ജനങ്ങളാണ് ഹൈക്കമാൻഡ് എന്ന് തെളിയിച്ച ഏക നേതാവ്':'ഞങ്ങക്കീ മുഖ്യൻ മതി, വി ഡി സതീശന് അഭിനന്ദനവുമായി മലയാള താരലോകം

തിരുവനന്തപുരം: പത്ത് ദിവസം നീണ്ടുനിന്ന അഭ്യൂഹങ്ങള്‍ക്കും സസ്പെൻസുകള്‍ക്കും ഒടുവില്‍ കേരള മുഖ്യമന്ത്രിയെ തീരുമാനിച്ചിരിക്കുകയാണ്. കഴിഞ്ഞ അഞ്ച് വർഷം പ്രതിപക്ഷ നേതാവായിരുന്ന വിഡി സതീശൻ ആണ് കേരളത്തിന്റെ പുതിയ മുഖ്യമന്ത്രി.

വിഡി തന്നെ മുഖ്യമന്ത്രി ആകണമെന്ന് പൊതുവികാരം ഉണ്ടായിരുന്നുവെങ്കിലും കെസി വേണുഗോപാല്‍, രമേശ് ചെന്നിത്തല എന്നിവരുടെ പേരുകള്‍ കൂടി ഉയർന്ന് വന്നതോടെ തീരുമാനത്തില്‍ അനിശ്ചിതത്വം നേരിടുകയായിരുന്നു. ഒടുവില്‍ നിയൂക്ത മുഖ്യമന്ത്രിയായി വിഡി സതീശൻ നിയമതിനായതോടെ സന്തോഷം പ്രകടിപ്പിച്ചും ആശംകള്‍ അറിയിച്ചും സിനിമാ ലോകവും മുന്നില്‍ തന്നെയുണ്ട്.

കേരളത്തിന്റെ പതിമൂന്നാം മുഖ്യമന്ത്രിയായി നിയോഗിക്കപ്പെട്ട ശ്രീ വി ഡി സതീശന് ഹൃദയം നിറഞ്ഞ ആശംസകള്‍', എന്നാണ് മമ്മൂട്ടി കുറിച്ചത്. 'ഇതാണ് ഞങ്ങ പറഞ്ഞ മുഖ്യൻ. തല്‍ക്കാലം ഞങ്ങക്കീ മുഖ്യൻ മതി..!! വേറാരും വേണ്ട..!! അത് പോലെ ലളിതമാണ്', എന്നായിരുന്നു സംവിധായകൻ മിഥുൻ മാനുവല്‍ തോമസിന്റെ പ്രതികരണം.

നിയുക്ത കേരള മുഖ്യമന്ത്രി ശ്രീ വി ഡി സതീശന്‌ സ്നേഹം നിറഞ്ഞ ആശംസകള്‍. വികസനത്തിന്‍റെ പുതിയ പാതയിലേക്ക് നാടിനെ നയിക്കാന്‍ അദ്ദേഹത്തിന്‍റെ നേതൃത്വത്തിന്‌ സാധിക്കട്ടെ', എന്നാണ് മോഹന്‍ലാല്‍ കുറിച്ചത്.

കേരളത്തിൻ്റെ നിയുക്ത മുഖ്യമന്ത്രി. ആദരണീയനായ ശ്രീ വി ഡി സതീശന് അഭിവാദ്യങ്ങള്‍', എന്ന് ലിസ്റ്റിൻ സ്റ്റീഫനും കുറിച്ചു. ജനങ്ങള്‍ക്ക് വേണ്ടി,ജനങ്ങളാല്‍ തെരഞ്ഞെടുക്കപ്പെട്ട മുഖ്യമന്ത്രിയാണ് വിഡി സതീശൻ എന്നാണ് നടൻ ആന്റണി വർഗീസ് പറഞ്ഞത്. 'കാവ്യാനീതി. നിയുക്ത കേരള മുഖ്യമന്ത്രിക്ക് അഭിവാദ്യങ്ങള്‍', എന്ന് നടൻ കിഷോർ സത്യ സോഷ്യല്‍ മീഡിയയില്‍ കുറിച്ചു.

ജനങ്ങള്‍ക്ക് വേണ്ടി ജനങ്ങളാല്‍', എന്നാണ് നടനും എംഎല്‍എയുമായ രമേശ് പിഷാരടി ആശംസ അറിയിച്ച്‌ കുറിച്ചത്. ജനനായകന് അഭിവാദ്യങ്ങള്‍ എന്നാണ് നടൻ സിദ്ദിഖിന്റെ വാക്കുകള്‍. വി ഡി സതീശനെ മുഖ്യമന്ത്രി ആക്കണമെന്ന് മലയാള സിനിമയില്‍ നിന്നും ആദ്യം ആവശ്യപ്പെട്ടവരില്‍ ഒരാള് കൂടിയാണ് സിദ്ദിഖ്. 'ജനങ്ങളാണ് ഹൈക്കമാൻഡ് എന്ന് തെളിയിച്ച ഏക നേതാവ്', എന്നായിരുന്നു ധർമജൻ ബോള്‍ഗാട്ടിയുടെ ആശംസ.

'ഈ സുപ്രധാന തിരഞ്ഞെടുപ്പ് വിജയത്തില്‍ കോണ്‍ഗ്രസ് പാർട്ടിക്ക് ഹൃദയം നിറഞ്ഞ അഭിനന്ദനങ്ങള്‍. പുതുതായി തിരഞ്ഞെടുക്കപ്പെട്ട കേരള മുഖ്യമന്ത്രിക്ക് ആശംസകള്‍ നേരുകയാണ്. നമ്മുടെ സംസ്ഥാനത്തിന് നേതൃത്വത്തിൻ്റെ ഈ പുതിയ അധ്യായം ആരംഭിക്കുമ്പോള്‍, ഐക്യം, പ്രതിരോധം, പുരോഗതി എന്നിവയിലൂടെ കേരളം എന്നും തലയുയർത്തി നില്‍ക്കട്ടെ. 

ഈ പുതിയ തുടക്കം ലോകമെമ്പാടുമുള്ള ഓരോ മലയാളിക്കും പ്രതീക്ഷയും വികാസവും ആത്മവിശ്വാസവും നല്‍കട്ടെ', എന്ന് നടൻ ഉണ്ണി മുകുന്ദൻ സോഷ്യല്‍ മീഡിയയില്‍ കുറിച്ചു.

'ഒരു പുതിയ കേരളത്തിനായുള്ള യാത്രയ്ക്ക് എല്ലാ ആശംസകളും. മുഖ്യമന്ത്രി വി ഡി സതീശൻ സാറിന് സ്നേഹപൂർവ്വം അഭിനന്ദനങ്ങള്‍', എന്ന് നിവിന്‍ പോളിയും പറയുന്നു. 'കേരളത്തിൻറെ പുതിയ മുഖ്യമന്ത്രിയായി അരങ്ങേറാൻ പോകുന്ന ശ്രി വിഡി സതീശന് ഹൃദയം നിറഞ്ഞ അഭിനന്ദനങ്ങള്‍. കേരളത്തിന് ഏറ്റവും നല്ല ഒരു ഭരണം കാഴ്ചവയ്ക്കാൻ അദ്ദേഹത്തിനും, ടീം യുഡിഎഫിനും സാധിക്കട്ടെ എന്നും ആശംസിക്കുന്നു', എന്നാണ് മനോജ് കെ ജയന്‍ കുറിച്ചത്.