ബുഷെഹർ ആണവനിലയത്തിന് സമീപം നടന്ന സൈനിക ആക്രമണങ്ങളിൽ ആശങ്ക രേഖപ്പെടുത്തി അന്താരാഷ്ട്ര ആണവോർജ്ജ ഏജൻസി; വലിയൊരു റേഡിയോളജിക്കൽ ദുരന്തത്തിന് കാരണമാകുമെന്ന് മുന്നറിയിപ്പ്

ഇറാൻ: ബുഷെഹർ ആണവനിലയത്തിന് സമീപം നടന്ന സൈനിക ആക്രമണങ്ങളിൽ അന്താരാഷ്ട്ര ആണവോർജ്ജ ഏജൻസി ഡയറക്ടർ ജനറൽ റാഫേൽ ഗ്രോസി അതീവ ആശങ്ക രേഖപ്പെടുത്തി. നിലവിൽ പ്രവർത്തനസജ്ജമായ ഈ നിലയത്തിൽ വലിയ അളവിൽ ആണവ വസ്തുക്കൾ സൂക്ഷിച്ചിട്ടുണ്ടെന്നും ഇതിനുണ്ടാകുന്ന നേരിയ ആഘാതം പോലും ഗുരുതരമായ പ്രത്യാഘാതങ്ങൾ ഉണ്ടാക്കുമെന്നും അദ്ദേഹം മുന്നറിയിപ്പ് നൽകി.

ബുഷെഹർ നിലയത്തിന് കേടുപാടുകൾ സംഭവിച്ചാൽ അത് ഇറാനെ മാത്രമല്ല, അതിനപ്പുറമുള്ള വിശാലമായ പ്രദേശങ്ങളെയും ബാധിക്കുന്ന വലിയൊരു റേഡിയോളജിക്കൽ ദുരന്തത്തിന് കാരണമാകുമെന്ന് ഐഎഇഎ പുറത്തിറക്കിയ പ്രസ്താവനയിൽ ഗ്രോസി വ്യക്തമാക്കി. ഒരു ആണവ അപകടത്തിന്റെ സാധ്യത ഒഴിവാക്കാൻ ബന്ധപ്പെട്ട കക്ഷികളെല്ലാം പരമാവധി സംയമനം പാലിക്കണമെന്ന് അദ്ദേഹം വീണ്ടും ആവശ്യപ്പെട്ടു. 

ആണവനിലയങ്ങൾ ലക്ഷ്യമിട്ടുള്ള നീക്കങ്ങൾ അന്താരാഷ്ട്ര തലത്തിൽ വലിയ ഭീഷണിയാണ് ഉയർത്തുന്നത്.

യുദ്ധസമയത്തോ സംഘർഷ സാഹചര്യങ്ങളിലോ ആണവ സുരക്ഷ ഉറപ്പാക്കുന്നതിനായി ഐഎഇഎ മുന്നോട്ടുവെച്ചിട്ടുള്ള 7 സുപ്രധാന കാര്യങ്ങൾ കർശനമായി പാലിക്കണമെന്ന് ഡിജി ഗ്രോസി ഊന്നിപ്പറഞ്ഞു. 

ആണവ കേന്ദ്രങ്ങളുടെ സുരക്ഷയിൽ വിട്ടുവീഴ്ച ചെയ്യുന്നത് മാനവരാശിക്കും പരിസ്ഥിതിക്കും കനത്ത ആഘാതമുണ്ടാക്കുമെന്നും അദ്ദേഹം ഓർമ്മിപ്പിച്ചു. അന്താരാഷ്ട്ര സുരക്ഷാ മാനദണ്ഡങ്ങൾ പാലിച്ചുകൊണ്ട് മാത്രമേ ഇത്തരം വിനാശകരമായ അപകടങ്ങൾ ഒഴിവാക്കാൻ സാധിക്കൂ എന്നും അദ്ദേഹം കൂട്ടിച്ചേർത്തു.