റഷ്യൻ എണ്ണ കേന്ദ്രങ്ങൾ ലക്ഷ്യമിട്ടാൽ യുക്രൈനുള്ള ഇന്റലിജൻസ് സഹായം നിർത്തുമെന്ന് യുഎസ് മുന്നറിയിപ്പ്

വാഷിംഗ്ടൺ: റഷ്യയുടെ എണ്ണ ശുദ്ധീകരണശാലകൾക്കും ഊർജ അടിസ്ഥാന സൗകര്യങ്ങൾക്കും നേരെ യുക്രൈൻ ആക്രമണം തുടർന്നാൽ ഇന്റലിജൻസ് വിവരങ്ങൾ കൈമാറുന്നത് ഉടൻ നിർത്തിവെക്കുമെന്ന് അമേരിക്ക മുന്നറിയിപ്പ് നൽകിയതായി റിപ്പോർട്ട്. ദി വാഷിംഗ്ടൺ പോസ്റ്റ് ഒക്ടോബർ 14-ന് പ്രസിദ്ധീകരിച്ച റിപ്പോർട്ടിലാണ് ഇക്കാര്യം വെളിപ്പെടുത്തിയത്. യുക്രൈൻ എംബസിയിലെ ഉദ്യോഗസ്ഥർക്ക് അമേരിക്കൻ ഇന്റലിജൻസ് വിഭാഗം താക്കീത് നൽകിയതായി വിഷയത്തെക്കുറിച്ച് അറിവുള്ള ഒരാളെ ഉദ്ധരിച്ചാണ് റിപ്പോർട്ട്.

അമേരിക്കയുടെ മുന്നറിയിപ്പ് യുക്രൈനിലെ ഉന്നത ഉദ്യോഗസ്ഥർക്കിടയിലും ആശങ്ക സൃഷ്ടിച്ചിട്ടുണ്ട്. റഷ്യൻ എണ്ണ ശുദ്ധീകരണശാലകൾക്കു നേരെയുള്ള ആക്രമണങ്ങൾ അവസാനിപ്പിക്കണമെന്ന് അമേരിക്കൻ ഉദ്യോഗസ്ഥർ യുക്രൈനെ പലതവണ ആവശ്യപ്പെട്ടതായും റിപ്പോർട്ടുകളുണ്ട്. റഷ്യയുടെ ഊർജ മേഖല ലക്ഷ്യമിടുന്ന ആക്രമണങ്ങൾ ആഗോള ഇന്ധനവിപണിയെയും അമേരിക്കയുടെ ഊർജ വില കുറയ്ക്കാനുള്ള ശ്രമങ്ങളെയും ബാധിക്കുമെന്ന ആശങ്കയാണ് വാഷിംഗ്ടണിന്റെ നിലപാടിനു പിന്നിലെന്നാണ് റിപ്പോർട്ടുകൾ സൂചിപ്പിക്കുന്നത്.

എന്നാൽ, അമേരിക്ക യുക്രൈനുമായുള്ള ഇന്റലിജൻസ് വിവര കൈമാറ്റം പൂർണമായി നിർത്തിയിട്ടില്ല. മുന്നറിയിപ്പ് ലഭിച്ചതായി യുക്രൈൻ പ്രസിഡന്റ് വൊളോഡിമിർ സെലൻസ്കിയും സ്ഥിരീകരിച്ചെങ്കിലും അത് നടപ്പാക്കിയിട്ടില്ലെന്ന് വ്യക്തമാക്കിയിരുന്നു. യുക്രൈനിലേക്കുള്ള റഷ്യൻ മിസൈൽ ആക്രമണങ്ങളെക്കുറിച്ചുള്ള മുന്നറിയിപ്പുകളും അമേരിക്കയുടെ ഇന്റലിജൻസ് പിന്തുണയുടെ തുടർച്ചയും സംബന്ധിച്ച് ഇതിനിടെ ആശയക്കുഴപ്പം ഉയർന്നിട്ടുണ്ട്.

യുദ്ധത്തിൽ റഷ്യൻ സൈനിക നീക്കങ്ങൾ നിരീക്ഷിക്കുന്നതിനും മിസൈൽ ആക്രമണങ്ങളെക്കുറിച്ച് മുന്നറിയിപ്പ് ലഭിക്കുന്നതിനും അമേരിക്കയുടെ ഇന്റലിജൻസ് പിന്തുണ യുക്രൈന് നിർണായകമാണ്. അതിനാൽ, ഈ പിന്തുണ പിൻവലിക്കുമെന്ന ഭീഷണി ഇരുരാജ്യങ്ങളും തമ്മിലുള്ള ബന്ധത്തിലും യുദ്ധത്തിന്റെ ഗതിയിലും നിർണായക സ്വാധീനം ചെലുത്താനിടയുണ്ട്.