കടുത്ത ഉഷ്ണതരംഗം ഇന്ന് കൂടി മാത്രം; ചുട്ടുപൊള്ളുന്ന വേനലിൽ നിന്ന് ആശ്വാസമായി തിങ്കളാഴ്ച മുതൽ സംസ്ഥാനത്ത് മഴ;

കേരളത്തിൽ ഇന്നും കടുത്ത ഉഷ്ണതരംഗത്തിന് സമാനമായ സാഹചര്യം തുടരും. എന്നാൽ ചുട്ടുപൊള്ളുന്ന വേനലിൽ നിന്ന് ആശ്വാസമായി തിങ്കളാഴ്ച മുതൽ സംസ്ഥാനത്ത് മഴ സജീവമാകുമെന്ന് കാലാവസ്ഥാ നിരീക്ഷണ കേന്ദ്രം അറിയിച്ചു. 

ഏപ്രിൽ 29-ന് പത്തനംതിട്ട, ഇടുക്കി, കണ്ണൂർ, കാസർകോട് ജില്ലകളിൽ കനത്ത മഴ പെയ്യാൻ സാധ്യതയുള്ളതിനാൽ മഞ്ഞ ജാഗ്രത പുറപ്പെടുവിച്ചു.

പാലക്കാടും പുനലൂരും ഇന്നലെ 39.8 ഡിഗ്രി ചൂട് രേഖപ്പെടുത്തി. പുനലൂരിൽ സാധാരണയേക്കാൾ 5 ഡിഗ്രിയും പാലക്കാട് 3.5 ഡിഗ്രിയും അധികമാണിത്. കോട്ടയത്ത് താപനില 38.3 ഡിഗ്രിയായി ഉയർന്നു.

ഇന്ന്പാലക്കാട് 40 ഡിഗ്രി വരെയും കൊല്ലത്ത് 39 ഡിഗ്രി വരെയും താപനില ഉയരാൻ സാധ്യതയുണ്ട്. 

കേരളത്തിൽ കടുത്ത ചൂടിന് കാരണമായ പ്രതിചക്രവാതച്ചുഴി നിലവിൽ മഹാരാഷ്ട്രയ്ക്ക് മുകളിലേക്ക് മാറിയിട്ടുണ്ട്.