എരുമേലിയില്‍ വാറണ്ട് നടപ്പാക്കാനെത്തിയ വനിതാ എസ്‌ഐക്ക് പ്രതിയുടെ മര്‍ദ്ദനം; ആക്രമി അറസ്റ്റില്‍,

എരുമേലി: വാറണ്ട് നടപ്പാക്കാനെത്തിയ വനിതാ എസ്‌ഐക്ക് പ്രതിയുടെ മര്‍ദ്ദനം. എസ്‌ഐ ശാന്തി കെ.ബാബുവാണ് ആക്രമണത്തിനിരയായത്.

ഞായറാഴ്ച എരുമേലി എലിവാലിക്കരയിലാണ് സംഭവം നടന്നത്. 2013ല്‍ അയല്‍വാസിയായ സ്ത്രീയെ ആക്രമിച്ച കേസിലെ അറസ്റ്റ് വാറന്റ് നടപ്പാക്കാനെത്തിയ പൊലീസ് സംഘത്തോട് പ്രതി കയര്‍ക്കുകയായിരുന്നു. ഇതിനിടെ ഇയാള്‍ വീടിനകത്തു കയറി വാതിലടയ്ക്കാന്‍ ശ്രമിക്കുകയും വാതില്‍ തളളിത്തുറക്കാന്‍ പൊലീസും ശ്രമിച്ചതോടെ സംഘര്‍ഷമുണ്ടാവുകയുമായിരുന്നു. 

ഇതിനിടയിലാണ് വനിതാ എസ്‌ഐയെ ഇയാള്‍ മുടിക്ക് കുത്തിപ്പിടിക്കുകയും പുറത്ത് ഇടിക്കുകയും ചെയ്തത്. അക്രമാസക്തനായ പ്രതിയെ ഏറെ പ്രയാസപ്പെട്ടാണ് പോലീസ് പിന്നീട് കീഴ്‌പ്പെടുത്തിയത്. നേരത്തെ ഇയാളെ അന്വേഷിച്ചെത്തിയ പൊലീസുകാര്‍ക്കു നേരെ നായയെ അഴിച്ചുവിട്ട സംഭവവും മുൻപ് ഉണ്ടായിട്ടുണ്ട്.