ന്യൂഡൽഹി: അഗ്നിവീർ പദ്ധതിയുടെ ഭാഗമായി നാല് വർഷത്തെ സേവനം പൂർത്തിയാക്കിയവരിൽ സ്ഥിരം സൈനിക സേവനത്തിന് തിരഞ്ഞെടുക്കപ്പെടാത്തവർക്ക് രണ്ട് വർഷത്തെ അധിക സേവനത്തിനു ശേഷം സ്ഥിരം സൈനികരായി ചേരാൻ അവസരം ലഭിക്കുമെന്ന് പ്രതിരോധ മന്ത്രി രാജ്നാഥ് സിങ് അറിയിച്ചു. താൽപര്യവും നിശ്ചിത യോഗ്യതകളും തിരഞ്ഞെടുപ്പ് മാനദണ്ഡങ്ങളും പാലിക്കുന്നവരെയാണ് ഇതിനായി പരിഗണിക്കുക.
പശ്ചിമ ബംഗാളിലെ ബാഗ്‌ഡോഗ്ര വ്യോമസേനാ കേന്ദ്രത്തിൽ ദീപാവലി ആഘോഷങ്ങളുടെ ഭാഗമായി സൈനികരുമായി നടത്തിയ സംവാദത്തിലാണ് മന്ത്രി ഇക്കാര്യം അറിയിച്ചത്.
ആദ്യത്തെ നാല് വർഷത്തെ സേവനത്തിനുശേഷം സ്ഥിരം സൈനിക സേവനത്തിലേക്ക് തിരഞ്ഞെടുക്കപ്പെടാത്ത അഗ്നിവീറുകൾക്ക് രണ്ട് വർഷം കൂടി സേവനകാലാവധി അനുവദിക്കുന്ന കാര്യം സർക്കാർ നേരത്തെ പ്രഖ്യാപിച്ചിരുന്നു. ഈ അധിക സേവനകാലാവധി പൂർത്തിയാക്കിയശേഷം നിശ്ചിത മാനദണ്ഡങ്ങൾ പാലിക്കുന്നവർക്ക് സ്ഥിരം സൈനിക സേവനത്തിന് അപേക്ഷിക്കാനും പരിഗണിക്കപ്പെടാനും അവസരമുണ്ടാകും.
അഗ്നിപഥ് പദ്ധതിയുടെ ഭാഗമായുള്ള സൈനികർക്ക് കൂടുതൽ കാലം സേനയിൽ തുടരാനുള്ള അവസരം ഇതിലൂടെ ലഭിക്കുമെന്നാണ് വിലയിരുത്തൽ. നിലവിൽ മൂന്ന് ലക്ഷത്തിലധികം അഗ്നിവീറുകൾ സായുധസേനയിൽ സേവനമനുഷ്ഠിക്കുന്നുണ്ട്.
2022-ൽ ആരംഭിച്ച അഗ്നിപഥ് പദ്ധതി പ്രകാരം നാല് വർഷത്തെ സേവനത്തിനുശേഷം ഓരോ ബാച്ചിലെയും പരമാവധി 25 ശതമാനം പേരെ സ്ഥിരം സൈനിക സേവനത്തിലേക്ക് നിലനിർത്താനായിരുന്നു വ്യവസ്ഥ. പുതിയ ക്രമീകരണം യോഗ്യരായവർക്ക് സൈനിക ജീവിതം തുടരാനുള്ള അധിക അവസരമാണ് നൽകുന്നത്.
.jpg)
ഇവിടെ പോസ്റ്റു ചെയ്യുന്ന അഭിപ്രായങ്ങൾ Deily Malayali Media Publications Private Limited ന്റെതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും.
ഇന്ത്യന്‍ സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായ അധിക്ഷേപങ്ങൾ, അപകീർത്തികരവും സ്പർദ്ധ വളർത്തുന്നതുമായ പരാമർശങ്ങൾ, അശ്ലീല-അസഭ്യപദ പ്രയോഗങ്ങൾ ഇവ ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.