മതാതീതമായ ആത്മീയത; ഹൃദയം തുറന്ന് റെമോ ഡിസൂസയും ലിസെല്ലും

 ന്യൂഡൽഹി: സെലിബ്രിറ്റികളുടെ ഓരോ വാക്കും പ്രവൃത്തിയും സൂക്ഷ്മമായി നിരീക്ഷിക്കപ്പെടുന്ന കാലഘട്ടത്തിൽ, സ്വന്തം വിശ്വാസങ്ങളെക്കുറിച്ചും ആത്മീയ യാത്രയെക്കുറിച്ചും തുറന്നു സംസാരിക്കുകയാണ് പ്രശസ്ത നൃത്തസംവിധായകനും സംവിധായകനുമായ റെമോ ഡിസൂസയും ഭാര്യ ലിസെല്ലും.

തങ്ങളുടെ വിശ്വാസങ്ങൾ ഒരു മതത്തിന്റെ മാത്രം അതിർവരമ്പുകൾക്കുള്ളിൽ ഒതുങ്ങുന്നതല്ലെന്ന് നയൻദീപ് രക്ഷിതിന് നൽകിയ അഭിമുഖത്തിൽ ഇരുവരും വെളിപ്പെടുത്തി.

വീടിനുള്ളിലെ സർവ്വമത സാഹോദര്യം

തങ്ങളുടെ വീടിനുള്ളിലെ വൈവിധ്യമാർന്ന കാഴ്ചകൾ പങ്കുവെച്ചുകൊണ്ടാണ് ഇരുവരും ആത്മീയതയെക്കുറിച്ച് സംസാരിച്ചത്. മദർ മേരിയുടെയും ബുദ്ധന്റെയും പ്രതിമകൾക്കൊപ്പം ഗണപതിക്കും ശിവനും പ്രത്യേക ക്ഷേത്രങ്ങൾ തന്നെ ഇവരുടെ വീട്ടിലുണ്ട്. ഒരു കടുത്ത കത്തോലിക്കാ വിശ്വാസിയായി വളർന്ന ലിസെൽ, ഹിന്ദുധർമ്മത്തോടുള്ള തന്റെ ആഭിമുഖ്യത്തെക്കുറിച്ച് വാചാലയായി.

"കഴിഞ്ഞ 25 വർഷമായി ഞാൻ വീട്ടിൽ ഗണപതി വിഗ്രഹം സൂക്ഷിക്കുന്നുണ്ട്. മാതാപിതാക്കളുടെ വിയോഗത്തിന് ശേഷം കഴിഞ്ഞ നാലഞ്ചു വർഷമായി ഞാൻ ഹിന്ദുമതത്തിലേക്ക് കൂടുതൽ ആകർഷിക്കപ്പെട്ടു. ഒരു കത്തോലിക്കയായി തുടരുമ്പോൾ തന്നെ എല്ലാ പൂജകളും മറ്റും ചെയ്യാൻ എനിക്കിഷ്ടമാണ്," ലിസെൽ പറഞ്ഞു.

രമേഷ് ഗോപി നായർ റെമോ ഡിസൂസയായപ്പോൾ

ഹിന്ദു കുടുംബത്തിൽ ജനിച്ച താൻ ക്രിസ്തുമതത്തിലേക്ക് മാറിയതിനെക്കുറിച്ച് റെമോ ഡിസൂസ മനസ്സ് തുറന്നു. രമേഷ് ഗോപി നായർ എന്നായിരുന്നു അദ്ദേഹത്തിന്റെ ആദ്യകാല പേര്. മതം മാറാനുള്ള തന്റെ തീരുമാനം മാതാപിതാക്കൾ ഏറെ പക്വതയോടെയാണ് സ്വീകരിച്ചതെന്ന് അദ്ദേഹം ഓർത്തെടുത്തു.

"ഞാൻ പള്ളിയിലെ പ്രവർത്തനങ്ങളിൽ സജീവമായിരുന്നു. ഒരു ദിവസം അച്ഛനോട് എനിക്ക് മതം മാറണമെന്ന് പറഞ്ഞു. 'ശരി, ചെയ്തോളൂ, പക്ഷേ എന്റെ പേര് മാറ്റരുത്' എന്നായിരുന്നു അച്ഛന്റെ മറുപടി. അങ്ങനെയാണ് ഞാൻ 'റെമോ ഗോപി ഡിസൂസ' ആയത്," റെമോ വ്യക്തമാക്കി. തന്റെ മക്കളുടെ പേരിടുന്ന കാര്യത്തിൽ മാത്രമാണ് മാതാപിതാക്കൾക്ക് നേരിയ ആശങ്കയുണ്ടായിരുന്നതെന്നും അദ്ദേഹം കൂട്ടിച്ചേർത്തു. മൂത്ത മകന് 'അഡോണിസ്' എന്ന പേരിനൊപ്പം 'ധ്രുവ്' എന്ന ഹൈന്ദവ നാമവും നൽകിയിട്ടുണ്ട്.

തീർത്ഥാടനങ്ങളും വിശ്വാസവും

2025-ൽ റെമോ ഡിസൂസ മഹാ കുംഭമേളയിൽ പങ്കെടുക്കുകയും പ്രയാഗ്‌രാജിലെ പുണ്യതീർത്ഥത്തിൽ സ്നാനം നടത്തുകയും ചെയ്തിരുന്നു. ലിസെല്ലിനൊപ്പം അദ്ദേഹം തിരുപ്പതി ക്ഷേത്ര ദർശനം നടത്തുന്നതിന്റെ വീഡിയോകളും നേരത്തെ സോഷ്യൽ മീഡിയയിൽ ശ്രദ്ധ നേടിയിരുന്നു. ആചാരങ്ങൾക്കും മതങ്ങൾക്കും അപ്പുറം ആത്മീയമായ സമാധാനമാണ് തങ്ങൾ തിരയുന്നതെന്ന് ഈ ദമ്പതികൾ അടിവരയിടുന്നു.