കൊച്ചി: ടൂറിസ്റ്റ് ബസുകളുടെ ഏകീകൃത വെള്ളനിറം മാറ്റുന്നതുമായി ബന്ധപ്പെട്ട തീരുമാനത്തിന് വീണ്ടും കാത്തിരിക്കേണ്ടിവരും. വിഷയം പരിഗണിക്കാനായി ഒക്ടോബർ 13ന് ചേരാനിരുന്ന സ്റ്റേറ്റ് ട്രാൻസ്‌പോർട്ട് അതോറിറ്റി യോഗത്തിന് ഹൈക്കോടതി സ്റ്റേ അനുവദിച്ചു. രണ്ട് ബസുടമകൾ നൽകിയ ഹർജികളിലാണ് സ്റ്റേ ലഭിച്ചതെന്നാണ് റിപ്പോർട്ട്. ഇതോടെ കളർ കോഡ് സംബന്ധിച്ച തീരുമാനം വൈകാനാണ് സാധ്യത.
നിറം മാറ്റാനുള്ള തീരുമാനം ഉടൻ ഉണ്ടാകുമെന്ന പ്രതീക്ഷയിൽ വെള്ളനിറം മാറ്റിയ ഏകദേശം 200 ടൂറിസ്റ്റ് ബസുകൾക്ക് നിലവിൽ നിരത്തിലിറങ്ങാനാകാതെ കിടക്കുകയാണെന്നാണ് റിപ്പോർട്ട്. സ്റ്റേറ്റ് ട്രാൻസ്‌പോർട്ട് അതോറിറ്റിക്ക് ടൂറിസ്റ്റ് ബസുകളുടെ നിറം സംബന്ധിച്ച് തീരുമാനമെടുക്കാൻ അധികാരം നൽകിക്കൊണ്ട് സർക്കാർ വിജ്ഞാപനം പുറപ്പെടുവിച്ചിരുന്നു. വിവിധ ഹൈക്കോടതി വിധികൾ പരിഗണിച്ചായിരിക്കണം അന്തിമ തീരുമാനമെന്നും നിർദേശിച്ചിരുന്നു.
2022 ഒക്ടോബറിൽ വടക്കഞ്ചേരിയിലുണ്ടായ ടൂറിസ്റ്റ് ബസ് അപകടത്തിൽ അഞ്ച് വിദ്യാർഥികളടക്കം ഒമ്പത് പേർ മരിച്ചതിനു പിന്നാലെയാണ് ടൂറിസ്റ്റ് ബസുകൾക്ക് ഏകീകൃത വെള്ളനിറം നിർബന്ധമാക്കിയത്. ഡ്രൈവിങ് സ്‌കൂൾ വാഹനങ്ങളുടെ മുന്നിലും പിന്നിലും മഞ്ഞനിറം നൽകാനും നിർദേശമുണ്ടായിരുന്നു. ടൂറിസ്റ്റ് ബസുകളുടെ ബോഡിയിലും ഗ്ലാസുകളിലും സിനിമാതാരങ്ങളുടെ വലിയ ചിത്രങ്ങളും മറ്റ് അലങ്കാരങ്ങളും എഴുത്തുകളും അനുവദിക്കരുതെന്ന് 2019 ഒക്ടോബർ ഒന്നിന് ഹൈക്കോടതി ഉത്തരവിട്ടിരുന്നു. ഈ നിർദേശങ്ങളും പരിഗണിച്ചാണ് വെള്ളനിറം കർശനമായി നടപ്പാക്കിയത്.
വെള്ളനിറം ടൂറിസം മേഖലയെ പ്രതികൂലമായി ബാധിക്കുന്നുവെന്ന പരാതികൾ ഉയർന്നതോടെയാണ് നിലവിലെ ചട്ടം പുനഃപരിശോധിക്കാൻ സർക്കാർ തീരുമാനിച്ചത്. എന്നാൽ ഹൈക്കോടതിയുടെ ഇടപെടലോടെ വിഷയത്തിൽ അന്തിമ തീരുമാനമെടുക്കുന്നത് അനിശ്ചിതത്വത്തിലായിരിക്കുകയാണ്.
.jpg)
ഇവിടെ പോസ്റ്റു ചെയ്യുന്ന അഭിപ്രായങ്ങൾ Deily Malayali Media Publications Private Limited ന്റെതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും.
ഇന്ത്യന്‍ സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായ അധിക്ഷേപങ്ങൾ, അപകീർത്തികരവും സ്പർദ്ധ വളർത്തുന്നതുമായ പരാമർശങ്ങൾ, അശ്ലീല-അസഭ്യപദ പ്രയോഗങ്ങൾ ഇവ ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.