ആയുർവേദ ആശുപത്രിയിലെ നഴ്സിനെ പീഡിപ്പിക്കാൻ ശ്രമിച്ച യുവാവ് പിടിയിൽ.

 കൊച്ചി: തൃപ്പൂണിത്തുറ ആയുർവേദ ആശുപത്രിയിലെ നഴ്സിനെ പീഡിപ്പിക്കാൻ ശ്രമിച്ച യുവാവ് പിടിയിൽ. പെരുമ്പാവൂർ അകനാട് സ്വദേശി ശ്രീജിത്ത് (38) ആണ് അറസ്റ്റിലായത്. നഴ്സിങ് സ്റ്റേഷനിൽ അതിക്രമിച്ച് കയറിയ ശ്രീജിത്ത് നഴ്സിനെ വലിച്ചിഴച്ച് മറ്റൊരു മുറിയിൽ കൊണ്ടുപോയി പീഡിപ്പിക്കാന്‍ ശ്രമിച്ചുവെന്നാണ് പരാതി. 

ആശുപത്രിയിലെ ഇലക്ട്രീഷ്യനാണ് പ്രതിയായ ശ്രീജിത്ത്. ശനിയാഴ്ചയാണ് പ്രതിയെ പൊലീസ് പിടികൂടിയത്. വ്യാഴാഴ്ച രാത്രിയിലാണ് അതിക്രമം നടക്കുന്നത്. ഡ്യൂട്ടിയിലുണ്ടായിരുന്ന ഡോക്ടറുടെ മുറി പുറത്തുനിന്ന് പൂട്ടിയതിനു ശേഷമാണ് പ്രതി അതിക്രമം നടത്താൻ ശ്രമിച്ചതെന്നാണ് പരാതിയിൽ പറയുന്നത്. ശ്രീജിത്തിൻ്റെ കൈയിൽ നിന്നും നഴ്സ് കുതറി ഓടി രക്ഷപ്പെടുകയായിരുന്നു. ശേഷം ശ്രീജിത്തും സംഭവസ്ഥലത്ത് നിന്ന് രക്ഷപ്പെട്ടു. 

പിന്നീട് വെള്ളിയാഴ്ച ആശുപത്രിയിലെത്തിയ ശ്രീജിത്ത് നഴ്സിനെ ഭീഷണിപ്പെടുത്തി. വിവരം മറ്റാരോടെങ്കിലും പറഞ്ഞാൽ കൊലപ്പെടുത്തുമെന്ന് പറഞ്ഞ് മൊബൈൽ ഫോണിൽ വാളിൻ്റേയും തോക്കുകളുടയേും ചിത്രങ്ങൾ കാണിക്കുകയും ആയുധങ്ങൾ കാറിൽ കരുതിയിട്ടുണ്ടെന്ന് ഭീഷണിപ്പെടുത്തുകയും ചെയ്തുവെന്ന് പരാതിയിൽ പറയുന്നു. സംഭവത്തിന് ശേഷം പേടിച്ചുപോയ നഴ്സ് തിരികെ വീട്ടിലെത്തി ഭർത്താവിനോട് കാര്യങ്ങൾ പറയുകയായിരുന്നു. 

തുടർന്ന് ഭർത്താവാണ് പൊലീസിൽ പരാതി നൽകിയത്.പരാതിയുടെ അടിസ്ഥനത്തിൽ ഹിൽപ്പാലസ് പൊലീസ് നടത്തിയ അന്വേഷണത്തിലാണ് പ്രതി അറസ്റ്റിലായത്. ഇന്‍സ്പെക്ടര്‍ വി ഗോപകുമാറിന്‍റെ നേതൃത്വത്തിലുള്ള പൊലീസ് സംഘമാണ് ശ്രീജിത്തിനെ അറസ്റ്റ് ചെയ്തത്.