ഇന്ത്യയുടെ ആണവോർജ്ജ ചരിത്രത്തിലെ സുവർണ്ണ അധ്യായം; കൽപ്പാക്കത്ത് പ്രോട്ടോടൈപ്പ് ഫാസ്റ്റ് ബ്രീഡർ റിയാക്ടർ പ്രവർത്തനം ആരംഭിച്ചു

ഇന്ത്യയുടെ ആണവോർജ്ജ ചരിത്രത്തിലെ സുവർണ്ണ അധ്യായമായി തമിഴ്‌നാട്ടിലെ കൽപ്പാക്കത്തുള്ള പ്രോട്ടോടൈപ്പ് ഫാസ്റ്റ് ബ്രീഡർ റിയാക്ടർ പ്രവർത്തനം ആരംഭിച്ചു. ആണവ വിഘടന പ്രക്രിയ സുസ്ഥിരമായി നിലനിർത്തുന്ന ‘ക്രിട്ടിക്കാലിറ്റി’ എന്ന സുപ്രധാന ഘട്ടം പിന്നിട്ടതോടെ, ഡോ. ഹോമി ജെ. ഭാഭ വിഭാവനം ചെയ്ത ഇന്ത്യയുടെ മൂന്ന് ഘട്ട ആണവ പദ്ധതിയുടെ രണ്ടാം ഘട്ടത്തിലേക്ക് രാജ്യം ഔദ്യോഗികമായി പ്രവേശിച്ചു. 

യുറേനിയത്തിന്റെ പരിമിതമായ ഉപയോഗത്തിലൂടെയും തോറിയത്തിന്റെ വിപുലമായ ശേഖരം പ്രയോജനപ്പെടുത്തിയും ഊർജ്ജ സ്വതന്ത്രമായ ഭാരതം കെട്ടിപ്പടുക്കാനുള്ള യാത്രയിലെ ഏറ്റവും നിർണ്ണായകമായ നാഴികക്കല്ലാണ് ഈ നേട്ടം.

ഇന്ത്യയുടെ തദ്ദേശീയ സാങ്കേതിക വിദ്യയിൽ വികസിപ്പിച്ചെടുത്ത ഈ റിയാക്ടർ ലോകത്തിലെ തന്നെ അപൂർവ്വമായ ഒന്നാണ്. റഷ്യയ്ക്ക് ശേഷം വാണിജ്യാടിസ്ഥാനത്തിലുള്ള ഫാസ്റ്റ് ബ്രീഡർ റിയാക്ടർ പ്രവർത്തിപ്പിക്കുന്ന രണ്ടാമത്തെ രാജ്യമെന്ന ഖ്യാതി ഇതോടെ ഇന്ത്യ സ്വന്തമാക്കി.

ദ്രാവക സോഡിയം ശീതീകരണിയായി ഉപയോഗിക്കുന്ന ഈ പ്ലാന്റിൽ, റിയാക്ടറിന് ആവശ്യമായ ഇന്ധനത്തേക്കാൾ കൂടുതൽ ഇന്ധനം ഉത്പാദിപ്പിക്കപ്പെടുന്നു എന്ന സവിശേഷതയുമുണ്ട്. ഇതുകൊണ്ടാണ് ഈ സാങ്കേതികവിദ്യയെ ‘ഊർജ്ജത്തിന്റെ അക്ഷയപാത്രം’ എന്ന് ശാസ്ത്രലോകം വിശേഷിപ്പിക്കുന്നത്. ഉയർന്ന താപനിലയിൽ സോഡിയം കൈകാര്യം ചെയ്യുന്നതിലെ വെല്ലുവിളികളും സാങ്കേതിക തടസ്സങ്ങളും രണ്ട് പതിറ്റാണ്ടിലേറെ നീണ്ട ഗവേഷണങ്ങളിലൂടെയും പരീക്ഷണങ്ങളിലൂടെയുമാണ് ഇന്ത്യൻ ശാസ്ത്രജ്ഞർ മറികടന്നത്.

ആദ്യ ഘട്ടം വിജയകരമായതോടെ, വരും മാസങ്ങളിൽ ക്രമേണ വൈദ്യുതി ഉൽപ്പാദനം വർദ്ധിപ്പിക്കാനാണ് ശാസ്ത്രജ്ഞരുടെ തീരുമാനം. ആറ് മുതൽ എട്ട് മാസത്തിനുള്ളിൽ പൂർണ്ണതോതിൽ വാണിജ്യ വൈദ്യുതി ഉൽപ്പാദനം ആരംഭിക്കുമെന്ന് ഐജിസിഎആർ ഡയറക്ടർ ഡോ. ശ്രീകുമാർ ജി. പിള്ള വ്യക്തമാക്കി. 2070-ഓടെ രാജ്യം ലക്ഷ്യമിടുന്ന ‘നെറ്റ് സീറോ’ കാർബൺ വികിരണ നേട്ടത്തിലേക്കുള്ള വലിയൊരു ചുവടുവെപ്പാണിത്. കൽപ്പാക്കത്ത് തന്നെ വരാനിരിക്കുന്ന FBR-1, FBR-2 റിയാക്ടറുകൾക്ക് ഈ വിജയം വലിയ കരുത്തേകും. അടുത്ത നൂറ്റാണ്ടുകളിൽ ഇന്ത്യയുടെ ഊർജ്ജ സുരക്ഷ ഉറപ്പാക്കുന്നതിനും വിദേശ രാജ്യങ്ങളെ ആശ്രയിക്കാതെ തന്നെ മുന്നേറുന്നതിനും ഈ ‘ബ്രീഡർ’ സാങ്കേതികവിദ്യ കരുത്തുപകരും.