ക്യാൻസർ രോഗിയെന്നും ഭിന്നശേഷിക്കാരനെന്നും വ്യാജപ്രചാരണം; വിശ്വാസികളെ വഞ്ചിച്ച തട്ടിപ്പുകാരൻ കുണ്ടറയിൽ പിടിയിൽ

 കൊല്ലം: മാരകമായ ക്യാൻസർ ബാധിതനാണെന്നും ശാരീരിക വൈകല്യമുണ്ടെന്നും നടിച്ചു വിശ്വാസികളെ കബളിപ്പിച്ചു പതിനായിരങ്ങൾ തട്ടിയെടുത്ത യുവാവ് പിടിയിൽ. തിരുവനന്തപുരം പൂവച്ചൽ ബിസ്മില്ലാ ഹൗസിൽ മുജീബ് ആണ് കുണ്ടറ പോലീസിന്റെ പിടിയിലായത്. ഇളമ്പള്ളൂർ മുസ്ലിം ജമാഅത്ത് പള്ളിയിൽ വെച്ചായിരുന്നു സിനിമാക്കഥകളെ വെല്ലുന്ന ഇയാളുടെ തട്ടിപ്പ് നാടകത്തിന് അന്ത്യമായത്.

തട്ടിപ്പിന്റെ രീതി: പ്ലാസ്റ്റിക് കാലും വ്യാജ ട്യൂബും

നിസ്കാരത്തിനെത്തിയ വിശ്വാസികളുടെ സഹതാപം പിടിച്ചുപറ്റാൻ അതീവ തന്ത്രപരമായ നീക്കങ്ങളാണ് ഇയാൾ നടത്തിയത്. ആരോഗ്യവാനായ സ്വന്തം കാലിൽ പ്ലാസ്റ്റിക് കാൽ ഘടിപ്പിച്ച് ഭിന്നശേഷിക്കാരനായി അഭിനയിച്ച ഇയാൾ, ക്യാൻസർ രോഗിയാണെന്ന് തോന്നിപ്പിക്കാൻ വായിൽ നിന്ന് നെഞ്ചിലേക്ക് ട്യൂബ് ഒട്ടിച്ചു വെച്ചും ചികിത്സാ നാടകം തുടർന്നു. 'ക്യാൻസർ പേഷ്യന്റായ എന്നെ സഹായിക്കണം' എന്ന ബോർഡിനൊപ്പം ഗൂഗിൾ പേ ക്യുആർ കോഡും നെഞ്ചിൽ തൂക്കി ആധുനിക രീതിയിലുള്ള ഡിജിറ്റൽ ഭിക്ഷാടനമാണ് ഇയാൾ നടത്തിവന്നത്.

പിടിക്കപ്പെട്ടത് ഇങ്ങനെ

നിസ്കാരം കഴിഞ്ഞ് വിശ്വാസികൾ മടങ്ങിയതോടെ, അതുവരെ മുടന്തി നടന്ന മുജീബ് സാധാരണ നിലയിൽ നടന്നു പോകുന്നത് പള്ളിയിലെ ഉസ്താദിന്റെ ശ്രദ്ധയിൽപ്പെട്ടു. ട്യൂബ് അഴിഞ്ഞു കിടക്കുന്നതും കണ്ടതോടെ സംശയം തോന്നി ഭാരവാഹികളെയും പോലീസിനെയും വിവരമറിയിക്കുകയായിരുന്നു.

ഞെട്ടിക്കുന്ന വെളിപ്പെടുത്തലുകൾ

പോലീസ് നടത്തിയ പരിശോധനയിൽ ഇയാൾക്ക് യാതൊരു വിധത്തിലുള്ള ആരോഗ്യപ്രശ്നങ്ങളുമില്ലെന്ന് വ്യക്തമായി. പരിശോധനയിൽ കണ്ടെത്തിയ വിവരങ്ങൾ ഇവയാണ്:പത്തു വർഷത്തിലേറെയായി തുടരുന്ന ഈ തട്ടിപ്പിലൂടെ ലക്ഷക്കണക്കിന് രൂപയാണ് പ്രതി സമ്പാദിച്ചത്. പിടിയിലാകുമ്പോൾ ഇയാളുടെ കൈവശം പതിനായിരത്തിലധികം രൂപയും ഗൂഗിൾ പേ അക്കൗണ്ടിൽ പന്തീരായിരത്തോളം രൂപയുമുണ്ടായിരുന്നു. കാരുണ്യവാനായ ഒരു വിശ്വാസി ഇയാൾക്ക് ഒറ്റത്തവണയായി രണ്ടായിരം രൂപ വരെ നൽകിയതായും പോലീസ് കണ്ടെത്തി. ഈ വ്യാജ ഭിക്ഷാടനത്തിലൂടെ സ്വന്തമായി വീടും കാറും വിലകൂടിയ ആൻഡ്രോയിഡ് ഫോണുകളും ഉൾപ്പെടെയുള്ള ആഡംബര ജീവിതമാണ് ഇയാൾ നയിച്ചിരുന്നത്.പൊതുജനങ്ങളെ മാത്രമല്ല, സർക്കാർ ഉദ്യോഗസ്ഥരെ പോലും ഇയാൾ സമർത്ഥമായി കബളിപ്പിച്ചിരുന്നു. രണ്ടു ദിവസം മുൻപ് മോട്ടോർ വാഹന വകുപ്പിന്റെ പരിശോധനയിൽ കുടുങ്ങിയപ്പോൾ രോഗിയാണെന്ന് അഭിനയിച്ച് ഇയാൾ രക്ഷപെടുകയായിരുന്നു. പ്രതിയുടെ അവസ്ഥ കണ്ട് സഹതാപം തോന്നിയ ഉദ്യോഗസ്ഥർ പിരിവിട്ട് ഇയാൾക്ക് പുതിയൊരു ഹെൽമറ്റ് വാങ്ങി നൽകിയതായും മൊഴിയിലുണ്ട്.