അയർലണ്ടിൽ നിത്യോപയോഗ ചിലവുകൾ വർധിച്ചു വരുന്ന സാഹചര്യത്തിൽ സ്വകാര്യ ബസ് സർവ്വീസ് മേഖലയിലും നിരക്ക് പരിമിതപ്പെടുത്തണമെന്ന് ജനങ്ങൾ

ഡബ്ലിൻ : അയർലണ്ടിൽ സർക്കാർ പൊതുഗതാഗത നിരക്ക് 20% കുറച്ചത് സ്വകാര്യ ബസ് മേഖലയിലേക്കും വ്യാപിപ്പിക്കണമെന്ന് ജനങ്ങൾ ആവശ്യപെട്ടു. കഴിഞ്ഞ വർഷം പൊതു ഗതാഗത സംവിധാനം ഉപയോഗപ്പെടുത്തുന്ന യാത്രക്കാരുടെ എണ്ണം വർദ്ധിച്ചുവെന്ന് പുതിയ കണക്കുകൾ പുറത്തുവന്ന സാഹചര്യത്തിലാണ് നിലവിലെ ആവശ്യം.

നിത്യോപയോഗചിലവുകൾ വർധിച്ചുവരുന്ന സാഹചര്യത്തിൽ ഉണ്ടാകുന്ന പ്രതിസന്ധിയെ നേരിടാനും സുസ്ഥിരമായ യാത്ര പ്രോത്സാഹിപ്പിക്കാനും ആളുകളെ സഹായിക്കുന്നതിനുമായി ആണ് കഴിഞ്ഞ വർഷം സർക്കാർ ഈ ഇളവ് കൊണ്ടുവന്നത്. അതേസമയം, 20% നിരക്കിളവ് സ്വകാര്യ ഓപ്പറേറ്റർമാർക്കും നീട്ടുന്നതിനെക്കുറിച്ച് അറിയില്ലെന്ന് നാഷണൽ ട്രാൻസ്‌പോർട്ട് അതോറിറ്റി വക്താവ് പറഞ്ഞു.

76 വർഷത്തിനിടെ ഇതാദ്യമായാണ് ദേശീയ യാത്രാനിരക്ക് കുറയ്ക്കുന്നത്. മിക്ക സ്വകാര്യ കമ്പനിയുടെയും ബസുകൾ ഉപയോഗിക്കുന്ന ആർക്കും 20% വെട്ടിക്കുറച്ചതിൽ നിന്ന് പ്രയോജനം ലഭിക്കുന്നില്ലെന്ന് സ്വകാര്യ ബസ് ഓപ്പറേറ്റർമാര്‍ പറഞ്ഞു.

സർക്കാർ ഉടമസ്ഥതയിലുള്ള സേവനങ്ങളിലും പൊതു സേവന ഓപ്പറേറ്റർമാരിലും ഒതുങ്ങി നിൽക്കുന്നതിനാൽ തന്റെ ബസുകൾ ഉപയോഗിക്കുന്ന യാത്രക്കാർക്ക് 20% നിരക്ക് കുറയ്ക്കൽ പ്രയോജനപ്പെടുത്താനാവില്ല എന്ന് വിവിധ പ്രൈവറ്റ് ഓപ്പറേറ്റിങ് കമ്പനികള്‍ പറയുന്നു. 

ഈ ആവശ്യം ഉന്നയിച്ച് പ്രൈവറ്റ് ഓപ്പറേറ്റർമാർ വരും ആഴ്‌ചകളിൽ മന്ത്രിമാരെ കാണും. 20% ശരാശരി നിരക്ക് കിഴിവും 19-23 വയസ് പ്രായമുള്ളവർക്ക് 50% കിഴിവ് നൽകുന്ന യംഗ് അഡൾട്ട് കാർഡ് സ്കീമും 2024 ബജറ്റിന്റെ പശ്ചാത്തലത്തിൽ പരിഗണിക്കുമെന്ന് ഗതാഗത വകുപ്പ് വക്താവ് മുമ്പ് ആഗസ്റ്റ് മാസത്തില്‍ പറഞ്ഞിരുന്നു. 

ജീവിതച്ചെലവ് നടപടികളുടെ ഭാഗമായി 20% കുറവ് കഴിഞ്ഞ വർഷം അവതരിപ്പിച്ചു. വാണിജ്യ മേഖലയെ ഉൾപ്പെടുത്തിയിരുന്നില്ല. യംഗ് അഡൾട്ട് കാർഡ് പദ്ധതിയിലും, സ്റ്റുഡന്റ് ലീപ്പ് കാർഡ് പ്രോഗ്രാമിലും വാണിജ്യ മേഖല ഉൾപ്പെടുത്തിയിട്ടുണ്ട്.