ഔദ്യോഗിക ചേമ്പറിലിരുന്ന വിലപിടിപ്പുള്ള വാച്ചും ഭരണപരമായ പ്രധാന ഫയലുകളും മോഷ്ടിച്ചു; കോൺഗ്രസ് കൗൺസിലർക്കെതിരെ പരാതി നൽകി ചെയർപേഴ്‌സൺ ദിയ പുളിക്കകണ്ടം ;

കോട്ടയം: പാലാ നഗരസഭയിലെ യു.ഡി.എഫ് മുന്നണിക്കുള്ളിലെ പടലപ്പിണക്കങ്ങൾ പുതിയ തലത്തിലേക്ക്. കോൺഗ്രസ് കൗൺസിലറുടെ പരാതിയിൽ ബിനു പുളിക്കകണ്ടത്തിനെതിരെ പോലീസ് കേസെടുത്തതിന് പിന്നാലെ, മറുപടിയുമായി ചെയർപേഴ്‌സൺ ദിയ പുളിക്കകണ്ടം രംഗത്തെത്തി. 

കോൺഗ്രസ് കൗൺസിലർ ബിജു തോമസിനെതിരെയാണ് ചെയർപേഴ്‌സൺ മോഷണക്കുറ്റത്തിന് പരാതി നൽകിയിരിക്കുന്നത്.

തന്റെ ഔദ്യോഗിക ചേമ്പറിലിരുന്ന വിലപിടിപ്പുള്ള വാച്ചും ഭരണപരമായ പ്രധാന ഫയലുകളും ബിജു തോമസ് മോഷ്ടിച്ചെന്നാണ് ചെയർപേഴ്‌സന്റെ പരാതി. പാലാ പോലീസിലാണ് ദിയ പരാതി നൽകിയിട്ടുള്ളത്. 

ബിനു പുളിക്കകണ്ടത്തിനെതിരെ പരാതി നൽകിയ യു.ഡി.എഫ് കൗൺസിലർ ബിജു തോമസ് തന്റെ ചേമ്പറിൽ വന്നുപോയതിന് പിന്നാലെയാണ് സാധനങ്ങൾ കാണാതായതെന്ന് ദിയയുടെ പരാതിയിൽ വ്യക്തമാക്കുന്നു. കഴിഞ്ഞ ദിവസം ബിനുവിനെതിരെയുള്ള കേസിന്റെ ഭാഗമായി ബിജു തോമസും പോലീസ് ഉദ്യോഗസ്ഥരും ചേർന്ന് ചെയർപേഴ്‌സൺ ഇല്ലാത്ത സമയത്ത് ചേമ്പറിൽ എത്തി മഹസർ തയ്യാറാക്കിയിരുന്നു. 

അതേസമയം, കോൺഗ്രസ് കൗൺസിലർ ബിജു തോമസിന്റെ പരാതിയിൽ ബിനു പുളിക്കകണ്ടത്തിനും സഹോദരനുമെതിരെ കയ്യേറ്റം ചെയ്യല്‍ അസഭ്യം പറയല്‍ തുടങ്ങിയ വകുപ്പുകള്‍ ചേര്‍ത്താണ് എഫ്.ഐ.ആർ രജിസ്റ്റർ ചെയ്തിരിക്കുന്നത്.