ലക്ഷദ്വീപിലേക്ക് കന്നുകാലികളെ കൊണ്ടുവരുന്നതിനുള്ള നിരോധനം പിൻവലിച്ചു

കവരത്തി: ലക്ഷദ്വീപിലേക്ക് കന്നുകാലികളെ കൊണ്ടുവരുന്നതിനുള്ള നിരോധനം പിൻവലിച്ചു. ഒക്ടോബർ 26ലെ ഹൈക്കോടതി ഇടക്കാല ഉത്തരവിന്റെ അടിസ്ഥാനത്തിലാണ് നിരോധനം പിൻവലിച്ചത്.

കശാപ്പിനെത്തിക്കുന്ന മൃഗങ്ങൾക്ക് അണുബാധയോ മറ്റോ ഇല്ലെന്ന് വെറ്റിനറി സർജൻ പരിശോധിച്ച് ഉറപ്പുവരുത്തണം. കന്നുകാലികളെ ഇറക്കുമതി ചെയ്യുന്നതിനും കശാപ്പു ചെയ്യുന്നതിനും ഭക്ഷ്യ സുരക്ഷാമാനദണ്ഡങ്ങൾ പാലിക്കണമെന്നും നിരോധനം പിൻവലിച്ചുകൊണ്ട് മൃഗ സംരക്ഷണ വകുപ്പ് ഡയറക്ടർ രാകേഷ് കുമാർ പുറത്തിറക്കിയ ഉത്തരവിൽ പറയുന്നു. 

അശാസ്ത്രീയമായി കന്നുകാലികളെ കൈകാര്യം ചെയ്യുന്നതും അറവ് നടത്തുന്നതും മാലിന്യങ്ങൾ സംസ്കരിക്കുന്നതും നിരോധിച്ച് ലക്ഷദ്വീപ് മൃഗ സംരക്ഷണ വകുപ്പ് സെപ്റ്റംബറിൽ ഉത്തരവിറക്കിയിരുന്നു. ഇതിനെതിരെ എ കുഞ്ഞിക്കോയ തങ്ങൾ ഹൈക്കോടതിയിൽ നൽകിയ ഹരജിയിൽ കോടതി ഇടക്കാല ഉത്തരവ് പുറപ്പെടുവിച്ചിരുന്നു .