മീനങ്ങാടി സ്കൂൾ ടൂർ വിവാദം: വ്യാജ ആരോപണത്തിൽ കുരുങ്ങി പ്രധാനാധ്യാപകൻ; സോഷ്യൽ മീഡിയ വിചാരണക്കെതിരെ പ്രതിഷേധം ശക്തം

മീനങ്ങാടി: വിദ്യാർത്ഥികളുമായി പോയ വിനോദയാത്രയ്ക്കിടെ പ്രധാനാധ്യാപകൻ മദ്യപിച്ചെന്ന തരത്തിൽ ഉയർന്ന ആരോപണങ്ങൾ വ്യാജമെന്ന് ശാസ്ത്രീയ പരിശോധനയിൽ വ്യക്തമായി. 

മീനങ്ങാടി ഗവൺമെന്റ് ഹയർ സെക്കൻഡറി സ്കൂൾ പ്രിൻസിപ്പൽ ഷിവി കൃഷ്ണനെതിരെ ചില വിദ്യാർത്ഥികൾ ഉയർത്തിയ ആരോപണമാണ് രക്തപരിശോധനാ ഫലം നെഗറ്റീവായതോടെ തകർന്നടിഞ്ഞത്.

യാത്രയ്ക്കിടെ സ്കൂൾ പ്രിൻസിപ്പൽ മദ്യപിച്ചെന്ന് ആരോപിച്ച് ഏതാനും വിദ്യാർത്ഥികൾ ബഹളം വെക്കുകയും, ഇതിന്റെ ദൃശ്യങ്ങൾ മൊബൈൽ ഫോണിൽ പകർത്തി സമൂഹമാധ്യമങ്ങളിലൂടെ വ്യാപകമായി പ്രചരിപ്പിക്കുകയുമായിരുന്നു. നിമിഷങ്ങൾക്കകം വൈറലായ വീഡിയോ അധ്യാപകനെതിരെയുള്ള വലിയ രീതിയിലുള്ള സൈബർ വിചാരണയ്ക്കാണ് വഴിതെളിച്ചത്.

എന്നാൽ, തൊട്ടടുത്ത ദിവസം പുറത്തുവന്ന ഔദ്യോഗിക മെഡിക്കൽ പരിശോധനാ ഫലം പ്രിൻസിപ്പൽ മദ്യപിച്ചിരുന്നില്ലെന്ന് നിസ്സംശയം തെളിയിച്ചു. സത്യം പുറത്തുവന്നതിനു പിന്നാലെ സംഭവത്തിൽ വൈകാരികമായ പ്രതികരണവുമായി പ്രിൻസിപ്പൽ ഷിവി കൃഷ്ണൻ രംഗത്തെത്തി.

"തനിക്കെതിരെ ഉയർന്ന ആരോപണം അടിസ്ഥാനരഹിതമാണെന്ന് തെളിഞ്ഞത് സത്യത്തിന്റെ വിജയമാണ്. എങ്കിലും ഞാനും എന്റെ കുടുംബവും അനുഭവിച്ച മാനസിക വിഷമങ്ങൾക്കും പ്രയാസങ്ങൾക്കും ആര് മറുപടി നൽകും? സങ്കുചിതമായ ചില താൽപ്പര്യങ്ങളുടെ പേരിൽ ഒരാളെ മാനസികമായി എങ്ങനെ വേട്ടയാടാം എന്നതിനുള്ള തെളിവാണ് ഞാൻ," എന്ന് അദ്ദേഹം പ്രതികരിച്ചു.

വിദ്യാർത്ഥികളെ തെറ്റുകളിൽ നിന്ന് തിരുത്താൻ ശ്രമിക്കുന്ന അധ്യാപകർക്കെതിരെ വ്യക്തിവിരോധം തീർക്കാൻ സമൂഹമാധ്യമങ്ങളെ ദുരുപയോഗം ചെയ്യുന്ന പ്രവണതയ്ക്കെതിരെ അധ്യാപക സമൂഹത്തിലും പൊതുസമൂഹത്തിലും വ്യാപകമായ പ്രതിഷേധമാണ് ഉയരുന്നത്. ഒരു വീഡിയോ കൊണ്ട് ഒരു മനുഷ്യന്റെ അന്തസ്സും വർഷങ്ങളുടെ സേവനവും തകർക്കാൻ നിമിഷങ്ങൾ മതിയാകുമ്പോൾ, പിന്നീട് വരുന്ന തിരുത്തലുകൾക്ക് ആ നഷ്ടം നികത്താനാകുമോ എന്ന ഗൗരവകരമായ ചോദ്യമാണ് ഈ സംഭവം മുന്നോട്ടുവെക്കുന്നത്.

വ്യാജ ആരോപണങ്ങൾ ഉന്നയിക്കുന്നതിനും സോഷ്യൽ മീഡിയ വഴി  അപ കീർത്തിപ്പെടുത്തുന്നതിനുമെതിരെ കർശനമായ നിയമനടപടികൾ സ്വീകരിക്കണമെന്ന ആവശ്യവും ശക്തമായിട്ടുണ്ട്.