ചോല വെട്ടുന്നതിനിടെ മരത്തില്‍ നിന്ന് വീണ് അപകടം:; ആശുപത്രിയില്‍ ചികിത്സയില്‍ കഴിഞ്ഞ യുവാവ് മരിച്ചു

സുല്‍ത്താന്‍ബത്തേരി: മരത്തില്‍ നിന്നും വീണ് പരിക്കേറ്റ് ചികിത്സയിലിരുന്ന കര്‍ഷകന്‍ മരിച്ചു. അമ്പലവയലിനടുത്ത ചുള്ളിയോട് സ്വദേശി മുക്കിലാല്‍ സജി (45) ആണ് മരിച്ചത്.

ഇക്കഴിഞ്ഞ ചൊവ്വാഴ്ച രാവിലെ പറമ്പില്‍ മരച്ചില്ലകള്‍ വെട്ടിമാറ്റുന്നതിനിടെ അബദ്ധത്തില്‍ മരത്തില്‍ നിന്ന് താഴെ വീഴുകയായിരുന്നു. ഗുരുതരമായി പരിക്കേറ്റ സജിയെ അയല്‍വാസികള്‍ ചേര്‍ന്ന് ആദ്യം വയനാട്ടിലെ ആശുപത്രിയിലും പിന്നീട് കോഴിക്കോട് മെഡിക്കല്‍ കോളേജ് ആശുപത്രിയിലും എത്തിക്കുകയായിരുന്നു.

ഇവിടെ ചികിത്സയിലിരിക്കെയായിരുന്നു ഇന്നലെ വൈകിട്ട്  മരിച്ചത്. സംസ്‌കാരം ഇന്ന് രാവിലെ പത്ത് മണിക്ക് അമ്പലവയല്‍സെന്റ് ജോര്‍ജ് പള്ളി സെമിത്തേരിയില്‍ നടക്കും.