കോട്ടയം മുണ്ടക്കയത്ത് കൊലക്കേസ് പ്രതിയുടെ വീടിന് തീയിട്ടു,

കോട്ടയം: മുണ്ടക്കയത്ത് കൊലക്കേസ് പ്രതിയുടെ വീടിന് തീയിട്ടു. ഉണക്കയം ബിജോയുടെ വീടിനാണ് തീയിട്ടത്. വീട് പൂര്‍ണമായും കത്തിനശിച്ച നിലയിലാണ്.

അയല്‍വാസിയായ ജോയല്‍ ജോസഫിനെ കുത്തിക്കൊലപ്പെടുത്തിയ കേസിലെ പ്രതിയാണ് ഇയാള്‍. ശനിയാഴ്ച അര്‍ധരാത്രിയോടെയാണ് ഇയാളുടെ വീടിന് തീയിട്ടത്. സംഭവത്തിന് പിന്നില്‍ ആരാണെന്ന് വ്യക്തമല്ല.

പ്രതിയുടെ ബന്ധുക്കള്‍ തന്നെയാണ് വീടിന് തീവച്ച്‌ നാടകം കളിക്കുന്നതെന്ന് നാട്ടുകാര്‍ ആരോപിച്ചു. എന്നാല്‍ നാട്ടുകാരാണ് തീവച്ചതെന്നാണ് ബന്ധുക്കളുടെ ആരോപണം. സംഭവത്തില്‍ പോലീസ് അന്വേഷണം തുടങ്ങി.

ശനിയാഴ്ചയാണ് ജോയല്‍ കൊല്ലപ്പെട്ടത്. പണി ചെയ്തു കൊണ്ടിരുന്ന ജോയലിനെ യാതോരു പ്രകോപനവുമില്ലാതെ ബിജോയ് പിന്നിലൂടെ വന്ന് കുത്തുകയായിരുന്നു. ജോയലിന്റെ കരച്ചില്‍ കേട്ടുവന്ന അയല്‍വാസികള്‍ ഉടനെ തന്നെ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല.,