ചൈനയിലെ ബെയ്ജിംഗിൽ ട്രെയിനുകൾ തമ്മിൽ കൂട്ടിയിടിച്ച് അപകടം

ബെയ്ജിംഗ് : ചൈനയിലെ ബെയ്ജിംഗിൽ ട്രെയിനുകൾ തമ്മിൽ കൂട്ടിയിടിച്ച് അപകടം. 

അപകടത്തെ തുടർന്ന് 515 പേർക്ക് പരിക്കേറ്റു. നഗരത്തിന്റെ പടിഞ്ഞാറൻ പർവതനിരകളിൽ വ്യാഴാഴ്ച രാത്രിയാണ് അപകടം നടന്നത്. ഇവരിൽ 100ലേറെ പേരുടെ പരിക്ക് ഗുരുതരമാണെന്ന് ചൈനീസ് മാദ്ധ്യമങ്ങൾ റിപ്പോർട്ട് ചെയ്തു. അപകടത്തിൽ ആളപായമൊന്നും രേഖപ്പെടുത്തിയിട്ടില്ല. മഞ്ഞുവീഴ്ചയാണ് ട്രെയിൻ അപകടത്തിന് കാരണമായതെന്നാണ് ചൈനീസ് സർക്കാർ വ്യക്തമാക്കുന്നത്. 

മുന്നിലുള്ള ട്രെയിൻ എമർജൻസി ബ്രേക്ക് ഇടേണ്ടി വന്നതാണ് അപകടത്തിന് കാരണമെന്ന് ബെയ്ജിംഗിലെ മുനിസിപ്പൽ ട്രാൻസ്‌പോർട്ട് കമ്മീഷൻ നടത്തിയ പ്രസ്താവനയിൽ അറിയിച്ചു. ചരിഞ്ഞ ഭാഗത്ത് നിന്ന് വന്ന ട്രെയിൻ ബ്രേക്ക് ചെയ്യുന്നതിൽ പരാജയപ്പെട്ടു. ഇതോടെ രണ്ട് ട്രെയിനുകളും കൂട്ടിയിടിക്കുകയായിരുന്നുവെന്നും ട്രാൻസ്‌പോർട്ട് കമ്മീഷൻ വ്യക്തമാക്കി.

പരിക്കേറ്റവരിൽ ഏതെങ്കിലും വിദേശികളുണ്ടോയെന്ന് ഉദ്യോഗസ്ഥർ അന്വേഷിക്കുന്നുണ്ടെന്ന് ചൈനയുടെ വിദേശകാര്യ മന്ത്രാലയ വക്താവ് മാവോ നിംഗ് അറിയിച്ചു. പരിക്കേറ്റവരിൽ 400 ഓളം പേരുടെ നില ഗുരുതരമല്ലെന്നും നൂറിലേറെ പേർക്ക് എല്ലുകൾക്ക് പൊട്ടൽ ഉള്ളതായും അദ്ദേഹം വ്യക്തമാക്കി. 

തിങ്കളാഴ്ച മുതൽ നഗരത്തിലും വടക്കൻ ചൈനയിലും കനത്ത മഞ്ഞുവീഴ്ചയുള്ളതിനാൽ പൊതുഗതാഗതം ഉപയോഗിക്കാൻ സർക്കാർ യാത്രക്കാരോട് നിർദ്ദേശിച്ചതിനാൽ കഴിഞ്ഞ മൂന്ന് ദിവസമായി, സബ്‌വേ ട്രെയിനുകളിൽ കനത്ത തിരക്കാണ് അനുഭവപ്പെടുന്നത്.

രണ്ട് ട്രെയിനുകളിലെയും നൂറുകണക്കിന് യാത്രക്കാർക്ക് അപകടം ഒരു പേടിസ്വപ്നമായിരുന്നു, സോഷ്യൽ മീഡിയയിൽ പോസ്റ്റ് ചെയ്ത വീഡിയോകളിൽ ആളുകൾ പരിക്കുകൾ മൂലമുള്ള വേദന കാരണം വിലപിക്കുന്നതും മറ്റുള്ളവർ മെട്രോ ട്രെയിനുകളുടെ അവശിഷ്ടങ്ങൾക്കിടയിലൂടെ പുറത്തേക്ക് പോകാൻ ശ്രമിക്കുന്നതും കാണിച്ചു.

ട്രെയിനിലെ ലൈറ്റുകൾ അണയുന്നതിന് മുമ്പ് പെട്ടെന്ന് ഒരു കുലുക്കം അനുഭവപ്പെട്ടതായി ഒരു യാത്രക്കാരൻ  പറഞ്ഞു. ചിലർ മറിഞ്ഞുവീണു, ചില്ലുകൾ തകർന്നു, യാത്രക്കാർ പറഞ്ഞു.

Over 30 people were injured after a separation of carriages on a #subway train took place along the Changping Line on Thursday evening in snow-hit Beijing, local authorities said. The cause of the accident is still under investigation. pic.twitter.com/zKgOSd3tlp

— China News 中国新闻网 (@Echinanews) December 15, 2023

സ്‌കൂളുകളും ഔട്ട്‌ഡോർ വിനോദ സൗകര്യങ്ങളും അടച്ചിരിക്കുമ്പോൾ നഗരത്തിലെ താമസക്കാരോട് വീടിനുള്ളിൽ തന്നെ തുടരാൻ പ്രാദേശിക സർക്കാർ നിർദ്ദേശിച്ചിട്ടുണ്ട്. കൂടാതെ വടക്കൻ ചൈനയിൽ കനത്ത മഞ്ഞുവീഴ്ച തുടരുന്നതിനാൽ ജനങ്ങൾ പുറത്തിറങ്ങാതെ വീടിനുള്ളിൽ തന്നെ കഴിയണമെന്ന് സർക്കാർ ആവശ്യപ്പെട്ടു.