ദുബായിൽ വൻ അപകടം മരിച്ചവരിൽ നിരവധി ഇന്ത്യക്കാരും

ദുബായ്: എമിറേറ്റ്സ് റോഡിലുണ്ടായ വാഹനാപകടത്തിൽ എട്ടുപേർ മരിച്ചു.

സാങ്കേതിക തകരാറിനെ തുടർന്ന് റോഡിൽ നിർത്തിയിട്ടിരുന്ന ട്രക്കിന് പിന്നിൽ ഒരു മിനി ബസ് അതിവേഗത്തിൽ വന്നിടിക്കുകയായിരുന്നു. പ്രാദേശിക സമയം ഉച്ചയോടു കൂടിയാണ് അപകടം നടന്നത്. അപകടസമയത്ത് മിനി ബസ്സിൽ ഡ്രൈവർ ഉൾപ്പെടെ 16 പേരാണ് ഉണ്ടായിരുന്നത്. മരിച്ചവരിൽ ആറ് പേർ ഇന്ത്യക്കാരാണ്.

അപകടത്തിൽ എട്ട് പേർക്ക് പരിക്കേറ്റിട്ടുണ്ട്. ഇതിൽ നാല് പേരുടെ നില അതീവ ഗുരുതരമാണെന്നും ബാക്കി നാലു പേർക്കും കാര്യമായ പരിക്കുണ്ടെന്നും വിവരമുണ്ട്. പരിക്കേറ്റ എല്ലാവരെയും ഉടൻ തന്നെ തൊട്ടടുത്തുള്ള ആശുപത്രിയിൽ പ്രവേശിപ്പിച്ചു. പരിക്കേറ്റ് ചികിത്സയിലുള്ള രണ്ട് പേർ ഇന്ത്യക്കാരാണ്. അപകടത്തെത്തുടർന്ന് എമിറേറ്റ്സ് റോഡിൽ ദീർഘനേരം ഗതാഗതം തടസ്സപ്പെടുന്ന സാഹചര്യം ഉണ്ടായെങ്കിലും പിന്നീട് പോലീസ് ഇടപെട്ട് ഇത് പുനഃസ്ഥാപിച്ചു. 

മുൻപിലുള്ള വാഹനവുമായി നിശ്ചിത അകലം പാലിക്കണമെന്ന സുരക്ഷാ നിർദ്ദേശം മിനി ബസ് ഡ്രൈവർ പാലിക്കാത്തതാണ് ഇത്രയും വലിയ അപകടത്തിന് കാരണമായതെന്നാണ് ദുബായ് പോലീസിന്റെ പ്രാഥമിക നിഗമനം.