പുതിയ രോ​ഗാണുവല്ലെന്നും ഒരേസമയം ഒന്നിലധികം വൈറസുകളുടെ മിശ്രണം വ്യാപിക്കുന്നതാകാം കാരണമെന്നുമാണ് അധികൃതർ കരുതുന്നത്.

നിലവിലുള്ളത് സീസണലായി കാണപ്പെടുന്ന രോ​ഗവ്യാപനമാകാമെന്നും നിരീക്ഷിച്ചു വരികയാണെന്നുമാണ് സി.ഡി.സി.( Centers for Disease Control and Prevention) വ്യക്തമാക്കുന്നത്.

എന്താണ് വൈറ്റ് ലങ് സിൻഡ്രോം?

ശ്വാസകോശങ്ങളുടെ വീക്കത്തിന് കാരണമാകുന്ന ഒരുതരം ന്യുമോണിയ ബാധയാണിത്. രോ​ഗം ബാധിച്ചവരുടെ നെഞ്ചിന്റെ എക്സ്-റേയിൽ വെളുത്ത പാടുകൾ പ്രകടമാകുന്നതുകൊണ്ടാണ് ഈ പേരുവന്നത്.

കുട്ടികളിലാണ് കൂടുതൽ ബാധിച്ചുകാണുന്നത്. കോവിഡ് കാലത്തിനുശേഷം കുട്ടികളിൽ രോ​ഗപ്രതിരോധശേഷി കുറഞ്ഞതാണ് കുട്ടികളെ കൂടുതലായി ബാധിക്കുന്നതിനു പിന്നിലെന്നാണ് വിദ​ഗ്ധർ കരുതുന്നത്. മൂന്നുമുതൽ എട്ടുവയസ്സുവരെ പ്രായമുള്ള കുട്ടികളിലാണ് രോ​ഗം സ്ഥിരീകരിക്കുന്നത്.

പനി, ചുമ, ക്ഷീണം തുടങ്ങിയവയാണ് പ്രധാനലക്ഷണങ്ങൾ. ചിലരിൽ ശ്വാസതടസ്സവും അനുഭവപ്പെടാം. വ്യക്തിശുചിത്വം കാക്കുക, തുമ്മുമ്പോഴും ചുമയ്ക്കുമ്പോഴും മുഖം മറയ്ക്കുക, രോ​ഗമുള്ളപ്പോൾ സാമൂഹിക ഇടപെടലുകൾ കുറയ്ക്കുക തുടങ്ങിയവയാണ് പ്രധാന രോ​ഗപ്രതിരോധ മാർ​ഗങ്ങൾ.

മൈകോപ്ലസ്മ ന്യുമോണിയ കൂടാതെ, കോവിഡിനു കാരണമാകുന്ന വൈറസുകൾ, ഇൻഫ്ലുവൻസകൾ, ചിലതരം അന്തരീക്ഷമലിനീകരണങ്ങൾ തുടങ്ങിയവ ശ്വാസകോശത്തെ അസ്വസ്ഥമാക്കുകയും അണുബാധയുണ്ടാക്കുകയും വൈറ്റ് ലങ് സിൻഡ്രോമിലേക്ക് നയിക്കുകയും ചെയ്യുമെന്നും വിദ​ഗ്ധർ പറയുന്നു.

രോ​ഗത്തിന്റെ സ്വഭാവവും തീവ്രതയും പരിശോധിച്ച് ആന്റിബയോട്ടിക്കുകൾ, ആന്റിവൈറലുകൾ, ഓക്സിജൻ തെറാപ്പി, മെക്കാനിക്കൽ വെന്റിലേഷൻ, കോർട്ടികോസ്റ്റിറോയ്ഡ്സ് തുടങ്ങിയ ചികിത്സാരീതികളാണ് പൊതുവേ നൽകാറുള്ളത്.ചൈനയിലെ സാഹചര്യം

മൈകോപ്ലാസ്മ ന്യുമോണിയ എന്ന ബാക്ടീരിയ തന്നെയാണ് ചൈനയിലെ കുട്ടികൾക്കിടയിൽ പടരുന്ന ശ്വാസകോശരോ​ഗങ്ങൾക്കും പിന്നിൽ. എന്നാൽ ഇതുതന്നെയാണോ ഇപ്പോൾ മറ്റുരാജ്യങ്ങളിൽ വ്യാപിക്കുന്നത് എന്നതുസംബന്ധിച്ച വ്യക്തത കൈവന്നിട്ടില്ല.

കോവിഡ് നിയന്ത്രണങ്ങൾ നീക്കിയതിനു പിന്നാലെയാണ് ശ്വാസകോശരോ​ഗങ്ങളുടെ കാര്യത്തിൽ വർധനവുണ്ടായിരിക്കുന്നതെന്നാണ് ചൈനയിലെ അധികൃതർ നൽകുന്ന വിശദീകരണം. രോ​ഗം കൂടുതൽ പടരുന്നത് തടയാൻ അവശ്യനടപടികൾ കൈക്കൊള്ളണമെന്ന് ലോകാരോ​ഗ്യസംഘടനയും നിർദേശിച്ചിട്ടുണ്ട്.

രാജ്യത്തുടനീളം ശ്വാസകോശസംബന്ധമായ രോ​ഗങ്ങൾ കുത്തനെ ഉയരുന്നുണ്ടെന്നതു സംബന്ധിച്ച് ഈ മാസമാദ്യം ചൈനയിലെ ആരോ​ഗ്യവകുപ്പ് അധികൃതർ പ്രസ് കോൺഫറൻസ് വിളിച്ചിരുന്നു. കോവിഡ് നിയന്ത്രണങ്ങൾ ലഘൂകരിച്ചതും പുതിയ ശ്വാസകോശ രോ​ഗവ്യാപനവും തമ്മിലുള്ള ബന്ധത്തേയും ചൈനയിലെ ആരോ​ഗ്യപ്രവർത്തകർ ചൂണ്ടിക്കാട്ടുന്നുണ്ട്.

പ്രശസ്ത മാധ്യമവും രോ​ഗങ്ങൾ സംബന്ധിച്ച നിരീക്ഷണ റിപ്പോർട്ടുകൾ പുറത്തുവിടുന്നതുമായ പ്രൊമെഡ് എന്ന മാധ്യമത്തിലൂടെ ചൈനയിലെ പുതിയ സാഹചര്യത്തേക്കുറിച്ച് മുന്നറിയിപ്പ് പുറത്തുവന്നിരുന്നു. 2019-ൽ കോവിഡിന്റെ വരവിനേക്കുറിച്ചും പ്രൊമെഡ് സമാനമായ മുന്നറിയിപ്പ് നൽകിയിരുന്നു.