ഇന്ത്യയിലെ ഭാവി ഗതാഗതം ഇലക്ട്രിക്ക് വാഹനങ്ങളുടേത് / ടോണി ചിറ്റിലപ്പിള്ളി

കൊച്ചി: ഇന്ത്യയിലെ ഭാവി ഗതാഗതം ഇലക്ട്രിക്ക് വാഹനങ്ങളുടേത് / ടോണി ചിറ്റിലപ്പിള്ളി  

ഫോസിൽ ഇന്ധന ഉപഭോഗം കുറയ്ക്കുന്നതിനും സാമ്പത്തികമായി ഇലക്ട്രിക് വാഹനങ്ങളുടെ (ഇവികൾ) ഉൽപ്പാദനം സുഗമമാക്കുന്നതിലൂടെ മലിനീകരണം ലഘൂകരിക്കുന്നതിനും ഇന്ത്യയെ സംബന്ധിച്ചിടത്തോളം  നിർണ്ണായകമാണ്.അതിവേഗം രാജ്യം ഈവികളിലേക്കു  മാറുന്നു.പെട്രോളിയം ഉൽപ്പന്നങ്ങൾ കൊണ്ട് ഇനിയും പൗരന്മാരെ ചൂഷണം ചെയ്യുന്നതിൽ നിന്ന് രക്ഷ നേടാനുള്ള മാർഗം കൂടിയാണ് ഇലക്ട്രിക്ക് വാഹനങ്ങളിലേക്കുള്ള കൂടുമാറ്റം.

ആഗോള കാർബൺ ഡൈ ഓക്സൈഡിന്റെ (CO2) ഉദ്‌വമനത്തിന്റെ അഞ്ചിലൊന്ന് ഗതാഗത മേഖലയിൽ നിന്നാണ്. ലോകത്തിലെ നാലാമത്തെ വലിയ വാഹന വിപണിയാണ് ഇന്ത്യ. പരിസ്ഥിതിയെ അപകടപ്പെടുത്തുന്ന ഫോസിൽ ഇന്ധനം അടിസ്ഥാനമാക്കിയുള്ള വാഹനങ്ങളാണ് നിലവിലെ ഓട്ടോമൊബൈൽ വിപണിയിൽ ആധിപത്യം പുലർത്തുന്നത്. ഡ്രൈവറില്ലാത്ത കാറുകൾ മുതൽ  ആർട്ടിഫിഷ്യൽ ഇന്റലിജൻസ് പ്രാപ്‌തമാക്കിയ സാങ്കേതികവിദ്യകളും വരെ ഗതാഗത വ്യവസായത്തെ സമൂലമായി പരിവർത്തനം ചെയ്യാൻ സജ്ജമാണ്. എന്നാൽ ശുദ്ധമായ ഊർജ്ജവും ഹരിത,  (കാർബൺ കുറഞ്ഞ )ഊർജ്ജ ഇന്ധനങ്ങളും ആസന്നമായ മാറ്റത്തിന്  വഴിയൊരുക്കും.

ഇന്ത്യ ഒരു വലിയ മുന്നേറ്റം നടത്തുന്നു.2030 ആകുമ്പോഴേക്കും ഇലക്ട്രിക് വാഹനങ്ങളുടെ വിഹിതം 30% ൽ കുറയാതെയിരിക്കണമെന്നാണു സർക്കാർ ലക്ഷ്യമിടുന്നത്. ഗതാഗത മേഖലയിലെ കാർബൺ ബഹിർഗമനം കുറയ്ക്കുന്നതിനുള്ള മാർഗമായി ഇലക്ട്രിക് മൊബിലിറ്റിയേയും ഹൈഡ്രജൻ ഉപയോഗിക്കുന്ന വാഹനങ്ങളേയും കണക്കാക്കുന്നു.

ഇൻഡസ്ട്രി 4.0, ഡാറ്റാ അനലിറ്റിക്സ്, ഐഒടി, ആർട്ടിഫിഷ്യൽ ഇന്‍റലിജൻസ് എന്നിവയെ അടിസ്ഥാനമാക്കി ഹൈപ്പർലൂപ്പ് മുതൽ സ്വയംനിയന്ത്രിക്കുന്നതും വിദൂരമായി നയിക്കുന്നതും വരെയുള്ള ഇന്‍റലിജന്‍റ് ട്രാൻസ്പോർട്ട് സിസ്റ്റങ്ങളെ അടിസ്ഥാനമാക്കിയുള്ള പ്രധാന വൻകിട സാങ്കേതികവിദ്യകളിലൂടെ ഇന്ത്യൻ ഗതാഗത വ്യവസായത്തിന്‍റെ ഭാവി സമൂലമായ പരിവർത്തനങ്ങളാൽ രൂപപ്പെടും.

വൈദ്യുതവാഹനങ്ങളുടെ (EV)  ദ്രുതഗതിയിലുള്ള വ്യാപനത്തിന്  തടസ്സം നിൽക്കുന്ന മുഖ്യ സാങ്കേതിക വിദ്യകളിലൊന്ന് ബാറ്ററികളുടേതാണ്. യൂറോപ്പിലും യുഎസിലും വികസിപ്പിച്ചെടുത്ത മിക്ക ബാറ്ററികളും ഇന്ത്യൻ സാഹചര്യങ്ങളിൽ പരാജയപ്പെടുന്നു. ചുറ്റുപാടുമുള്ള  താപനില ഒരു EV ബാറ്ററിയുടെ പ്രവർത്തനത്തെ അതിന്റെ ആയുസ്സിന്റെയും പ്രകടനത്തിന്റെയും അടിസ്ഥാനത്തിൽ ബാധിക്കുന്നു. 15-40 ഡിഗ്രി സെൽഷ്യസ് താപനില പരിധിയിൽ മാത്രമേ ഇത്തരം ബാറ്ററികൾക്ക് കാര്യക്ഷമതയുള്ളൂ. ഇത് ഇന്ത്യൻ കാലാവസ്ഥയ്ക്ക് യോജിച്ചതല്ല.ഇന്ത്യയിൽ  ഉത്തരാഖണ്ഡിലും മേഘാലയയിലും തണുപ്പും രാജസ്ഥാനിലും കേരളത്തിലും ചൂടുമാണ്.

കൂടാതെ, ഇന്ത്യയിലെ റോഡുകളുടെ അവസ്ഥയും റോഡുകളിൽ വാഹനങ്ങൾ ഉപയോഗിക്കുന്ന രീതിയും ബാറ്ററികളുടെ പ്രകടനത്തെ ബാധിക്കുന്നു. യൂറോപ്പിലും യുഎസിലും വികസിപ്പിച്ച ബാറ്ററി സാങ്കേതികവിദ്യ ഇവയ്‌ക്ക് അനുയോജ്യമല്ല. ബാറ്ററികൾ അപൂർവ്വമായി പൊട്ടിത്തെറിക്കുന്നതും ആശ്രയിക്കാൻ പറ്റാത്ത പ്രകടനവും പെട്ടെന്ന് ബാറ്ററി ചത്ത് പോകുന്നതും അത്തരം ബാറ്ററികൾ ഇന്ത്യൻ സാഹചര്യങ്ങൾക്ക് അനുയോജ്യമല്ലാത്തതിന്റെ ഫലങ്ങളാണ്.

ഇന്ത്യൻ സാഹചര്യങ്ങൾക്ക് അനുയോജ്യമായ അത്യാധുനിക ബാറ്ററി സാങ്കേതികവിദ്യ വികസിപ്പിച്ചെടുക്കുക, അതായത് ഉയർന്ന ഊർജ്ജ സാന്ദ്രതയും   വേഗത്തിലുള്ള ചാർജിംഗും ചാർജിംഗിൽ നിന്നുള്ള ഡീഗ്രേഡേഷൻ കുറവുളളതുമായ ബാറ്ററികൾ നിർമിക്കുക എന്നത് ഇവി (EV)കൾക്ക് ഇന്ത്യയിൽ വേരൂന്നാൻ അത്യന്താപേക്ഷിതമാണ്.