തിരുവനന്തപുരത്ത് പിഞ്ചുകുഞ്ഞ് ക്രൂരമായി കൊല്ലപ്പെട്ടു; അമ്മ കസ്റ്റഡിയിൽ

തിരുവനന്തപുരം: മലയിൻകീഴ് വിളവൂർക്കലിൽ ഒന്നര വയസ്സുകാരിയായ മകളെ അമ്മ കഴുത്തറത്ത് കൊലപ്പെടുത്തി. അഭിജിത്ത് - ക്രിസ്റ്റി ദമ്പതികളുടെ മകൾ അന്ന (ഇവാന) ആണ് ദാരുണമായി കൊല്ലപ്പെട്ടത്. സംഭവത്തിൽ കുട്ടിയുടെ അമ്മയായ ക്രിസ്റ്റിയെ മലയിൻകീഴ് പൊലീസ് കസ്റ്റഡിയിലെടുത്തു. കുടുംബപ്രശ്നങ്ങളാണ് കൊലപാതകത്തിന് കാരെന്നാണ് പ്രാഥമിക നിഗമനം.

ഇന്ന് വൈകുന്നേരത്തോടെയായിരുന്നു നാടിനെ ഞെട്ടിച്ച സംഭവം നടന്നത്. വീടിനുള്ളിൽ അതിക്രമിച്ചുകയറി മുറി പൂട്ടിയ ശേഷമാണ് ക്രിസ്റ്റി കുഞ്ഞിന്റെ കഴുത്തറുത്തത്. ഗുരുതരമായി പരിക്കേറ്റ് രക്തത്തിൽ കുളിച്ചുകിടന്ന കുഞ്ഞിനെ ഉടൻതന്നെ നാട്ടുകാരുടെ സഹായത്തോടെ വിളവൂർക്കലിലെ പ്രാഥമികാരോഗ്യ കേന്ദ്രത്തിലും പിന്നീട് തിരുവനന്തപുരം മെഡിക്കൽ കോളേജ് ആശുപത്രിയിലും എത്തിച്ചെങ്കിലും ജീവൻ രക്ഷിക്കാനായില്ല.

കൊലപാതകത്തിന് ശേഷം മുറിക്കുള്ളിൽ തന്നെ കഴിഞ്ഞിരുന്ന അമ്മയെ പൊലീസ് എത്തിയാണ് കസ്റ്റഡിയിലെടുത്തത്. ദമ്പതികൾ തമ്മിലുണ്ടായ വഴക്കിനെ തുടർന്നാണോ അതോ മറ്റ് മാനസിക പ്രശ്നങ്ങളാണോ കൊലപാതകത്തിലേക്ക് നയിച്ചതെന്ന കാര്യം പൊലീസ് അന്വേഷിച്ചുവരികയാണ്. സംഭവത്തിൽ മലയിൻകീഴ് പൊലീസ് കേസെടുത്ത് വിശദമായ അന്വേഷണം ആരംഭിച്ചിട്ടുണ്ട്.