കോട്ടയം: പ്രശസ്ത ധ്യാനഗുരുവും മലയാള ക്രൈസ്തവ ഭക്തിഗാന രംഗത്ത് അതുല്യ സംഭാവനകള് നല്കിയ രചയിതാവുമായ ഫാ. മൈക്കിള് പനച്ചിക്കല് വിസി (77) അന്തരിച്ചു. കോട്ടയം അടിച്ചിറയിലെ ധ്യാനകേന്ദ്രത്തിലായിരുന്നു അന്ത്യം.
വിന്സെന്ഷ്യന് സഭ സെന്റ് ജോസഫ് പ്രോവിന്സ് അംഗവും വചനപ്രഘോഷകനും സാഹിത്യകാരനും മാധ്യമപ്രവര്ത്തകനുമായിരുന്നു. 1974 ഡിസംബര് 19ന് വൈദികനായ ഫാ. മൈക്കിള് പനച്ചിക്കല്, അഞ്ച് പതിറ്റാണ്ടിലേറെ നീണ്ട പൗരോഹിത്യജീവിതത്തിലൂടെ ഇന്ത്യയിലും വിദേശത്തുമായി ആത്മീയ നവോത്ഥാന രംഗത്തു പ്രവര്ത്തിച്ചുതിരുനാമകീര്ത്തനം പാടുവാനല്ലെങ്കില്, നിത്യത തീര്ക്കുന്ന നിമിഷങ്ങളില്, ശ്യാമാംബരത്തിലെ സൗന്ദര്യമായി നീ, പിതാവേ അനന്ത നന്മയാകും തുടങ്ങി 700ല് അധികം ഗാനങ്ങളുടെ രചയിതാവാണ്. പോപ്പുലര് മിഷന് ഡയറക്ടര്, അടിച്ചിറ പരിത്രാണ ധ്യാനകേന്ദ്ര ഡയറക്ടര്, കട്ടപ്പന കൃപാലയ റിട്രീറ്റ് സെന്റര് ഡയറക്ടര്, അസിസ്റ്റന്റ് പ്രൊവിന്ഷ്യല് സുപ്പീരിയര് എന്നി നിലകളില് അദ്ദേഹം സേവനം ചെയ്തു.
പാലാ വിന്സെന്ഷ്യന് മൈനര് സെമിനാരിയിലും ആലുവ വിന്സെന്ഷ്യന് വിദ്യാഭവനിലും സ്പിരിച്വല് ഡയറക്ടറായും നോവിസ് മാസ്റ്ററായും പ്രവര്ത്തിച്ചു. വിന്സെന്ഷ്യന് സഭയുടെ കോതമംഗലം, കലൂര്, വട്ടപ്പാറ ആശ്രമങ്ങളില് സുപ്പീരിയറായും അങ്കമാലി, തോട്ടകം ആശ്രമങ്ങളില് പ്രൊക്യുറേറ്ററായും സേവനമനുഷ്ഠിച്ചു.ഇടവക-മിഷന് ശുശ്രൂഷകളില് കോയമ്പത്തൂര് ഹോളി ട്രിനിറ്റി ഫൊറോനയില് അസിസ്റ്റന്റ് വികാരിയായും പാലക്കയം ഇടവകയില് വികാരിയായും സേവനം ചെയ്ത അദ്ദേഹം, ആറ്റിങ്ങല് സെന്റ് ജൂഡ് മിഷന് പള്ളി, നെടുമങ്ങാട് സെന്റ് തോമസ് മിഷന് പള്ളി, കിള്ളി സെന്റ് ജോണ് പോള് രണ്ടാമന് മിഷന് പള്ളി എന്നിവിടങ്ങളില് പ്രീസ്റ്റ്-ഇന്-ചാര്ജായും പ്രവര്ത്തിച്ചു. വചനോത്സവം മാസികയുടെ സ്ഥാപക പത്രാധിപരായിരുന്നു അദ്ദേഹം
സിറോ മലബാര് സഭ വിശുദ്ധ കുര്ബാന ടെക്സ്റ്റ് തയാറാക്കിയ കമ്മിറ്റിയില് അംഗമായിരുന്ന അദ്ദേഹം, വിശുദ്ധ കുര്ബാനയുടെ ഗാനരചനയിലും ശ്രദ്ധേയ പങ്കുവഹിച്ചു. കെസിബിസി അവാര്ഡ്, ശാലോം മീഡിയ അവാര്ഡ്, സിസിലിയന് അവാര്ഡ്, ഗുഡ്നസ് മീഡിയ അവാര്ഡ്, വിന്സെന്ഷ്യന് ജനറലൈറ്റിന്റെ ലൂമിനസ് അവാര്ഡ് തുടങ്ങി നിരവധി അംഗീകാരങ്ങള് അദ്ദേഹത്തെ തേടിയെത്തിയിട്ടുണ്ട്. അന്തീനാട് പനച്ചിക്കല് പരേതരായ ദേവസ്യ-ഏലി ദമ്പതികളുടെ മകനാണ്.
.jpg)
ഇവിടെ പോസ്റ്റു ചെയ്യുന്ന അഭിപ്രായങ്ങൾ Deily Malayali Media Publications Private Limited ന്റെതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും.
ഇന്ത്യന് സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായ അധിക്ഷേപങ്ങൾ, അപകീർത്തികരവും സ്പർദ്ധ വളർത്തുന്നതുമായ പരാമർശങ്ങൾ, അശ്ലീല-അസഭ്യപദ പ്രയോഗങ്ങൾ ഇവ ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.