റോഡ് ക്യാമറ പിഴ അടച്ചില്ലെങ്കില്‍ 'പണി പാളും'! രണ്ടും കല്‍പ്പിച്ച്‌ സംസ്ഥാന സര്‍ക്കാരിന്‍റെ പുതിയ നീക്കം

തിരുവനന്തപുരം: ഇനി മുതല്‍ വാഹനങ്ങളുടെ ഇൻഷുറൻസ് പുതുക്കാൻ ഗതാഗത നിയമ ലംഘനങ്ങള്‍ക്കുള്ള പിഴ അടച്ചുതീര്‍ക്കണമെന്ന് ഗതാഗത മന്ത്രി ആന്‍റണി രാജു.

നിലവിലുള്ള പിഴ പൂര്‍ണമായി അടച്ചവര്‍ക്ക് മാത്രമേ ഇൻഷ്വറൻസ് പുതുക്കി നല്‍കും. ഇതിനായി ഇൻഷ്വറൻസ് കമ്പനികളുമായി ചര്‍ച്ച നടത്തുമെന്നും മന്ത്രി പറഞ്ഞു.

എ ഐ ക്യാമറ സ്ഥാപിച്ചതിന് ശേഷം വാഹനാപകടത്തില്‍ മരിക്കുന്നവരുടെ എണ്ണം ഗണ്യമായി കുറഞ്ഞുവെന്നും അദ്ദേഹം പറഞ്ഞു. 2022 ജൂലായില്‍ റോഡ് അപകടത്തില്‍ പരിക്കേറ്റവരുടെ എണ്ണം 3992 ആണ്. 2023 ജൂലായില്‍ റോഡ് അപകടത്തില്‍ പരിക്കേറ്റവരുടെ എണ്ണം 3319 ആയി കുറഞ്ഞു. 

ജൂണ്‍ അഞ്ച് മുതല്‍ ആഗസ്റ്റ് രണ്ട് വരെ 32,42,277 നിയമലംഘനം കണ്ടെത്തി. 15,83,367 നിയമലംഘനങ്ങള്‍ക്ക് നടപടിയെടുത്തു. 3,82,580 നിയമ ലംഘനങ്ങള്‍ക്ക് പിഴ ഈടാക്കാൻ ചലാൻ നല്‍കി. 25 കോടി 81 ലക്ഷം രൂപ ഇ ചലാൻ വഴി കിട്ടിയെന്നും മന്ത്രി അറിയിച്ചു.

കൂടാതെ അന്യസംസ്ഥാനങ്ങലില്‍ നിന്നുള്ള വാഹനങ്ങള്‍ക്കും എ ഐ ക്യാമറ ബാധകമാണെന്ന് അദ്ദേഹം വ്യക്തമാക്കി. വി ഐ പികളെ പിഴയില്‍ നിന്ന് ഒഴിവാക്കുന്നു എന്ന ആരോപണം തെറ്റാണ്. 

19 എം എല്‍ എമാരുടെ വാഹനങ്ങള്‍ക്കും 10 എം പിമാരുടെ വാഹനങ്ങള്‍ക്കും പിഴ ചുമത്തിയെന്ന് മന്ത്രി അറിയിച്ചു. കാസര്‍കോട് ജില്ലയിലാണ് കൂടുതല്‍ നിയമലംഘനം നടന്നത്.