ലണ്ടൻ: നാട്ടിൽനിന്ന് മടങ്ങിയെത്തിയ പിതാവിനെ സ്വീകരിക്കാൻ ഹീത്രോ വിമാനത്താവളത്തിലെത്തിയ മകനെ കാത്തിരുന്നത് അപ്രതീക്ഷിതമായ മരണവാർത്ത. യുകെയിലെ റെഡിച്ചിൽ സ്ഥിരതാമസമാക്കിയ പ്രമുഖ അധ്യാപകനും വിദ്യാഭ്യാസ വിദഗ്ധനുമായ ഡോ. ജോയ് കെ. തോമസ് (70) ഹീത്രോ വിമാനത്താവളത്തിൽ കുഴഞ്ഞുവീണ് മരിച്ചു. വ്യാഴാഴ്ച വൈകുന്നേരമായിരുന്നു സംഭവം.
വിമാനമിറങ്ങി ലഗേജുകൾ ശേഖരിക്കുന്നതിനായി കാത്തുനിൽക്കുന്നതിനിടെ ഡോ. ജോയ് പെട്ടെന്ന് കുഴഞ്ഞുവീഴുകയായിരുന്നു. ഒറ്റയ്ക്കായിരുന്നു അദ്ദേഹം യാത്ര ചെയ്തിരുന്നത്. വിമാനത്താവള അധികൃതർ ഉടൻ സി.പി.ആർ. ഉൾപ്പെടെയുള്ള അടിയന്തര രക്ഷാപ്രവർത്തനങ്ങൾ നടത്തിയെങ്കിലും ജീവൻ രക്ഷിക്കാനായില്ല. തുടർന്ന് സ്ഥലത്തെത്തിയ പൊലീസ് തുടർനടപടികൾ പൂർത്തിയാക്കി മൃതദേഹം മോർച്ചറിയിലേക്ക് മാറ്റി.
യുകെയിലേക്ക് താമസം മാറുന്നതിന് മുമ്പ് തിരുവനന്തപുരം തുമ്പ സെന്റ് സേവ്യേഴ്സ് കോളേജിൽ പ്രൊഫസറായി സേവനമനുഷ്ഠിച്ചിരുന്നു. വിരമിച്ച ശേഷം നാട്ടിലേക്ക് ഒറ്റയ്ക്ക് യാത്രചെയ്ത് മടങ്ങിയെത്തുന്നത് പതിവായിരുന്നു.
കൊച്ചിയിലെ കുസാറ്റിൽനിന്ന് ബിരുദവും കേരള സർവകലാശാലയിൽനിന്ന് പി.എച്ച്.ഡിയും നേടിയ അദ്ദേഹം മദ്രാസ് സർവകലാശാലയിൽനിന്ന് സൈക്കോളജിയിൽ ബിരുദാനന്തര ബിരുദവും കരസ്ഥമാക്കിയിട്ടുണ്ട്. യുകെയിലെ യൂണിവേഴ്സിറ്റി ഓഫ് ഈസ്റ്റ് ലണ്ടൻ, കവൻട്രി യൂണിവേഴ്സിറ്റി, യൂണിവേഴ്സിറ്റി ഓഫ് വെയിൽസ് തുടങ്ങിയ സ്ഥാപനങ്ങളിലും പ്രവർത്തിച്ചു. ലണ്ടനിലെ ബിസിനസ് സ്കൂൾ ഓഫ് ഇംഗ്ലണ്ടിൽ ഗവേഷണ വിഭാഗത്തിന്റെ മേൽനോട്ട ചുമതലയും വഹിച്ചിട്ടുണ്ട്.
ഓർഗനൈസേഷണൽ സൈക്കോളജി, ഫിനാൻസ്, മാനവവിഭവശേഷി തുടങ്ങിയ മേഖലകളിൽ പ്രാവീണ്യം തെളിയിച്ച അദ്ദേഹം അറിയപ്പെടുന്ന പ്രഭാഷകനും ഗവേഷകനുമായിരുന്നു. കൗൺസിലിങ്, പരിശീലനം, എഴുത്ത്, ഗവേഷണം തുടങ്ങിയ മേഖലകളിലും സജീവമായിരുന്നു. ജനീവയിൽ നടന്ന ലോക സമാധാന സമ്മേളനത്തിൽ പങ്കെടുത്ത് പ്രസംഗിച്ചതടക്കം അന്താരാഷ്ട്ര വേദികളിലും ശ്രദ്ധേയമായ സാന്നിധ്യമായിരുന്നു.
അരുവിത്തുറയിലായിരുന്നു അദ്ദേഹത്തിന്റെ സ്കൂൾ വിദ്യാഭ്യാസം. ഭാര്യ മേരി ജീൻ. മൂന്ന് മക്കളുണ്ട്.
ഡോ. ജോയ് കെ. തോമസിന്റെ അപ്രതീക്ഷിത വിയോഗം കുടുംബാംഗങ്ങൾക്കും യുകെയിലെ മലയാളി സമൂഹത്തിനും വലിയ ദുഃഖമായി.






.jpg)








ഇവിടെ പോസ്റ്റു ചെയ്യുന്ന അഭിപ്രായങ്ങൾ Deily Malayali Media Publications Private Limited ന്റെതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും.
ഇന്ത്യന് സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായ അധിക്ഷേപങ്ങൾ, അപകീർത്തികരവും സ്പർദ്ധ വളർത്തുന്നതുമായ പരാമർശങ്ങൾ, അശ്ലീല-അസഭ്യപദ പ്രയോഗങ്ങൾ ഇവ ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.