അധിനിവേശ വെസ്റ്റ് ബാങ്ക് സെറ്റിൽമെന്റുകളിലെ ഉൽപ്പന്നങ്ങൾക്ക് കാനഡയും വിലക്കേർപ്പെടുത്തുന്നു

ഒട്ടാവ: അന്താരാഷ്ട്ര നിയമങ്ങൾ ലംഘിച്ച് അധിനിവേശ വെസ്റ്റ് ബാങ്കിലെ ജൂത കുടിയേറ്റ കേന്ദ്രങ്ങളിൽ (Israeli Settlements) നിർമിക്കുന്ന ഉൽപ്പന്നങ്ങൾക്കും സേവനങ്ങൾക്കും നിരോധനം ഏർപ്പെടുത്താൻ കാനഡയും ഒരുങ്ങുന്നു. കാനഡയുടെ വിദേശകാര്യ മന്ത്രി അനിത ആനന്ദാണ് ഇതുസംബന്ധിച്ച നിർണായക പ്രഖ്യാപനം നടത്തിയത്.

വെസ്റ്റ് ബാങ്കിലെ അനധികൃത കുടിയേറ്റ കേന്ദ്രങ്ങളുടെ വ്യാപനവും ഫലസ്തീനികൾക്കെതിരെയുള്ള അതിക്രമങ്ങളും വർധിച്ചുവരുന്ന പശ്ചാത്തലത്തിലാണ് കാനഡയുടെ ഈ കടുത്ത നടപടി. യുകെ, ഫ്രാൻസ് എന്നീ രാജ്യങ്ങളുമായി ചേർന്ന് പുറത്തിറക്കിയ സംയുക്ത പ്രസ്താവനയിലാണ് കാനഡ ഇക്കാര്യം വ്യക്തമാക്കിയത്. അന്താരാഷ്ട്ര നിയമങ്ങൾക്ക് വിരുദ്ധമായ ഇത്തരം കുടിയേറ്റങ്ങളെ പ്രോത്സാഹിപ്പിക്കുന്ന നടപടികൾ അംഗീകരിക്കാനാകില്ലെന്നും, ഫലസ്തീൻ വിഷയത്തിൽ ഇരുരാഷ്ട്ര പരിഹാരം (Two-state solution) സാധ്യമാക്കാൻ ഈ നിയന്ത്രണങ്ങൾ അനിവാര്യമാണെന്നും രാജ്യങ്ങൾ ചൂണ്ടിക്കാട്ടുന്നു.

കാനഡയ്ക്കൊപ്പം യുകെയും ഫ്രാൻസും സമാനമായ വ്യാപാര വിലക്കുകൾ പ്രഖ്യാപിച്ചിട്ടുണ്ട്. ആഗോളതലത്തിൽ കൂടുതൽ രാജ്യങ്ങൾ സമാനമായ നിലപാടുമായി മുന്നോട്ട് വരുമ്പോൾ, ഇത് ഇസ്രയേലിന് മേൽ വലിയ സാമ്പത്തിക-രാഷ്ട്രീയ സമ്മർദ്ദത്തിന് കാരണമായിരിക്കുകയാണ്. വരുന്ന മാസങ്ങളിൽ തന്നെ ഇതുമായി ബന്ധപ്പെട്ട ഔദ്യോഗിക നിയമനടപടികൾ നിലവിൽ വരുമെന്ന് കാനഡ അറിയിച്ചു.