അശ്വാസ വാർത്ത: ₹2,000 വരെയുള്ള പേയ്‌മെന്റുകൾക്ക് ചാർജില്ല:, കേന്ദ്ര സർക്കാർ ഉത്തരവിറക്കി,

ന്യൂഡൽഹി: 2000 രൂപ വരെയുള്ള യുപിഐ, റുപേ ക്രെഡിറ്റ് കാർഡ് ഇടപാടുകൾക്ക് യാതൊരുവിധ ചാർജുകളും ഈടാക്കരുതെന്ന് കേന്ദ്ര സർക്കാർ ഔദ്യോഗിക ഉത്തരവിറക്കി.

യുപിഐ ഇടപാടുകൾക്ക് ഫീസ് വരുന്നു എന്ന ആശങ്കകൾ ശക്തമായ സാഹചര്യത്തിലാണ് ധനകാര്യ മന്ത്രാലയത്തിന്റെ ഈ നിർണായക വിജ്ഞാപനം പുറത്തുവന്നിരിക്കുന്നത്. സാധാരണക്കാർ നടത്തുന്ന ചെറിയ തുകയുടെ ഇടപാടുകളും വ്യക്തികൾ തമ്മിലുള്ള പണമിടപാടുകളും പൂർണ്ണമായും സൗജന്യമായി തുടരുമെന്ന് സർക്കാർ ഉറപ്പുനൽകുന്നു.

പാർലമെന്റ് അടുത്തിടെ പാസാക്കിയ ‘ടാക്സേഷൻ ആൻഡ് അദർ ലോസ് (ഭേദഗതി) ബിൽ, 2026’ പ്രകാരമുള്ള ഭേദഗതികൾ ഇതിനകം പ്രാബല്യത്തിൽ വന്നിട്ടുണ്ട്. 2007-ലെ ‘പേയ്‌മെന്റ് ആൻഡ് സെറ്റിൽമെന്റ് സിസ്റ്റംസ് ആക്ട്’ സെക്ഷൻ 10എ-യിൽ വരുത്തിയ ഈ മാറ്റത്തിലൂടെ, 50 കോടി രൂപയ്ക്ക് മുകളിൽ വാർഷിക വിറ്റുവരവുള്ള 

വൻകിട ബിസിനസ് സ്ഥാപനങ്ങളിൽ നിന്നും ഡിജിറ്റൽ പേയ്‌മെന്റുകൾക്ക് ‘മർച്ചന്റ് ഡിസ്‌കൗണ്ട് റേറ്റ്’ (എംഡിആർ) ഈടാക്കാൻ സർക്കാരിന് നിയമപരമായ അധികാരം ലഭിച്ചിട്ടുണ്ട്. ആമസോൺ, ഫ്ലിപ്കാർട്ട് തുടങ്ങിയ വൻകിട പ്ലാറ്റ്‌ഫോമുകൾക്കാണ് ഈ നിയമം പ്രധാനമായും ബാധകമാകുന്നത്.

കഴിഞ്ഞ വർഷത്തെ മൊത്തം ഡിജിറ്റൽ ഇടപാടുകൾ പരിശോധിക്കുമ്പോൾ, 2000 രൂപയിൽ കൂടുതൽ തുകയുള്ള ഇടപാടുകൾ വെറും നാല് ശതമാനം മാത്രമാണ്. എന്നാൽ ആകെ യുപിഐ ഇടപാട് തുകയുടെ മൂന്നിൽ രണ്ടും ഈ നാല് ശതമാനത്തിൽ നിന്നുമാത്രമാണ് വന്നിട്ടുള്ളത് എന്നത് ശ്രദ്ധേയമാണ്. അതുകൊണ്ടുതന്നെ വൻകിട ഇടപാടുകളിൽ നിന്ന് എംഡിആർ ചാർജുകൾ ചുമത്താൻ തീരുമാനിച്ചപ്പോഴും, സാധാരണക്കാരുടെ ദൈനംദിന സാമ്പത്തിക ഇടപാടുകൾക്ക് യാതൊരു ബാദ്ധ്യതയും വരാത്ത രീതിയിലാണ് പുതിയ വിജ്ഞാപനം ക്രമീകരിച്ചിരിക്കുന്നത്.

യുപിഐ വഴിയുള്ള ചെറിയ പണമിടപാടുകൾക്ക് ഫീസ് ഈടാക്കുമെന്ന രീതിയിൽ ഉയർന്നുവന്ന വിമർശനങ്ങളും ആശങ്കകളും പൂർണ്ണമായും ദൂരീകരിക്കുന്നതാണ് ധനകാര്യ മന്ത്രാലയത്തിന്റെ പുതിയ പ്രഖ്യാപനം. 

ഭീം യുപിഐ, യുപിഐ ക്യുആർ കോഡ് എന്നിവ വഴിയുള്ള സാധാരണക്കാരുടെ ഇടപാടുകളെയും ചെറുകിട വ്യാപാരികളെയും ഈ ഫീസുകളിൽ നിന്ന് പൂർണ്ണമായി ഒഴിവാക്കിയിട്ടുണ്ട്. ഡിജിറ്റൽ ഇന്ത്യയുടെ വളർച്ചയ്ക്ക് ആക്കം കൂട്ടുന്നതിനൊപ്പം സാധാരണ ജനങ്ങൾക്ക് തടസ്സമില്ലാത്ത സൗജന്യ സേവനം ഉറപ്പാക്കുകയാണ് സർക്കാരിന്റെ പ്രധാന ലക്ഷ്യം.