'ലക്ഷ്മി ഭണ്ഡാറിലെ' 30 ലക്ഷത്തോളം ഗുണഭോക്താക്കൾ അന്നപൂർണ ഭണ്ഡാർ' പദ്ധതിക്ക് അനർഹർ; സുവേന്ദു അധികാരി

കൊൽക്കത്ത: പശ്ചിമ ബംഗാളിൽ മുൻ മമത ബാനർജി സർക്കാരിന്റെ അഭിമാന പദ്ധതിയായിരുന്ന 'ലക്ഷ്മി ഭണ്ഡാറിലെ' 30 ലക്ഷത്തോളം ഗുണഭോക്താക്കൾ പുതിയ 'അന്നപൂർണ ഭണ്ഡാർ' പദ്ധതിക്ക് അനർഹരാണെന്ന് മുഖ്യമന്ത്രി സുവേന്ദു അധികാരി. 

ഇവർ ഒന്നുകിൽ ഇന്ത്യൻ പൗരന്മാരല്ല അല്ലെങ്കിൽ സംസ്ഥാനത്തെ വോട്ടർ പട്ടികയിൽ നിന്ന് സ്ഥിരമായി നീക്കം ചെയ്യപ്പെട്ടവരാണെന്ന് നടത്തിയ സമഗ്രമായ പരിശോധനയിൽ കണ്ടെത്തിയിട്ടുണ്ടെന്ന് അദ്ദേഹത്തെ ഉദ്ധരിച്ച് പിടിഐ റിപ്പോർട്ട് ചെയ്യുന്നു.

മരണപ്പെട്ടവർക്കും അനധികൃത നുഴഞ്ഞുകയറ്റക്കാർക്കും അർഹതയില്ലാത്ത പണം നൽകാൻ അനുവദിക്കില്ലെന്ന് മുഖ്യമന്ത്രി പറഞ്ഞു. എന്നാൽ പൗരത്വ ഭേദഗതി നിയമം വഴി അപേക്ഷ നൽകിയവർക്കും വോട്ടർ പട്ടികയിൽ പേര് ചേർക്കാൻ ട്രിബ്യൂണലുകളെ സമീപിച്ചവർക്കും ഈ ആനുകൂല്യം ലഭിക്കാൻ അർഹതയുണ്ടാകുമെന്നും അദ്ദേഹം വ്യക്തമാക്കി.

ജൂൺ ഒന്നിന് ഔദ്യോഗികമായി ആരംഭിക്കുന്ന അന്നപൂർണ ഭണ്ഡാർ പദ്ധതി, സ്ത്രീകളെ ആകർഷിക്കാൻ ബിജെപി നൽകിയ പ്രധാന തിരഞ്ഞെടുപ്പ് വാഗ്ദാനങ്ങളിൽ ഒന്നായിരുന്നു. പഴയ പദ്ധതി പ്രകാരം പൊതുവിഭാഗത്തിന് 1,500 രൂപയും എസ്‌സി/എസ്ടി വിഭാഗത്തിന് 1,700 രൂപയുമാണ് പ്രതിമാസം ലഭിച്ചിരുന്നതെങ്കിൽ, പുതിയ പദ്ധതിയിൽ ഇത് എല്ലാ സ്ത്രീകൾക്കും തുല്യമായി 3,000 രൂപയായി വർദ്ധിപ്പിച്ചിട്ടുണ്ട്. 

ഈ മാറ്റം നടപ്പിലാക്കുന്നതിന്റെ ഭാഗമായി ലക്ഷ്മി ഭണ്ഡാർ ഗുണഭോക്താക്കൾക്ക് പുതിയ പദ്ധതിയിലേക്ക് മാറാനുള്ള അപേക്ഷാ ഫോമുകൾ സർക്കാർ വിതരണം ചെയ്തു തുടങ്ങി. വോട്ടർ പട്ടികയിലെ സ്പെഷ്യൽ ഇന്റൻസീവ് റിവിഷൻ ഡാറ്റ ഉപയോഗിച്ച് മെയ് 19-നാണ് ഗുണഭോക്താക്കളുടെ ആധികാരികത പരിശോധിക്കുന്നതിനായി വിപുലമായ സർവേ ആരംഭിച്ചത്. മെയ് 25-നകം റിപ്പോർട്ട് സമർപ്പിക്കാനായിരുന്നു ഉദ്യോഗസ്ഥർക്ക് നൽകിയ നിർദ്ദേശം. ബൂത്ത് ലെവൽ ഓഫീസർമാരെ ഉപയോഗിച്ച് നടത്തിയ ഈ പരിശോധനയിൽ, വോട്ടർ പട്ടികയിൽ നിന്ന് സ്ഥിരമായി നീക്കം ചെയ്യപ്പെട്ടവരുടെ വിവരങ്ങൾ കൃത്യമായി പരിശോധിച്ചാണ് അനർഹരെ കണ്ടെത്തിയതെന്ന് വൃത്തങ്ങൾ വ്യക്തമാക്കുന്നു. 

ബംഗാളിലെ വോട്ടർ പട്ടികയിൽ നടന്ന വൻ ശുദ്ധീകരണത്തിൽ ആകെ 91 ലക്ഷത്തോളം വോട്ടർമാരെയാണ് പട്ടികയിൽ നിന്ന് നീക്കം ചെയ്തത്. ഇത് സംസ്ഥാനത്തെ ആകെ വോട്ടർമാരുടെ 12 ശതമാനത്തോളം വരും. ഇതിൽ 58 ലക്ഷം പേർ മരണപ്പെട്ടവരോ താമസം മാറിയവരോ ആണെങ്കിൽ, ബാക്കി 27 ലക്ഷം പേരെ പൗരത്വ രേഖകളിലെയും വംശാവലിയിലെയും പൊരുത്തക്കേടുകളെ തുടർന്ന് നടന്ന കർശനമായ ജുഡീഷ്യൽ അവലോകനത്തിന് ശേഷമാണ് നീക്കം ചെയ്തത്. ഇത്തരത്തിൽ വോട്ടർ പട്ടികയിൽ നിന്ന് പുറത്തായവർക്ക് തൽക്കാലം ക്ഷേമപദ്ധതികളുടെ ആനുകൂല്യം നൽകില്ലെന്നാണ് സർക്കാർ നിലപാട്. 15 വർഷം നീണ്ടുനിന്ന തൃണമൂൽ കോൺഗ്രസ് ഭരണത്തിന് അന്ത്യം കുറിച്ച് മെയ് 4-നാണ് 294-ൽ 208 സീറ്റുകൾ നേടി ബിജെപി ബംഗാളിൽ അധികാരത്തിലെത്തിയത്. മെയ് 10-ന് സർക്കാർ ചുമതലയേറ്റതിന് പിന്നാലെ ക്ഷേമപദ്ധതികളിലെ ഗുണഭോക്താക്കളുടെ പട്ടികയിൽ നിന്ന് അനർഹരെ നീക്കം ചെയ്യാനുള്ള നടപടികൾ വേഗത്തിലാക്കി. നിലവിൽ 2.21 കോടി സ്ത്രീകൾ ലക്ഷ്മി ഭണ്ഡാർ പദ്ധതിയുടെ ആനുകൂല്യം കൈപ്പറ്റുന്നുണ്ടെങ്കിലും, അന്നപൂർണ യോജന വഴി യഥാർത്ഥ ഗുണഭോക്താക്കൾക്ക് മാത്രം സഹായം ഉറപ്പാക്കാനാണ് പുതിയ സർക്കാരിന്റെ നീക്കം.