കൗണ്‍സിലിങ് മുറിയിൽ കൊടും ക്രൂരത; 69കാരനായ സൈക്കോളജിസ്റ്റ് അറസ്റ്റില്‍,

കൊല്ലം: കൗണ്‍സിലിങ്ങിനിടെ പ്രായപൂർത്തിയാകാത്ത പെണ്‍കുട്ടിയ്ക്ക് നേരെ സൈക്കോളജിസ്റ്റിന്റെ ലൈംഗിക ആക്രമണം. കൊല്ലം മയ്യനാട് സ്വദേശി 69 കാരനായ സന്തോഷ് സുകുമാരനാണ് കുട്ടിയെ ലൈംഗികമായി പീഡിപ്പിച്ചത്.

വീട്ടുകാരുടെ പരാതിയില്‍ ഇയാളെ വർക്കല പൊലീസ് അറസ്റ്റ് ചെയ്തു. ഏഴാം ക്ലാസ് മുതല്‍ കുട്ടി അമ്മയോടൊപ്പം സന്തോഷ് സുകുമാരന്റെ അടുത്ത് ആശുപത്രിയില്‍ കൗണ്‍സിലിങ്ങിന് എത്തിയിരുന്നു. അമ്മയെ പുറത്തു നിർത്തിയ ശേഷം കുട്ടിയെ മാത്രം മുറിക്കുള്ളില്‍ പ്രവേശിപ്പിച്ച്‌ കൗണ്‍സിലിങ് എന്ന വ്യാജേനയായിരുന്നു പീഡനം. കുട്ടിയുടെ നഗ്ന ദൃശ്യങ്ങളും ഇയാള്‍ മൊബൈല്‍ ഫോണില്‍ പകർത്തിയിരുന്നു.

പത്താം ക്ലാസില്‍ പഠിക്കുന്ന സമയത്താണ് കൗണ്‍സിലിങ്ങിന് എത്തിയപ്പോള്‍ നഗ്നചിത്രങ്ങള്‍ പകർത്തിയത്. കുട്ടിയുടെ സ്വഭാവ രീതികളിലുണ്ടായ മാറ്റങ്ങളാണ് വീട്ടുകാരില്‍ സംശയമുണർത്തിയത്. രക്ഷിതാക്കള്‍ കുട്ടിയുമായി മറ്റൊരു സൈക്കോളജിസ്റ്റിനെ സമീപിച്ചതോടെ ഞെട്ടിപ്പിക്കുന്ന പീഡന വിവരം പുറത്തുവന്നു.

തുടർന്നാണ് രക്ഷിതാക്കള്‍ വർക്കല പൊലീസില്‍ പരാതി നല്‍കിയത്. കുട്ടിയുടെ മൊഴി രേഖപ്പെടുത്തി പൊലീസ് അന്വേഷണം ആരംഭിച്ചതോടെ പ്രതി ഒളിവില്‍ പോവുകയായിരുന്നു. പൊലീസ് നടത്തിയ തെരച്ചിലിനൊടുവിലാണ് ഒളിവിലായിരുന്ന പ്രതിയെ അറസ്റ്റ് ചെയ്തത്.