ജനസംഖ്യാ വർധനവിന് പുതിയ പദ്ധതിയുമായി കാനഡ: പ്രധാനമന്ത്രി മാർക്ക് കാർണി

ഒട്ടാവ: കുടിയേറ്റ സംവിധാനം പൂർണ്ണ നിയന്ത്രണത്തിലായ സാഹചര്യത്തിൽ, രാജ്യത്തെ ജനസംഖ്യ നിയന്ത്രിതമായി വീണ്ടും വർദ്ധിപ്പിക്കാൻ സമയമായെന്ന് കനേഡിയൻ പ്രധാനമന്ത്രി മാർക്ക് കാർണി. ന്യൂയോർക്ക് ടൈംസിന് നൽകിയ പ്രത്യേക അഭിമുഖത്തിലാണ് സർക്കാരിന്റെ പുതിയ നിലപാട് അദ്ദേഹം വ്യക്തമാക്കിയത്.

വീടുകളുടെ ക്ഷാമം, തൊഴിലവസരങ്ങളിലെ കുറവ്, ആരോഗ്യമേഖല നേരിടുന്ന പ്രതിസന്ധികൾ എന്നിവ കണക്കിലെടുത്ത് മുൻപ് കുടിയേറ്റക്കാരുടെ എണ്ണത്തിൽ സർക്കാർ കടുത്ത വെട്ടിക്കുറയ്ക്കൽ വരുത്തിയിരുന്നു. എന്നാൽ രാജ്യത്തിന്റെ സാമ്പത്തിക വളർച്ച മുന്നിൽ നിർത്തി ജനസംഖ്യ വീണ്ടും ഘട്ടംഘട്ടമായി ഉയർത്താനാണ് നിലവിൽ കാനഡ സർക്കാർ ആലോചിക്കുന്നത്.

മുന്നോട്ട് വെച്ച കുടിയേറ്റ പദ്ധതികളിൽ സർക്കാർ വലിയ മാറ്റങ്ങൾ വരുത്തിയിട്ടുണ്ട്. മുൻപ് പ്രതിവർഷം അഞ്ച് ലക്ഷം പേർക്ക് സ്ഥിരതാമസം (PR) നൽകാനായിരുന്നു തീരുമാനിച്ചിരുന്നതെങ്കിൽ, പുതിയ പദ്ധതി പ്രകാരം 2026-ൽ 3.85 ലക്ഷവും, 2027, 2028 വർഷങ്ങളിൽ 3.70 ലക്ഷം വീതവുമാണ് ലക്ഷ്യമിടുന്നത്.

അതേസമയം, പ്രധാനമന്ത്രിയുടെ ഈ തീരുമാനത്തിനെതിരെ പ്രതിപക്ഷം ശക്തമായ എതിർപ്പുമായി രംഗത്തെത്തി. നിലവിലെ സാഹചര്യത്തിൽ കുടിയേറ്റ നിരക്ക് ഉയർത്തുകയല്ല, മറിച്ച് വീണ്ടും കുറയ്ക്കുകയാണ് വേണ്ടതെന്ന് കൺസർവേറ്റീവ് പാർട്ടി നേതാവ് മിഷേൽ റെംപൽ ഗാർണർ അഭിപ്രായപ്പെട്ടു.

വിദ്യാർത്ഥികൾ, താൽക്കാലിക തൊഴിലാളികൾ എന്നിവരുടെ വരവിന് സർക്കാർ കടുത്ത നിയന്ത്രണങ്ങൾ തുടരുകയാണ്. രാജ്യത്തെ ആകെയുള്ള ജനസംഖ്യയിൽ താൽക്കാലിക താമസക്കാരുടെ അനുപാതം 2027 അവസാനത്തോടെ അഞ്ച് ശതമാനമായി കുറയ്ക്കുകയാണ് ലക്ഷ്യം. ജൂലൈ മാസത്തിലെ കണക്കുകൾ പ്രകാരം നിലവിൽ 6.7 ശതമാനം താൽക്കാലിക താമസക്കാരാണ് കാനഡയിലുള്ളത്.

എന്നാൽ കുടിയേറ്റക്കാരുടെ എണ്ണം ഇനിയും കുറയ്ക്കണമെന്നാണ് പ്രമുഖ സാമ്പത്തിക വിദഗ്ദ്ധരുടെ സംഘടനയായ സി.ഡി. ഹൗ ഇൻസ്റ്റിറ്റ്യൂട്ടിന്റെ ശുപാർശ. വരുന്ന മൂന്ന് വർഷങ്ങളിലും പ്രവേശന നിരക്ക് തുടർച്ചയായി കുറയ്ക്കണമെന്ന് കൗൺസിൽ ആവശ്യപ്പെടുന്നു. തൊഴിൽ ക്ഷാമം പരിഹരിക്കാൻ കുടിയേറ്റത്തെ മാത്രം ആശ്രയിക്കാതെ, സ്ഥാപനങ്ങൾ ജീവനക്കാർക്ക് മെച്ചപ്പെട്ട ശമ്പളവും മികച്ച തൊഴിൽ സാഹചര്യവും നൽകുകയാണ് വേണ്ടതെന്ന് സാമ്പത്തിക ശാസ്ത്ര പ്രൊഫസർ മിക്കൽ സ്കൂട്ടറുഡ് വ്യക്തമാക്കി.