കെ.സി. വേണുഗോപാൽ പാർലമെന്റിലെ പബ്ലിക് അക്കൗണ്ട്സ് കമ്മിറ്റി അധ്യക്ഷൻ

ന്യൂഡൽഹി: എഐസിസി ജനറൽ സെക്രട്ടറിയും ആലപ്പുഴ എംപിയുമായ കെ.സി. വേണുഗോപാലിനെ പാർലമെന്റിലെ പബ്ലിക് അക്കൗണ്ട്സ് കമ്മിറ്റി (പിഎസി) അധ്യക്ഷനായി വീണ്ടും നിയമിച്ചു. 2026-27 വർഷത്തേക്കുള്ള ഈ നിയമനം ലോക്‌സഭാ സ്പീക്കർ ഓം ബിർളയാണ് പ്രഖ്യാപിച്ചത്. ലോക്‌സഭയിൽ നിന്നുള്ള 15 പേരും രാജ്യസഭയിൽ നിന്നുള്ള ഏഴുപേരും ഉൾപ്പെടെ 22 അംഗങ്ങളാണ് സമിതിയിലുള്ളത്. 

ജോൺ മത്തായി, സി.എം. സ്റ്റീഫൻ, കെ.വി. തോമസ് എന്നിവർക്ക് ശേഷം ഈ നിർണ്ണായക പദവിയിലെത്തുന്ന നാലാമത്തെ മലയാളിയാണ് കെ.സി. വേണുഗോപാൽ. 1967 മുതൽ പ്രതിപക്ഷത്തിനാണ് പിഎസി അധ്യക്ഷസ്ഥാനം നൽകിവരുന്നത്.

കേരളത്തിലെ കോൺഗ്രസ് രാഷ്ട്രീയത്തിൽ മുഖ്യമന്ത്രി സ്ഥാനത്തെച്ചൊല്ലിയുള്ള ചർച്ചകൾ സജീവമാകുന്നതിനിടെയാണ് കെ.സി. വേണുഗോപാലിനെ തേടി ഈ ദേശീയ പദവി എത്തുന്നത്. 

യുഡിഎഫ് അധികാരത്തിൽ വന്നാൽ വി.ഡി. സതീശനും രമേശ് ചെന്നിത്തലയ്ക്കുമൊപ്പം കെ.സി. വേണുഗോപാലിന്റെ പേരും സജീവമായി പരിഗണിക്കണമെന്ന ആവശ്യം ഒരു വിഭാഗം നേതാക്കൾക്കിടയിലുണ്ട്. 

ഈ സാഹചര്യത്തിൽ പിഎസി അധ്യക്ഷസ്ഥാനം ലഭിച്ചത് വേണുഗോപാലിന്റെ രാഷ്ട്രീയ സ്വാധീനം ദേശീയ-സംസ്ഥാന തലങ്ങളിൽ വീണ്ടും വർദ്ധിപ്പിക്കാൻ സഹായിക്കും.