തെക്കൻ ലെബനണിൽ ആക്രമണം അവസാനിപ്പിക്കണമെന്ന നിർദ്ദേശം ഇസ്രയേൽ തള്ളി;നിർണ്ണായകമായ വെടിനിർത്തൽ നീക്കങ്ങൾ പ്രതിസന്ധിയിലേക്ക്

പശ്ചിമേഷ്യൻ സംഘർഷങ്ങളിൽ നിർണ്ണായകമായ വെടിനിർത്തൽ നീക്കങ്ങൾ പ്രതിസന്ധിയിലേക്ക്. തെക്കൻ ലെബനണിൽ ആക്രമണം അവസാനിപ്പിക്കണമെന്ന നിർദ്ദേശം ഇസ്രയേൽ തള്ളിയതോടെ മേഖല വീണ്ടും യുദ്ധഭീതിയിലാണ്. എന്നാൽ സമാധാനത്തിന്റെ വാതിൽ പൂർണ്ണമായും അടയ്ക്കാതെ, വരും ദിവസങ്ങളിൽ കൂടുതൽ ചർച്ചകൾ നടത്താൻ ഇരുരാജ്യങ്ങളും സമ്മതിച്ചതായി അമേരിക്കൻ സ്റ്റേറ്റ് ഡിപ്പാർട്ട്‌മെന്റ് വ്യക്തമാക്കി.

അതേസമയം, ഇറാനുമായുള്ള ബന്ധം കൂടുതൽ വഷളാകാതിരിക്കാൻ വൈസ് പ്രസിഡന്റ് ജെ.ഡി. വാൻസിന്റെ നേതൃത്വത്തിൽ രണ്ടാംവട്ട ചർച്ചകൾക്ക് കളമൊരുങ്ങുകയാണ്. രണ്ട് ദിവസത്തിനകം ചർച്ച നടക്കുമെന്ന് പ്രസിഡന്റ് ഡോണൾഡ് ട്രംപ് അറിയിച്ചിട്ടുണ്ടെങ്കിലും നിബന്ധനകളുടെ കാര്യത്തിൽ ഇരുരാജ്യങ്ങളും വിരുദ്ധ ധ്രുവങ്ങളിലാണ്.

യുറേനിയം സമ്പുഷ്ടീകരണത്തിന്റെ കാലപരിധി സംബന്ധിച്ച തർക്കമാണ് ചർച്ചകളെ കുഴപ്പിക്കുന്നത്. അഞ്ചു വർഷത്തെ സാവകാശം ഇറാൻ ആവശ്യപ്പെടുമ്പോൾ, 20 വർഷത്തേക്ക് നിയന്ത്രണം വേണമെന്ന കടുത്ത നിലപാടിലാണ് അമേരിക്ക. ഹോർമുസ് കടലിടുക്കിലെ ഉപരോധം നീക്കണമെന്നും യുറേനിയം പ്ലാന്റുകൾ നശിപ്പിക്കണമെന്നും അമേരിക്കൻ ഭരണകൂടം കർശന നിർദ്ദേശം നൽകിയിട്ടുണ്ട്.

അമേരിക്കയുടെ കരുത്തുറ്റ നിലപാടിനെത്തുടർന്ന് ഹോർമുസ് വഴിയുള്ള കപ്പൽ ഗതാഗതം പൂർണ്ണമായും നിലച്ചതായാണ് റിപ്പോർട്ടുകൾ. ആറ് ചരക്കുകപ്പലുകൾ ഇറാനിയൻ തുറമുഖങ്ങളിൽ നിന്ന് മടങ്ങിയതായി യുഎസ് സെൻട്രൽ കമാൻഡ് അറിയിച്ചു. വരും ദിവസങ്ങളിലെ ചർച്ചകൾ ആഗോള സാമ്പത്തിക ക്രമത്തെയും എണ്ണ വിപണിയെയും സംബന്ധിച്ചിടത്തോളം അതീവ നിർണ്ണായകമാണ്.