അൾട്രാവയലറ്റ് വികിരണത്തിന്റെ തോത് ആശങ്കാജനകമായ രീതിയിൽ ഉയരുന്നു; സംസ്ഥാനത്തെ ആറ് പ്രധാന മേഖലകളിൽ ഓറഞ്ച് അലർട്ട്

തിരുവനന്തപുരം: ഏറ്റവും പുതിയ റിപ്പോർട്ടുകൾ പ്രകാരം കേരളത്തിൽ അൾട്രാവയലറ്റ് വികിരണത്തിന്റെ തോത് ആശങ്കാജനകമായ രീതിയിൽ ഉയരുകയാണ്. കഴിഞ്ഞ 24 മണിക്കൂറിനിടെ രേഖപ്പെടുത്തിയ ഉയർന്ന വികിരണ സൂചികയുടെ അടിസ്ഥാനത്തിൽ സംസ്ഥാനത്തെ ആറ് പ്രധാന മേഖലകളിൽ ഓറഞ്ച് അലർട്ട് പ്രഖ്യാപിച്ചു. കോന്നി, ചെങ്ങന്നൂർ, ചങ്ങനാശേരി, ഒല്ലൂർ, തൃത്താല, പൊന്നാനി എന്നീ പ്രദേശങ്ങളിലാണ് അതീവ ജാഗ്രതാ നിർദ്ദേശം നൽകിയിരിക്കുന്നത്. 

അൾട്രാവയലറ്റ് സൂചിക 8 മുതൽ 10 വരെ രേഖപ്പെടുത്തുന്ന സാഹചര്യത്തിലാണ് ഓറഞ്ച് അലർട്ട് പുറപ്പെടുവിക്കുന്നത്. ഇതിനുപുറമെ ബേപ്പൂർ, മാനന്തവാടി, ധർമ്മടം, മൂന്നാർ തുടങ്ങി ഏഴിടങ്ങളിൽ ജാഗ്രത സൂചിപ്പിക്കുന്ന യെല്ലോ അലർട്ടും നിലവിലുണ്ട്.

തുടർച്ചയായി അൾട്രാവയലറ്റ് രശ്മികൾ ശരീരത്തിൽ ഏൽക്കുന്നത് സൂര്യാതപം, ഗുരുതരമായ ചർമ്മരോഗങ്ങൾ, നേത്രരോഗങ്ങൾ എന്നിവയ്ക്ക് കാരണമാകുമെന്ന് ആരോഗ്യ വിദഗ്ധർ മുന്നറിയിപ്പ് നൽകുന്നു.

വികിരണ തോത് ഏറ്റവും കൂടുതലായി കാണപ്പെടുന്ന പകൽ 10 മണി മുതൽ 3 മണി വരെയുള്ള സമയങ്ങളിൽ നേരിട്ട് വെയിൽ ഏൽക്കുന്നത് പരമാവധി ഒഴിവാക്കണമെന്ന് സംസ്ഥാന ദുരന്തനിവാരണ അതോറിറ്റി നിർദ്ദേശിച്ചു. പുറംജോലികളിൽ ഏർപ്പെടുന്നവർ, മത്സ്യത്തൊഴിലാളികൾ, ബൈക്ക് യാത്രക്കാർ എന്നിവർ പ്രത്യേക മുൻകരുതലുകൾ സ്വീകരിക്കേണ്ടത് അത്യാവശ്യമാണ്.

പുറത്തിറങ്ങുന്നവർ കുട, തൊപ്പി, സൺഗ്ലാസ് എന്നിവ ഉപയോഗിക്കണമെന്നും ശരീരം മുഴുവൻ മറയുന്ന വിധത്തിലുള്ള കോട്ടൺ വസ്ത്രങ്ങൾ ധരിക്കുന്നത് ഉചിതമായിരിക്കുമെന്നും അധികൃതർ അറിയിച്ചു. ആകാശം തെളിഞ്ഞു നിൽക്കുന്ന സമയത്തും ഉയർന്ന വികിരണ സാധ്യതയുള്ളതിനാൽ തണലുകളിൽ വിശ്രമിക്കാനും ആരോഗ്യകാര്യത്തിൽ ശ്രദ്ധ പുലർത്താനും നിർദ്ദേശമുണ്ട്. ജലാശയങ്ങൾക്കും മണൽ നിറഞ്ഞ പ്രദേശങ്ങൾക്കും സമീപം വികിരണങ്ങൾ പ്രതിഫലിക്കാൻ സാധ്യതയുള്ളതിനാൽ ഇത്തരം മേഖലകളിലുള്ളവർ കൂടുതൽ ജാഗ്രത പാലിക്കേണ്ടതുണ്ട്.