ഇന്ത്യക്കാർക്ക് ഇനിമുതൽ പ്രത്യേക ATV ആവശ്യമില്ല, വിദ്യാർത്ഥികൾക്ക് ഒറ്റത്തവണ വിസ : ഫ്രഞ്ച് പ്രസിഡന്റ് ഇമ്മാനുവൽ മക്രോൺ

ഫ്രഞ്ച് വിമാനത്താവളങ്ങൾ വഴി മറ്റ് രാജ്യങ്ങളിലേക്ക് പോകുന്ന ഇന്ത്യക്കാർക്ക് ഇനിമുതൽ പ്രത്യേക ‘എയർപോർട്ട് ട്രാൻസിറ്റ് വിസ’ (ATV) ആവശ്യമില്ലെന്ന് പ്രസിഡന്റ് ഇമ്മാനുവൽ മക്രോൺ പ്രഖ്യാപിച്ചു.

എന്താണ് ‘എയർപോർട്ട് ട്രാൻസിറ്റ് വിസ’ (ATV) സൗകര്യം?

നിലവിൽ ഇന്ത്യൻ പാസ്‌പോർട്ട് ഉള്ളവർ പാരിസിലെ ചാൾസ് ഡി ഗല്ലെ (Charles de Gaulle) പോലുള്ള വിമാനത്താവളങ്ങൾ വഴി ലണ്ടൻ, ന്യൂയോർക്ക് അല്ലെങ്കിൽ മറ്റ് യൂറോപ്പിന് പുറത്തുള്ള നഗരങ്ങളിലേക്ക് പോകുമ്പോൾ ‘എയർപോർട്ട് ട്രാൻസിറ്റ് വിസ’ നിർബന്ധമായിരുന്നു. വിമാനത്താവളത്തിന് പുറത്തിറങ്ങാതെ വെറും കണക്ഷൻ ഫ്ലൈറ്റ് കയറാൻ മാത്രമാണെങ്കിൽ പോലും ഈ വിസയ്ക്കായി പണവും സമയവും ചിലവഴിക്കേണ്ടി വന്നിരുന്നു.

പുതിയ പ്രഖ്യാപനത്തോടെ, ഇന്ത്യൻ യാത്രക്കാർക്ക് ഫ്രഞ്ച് വിമാനത്താവളങ്ങളുടെ അന്താരാഷ്ട്ര ട്രാൻസിറ്റ് ഏരിയയിൽ വിസയില്ലാതെ തന്നെ കാത്തിരിക്കാനും അടുത്ത വിമാനത്തിൽ യാത്ര തുടരാനും സാധിക്കും. നിലവിൽ ആറ് മാസത്തെ പരീക്ഷണാടിസ്ഥാനത്തിലാണ് (Pilot Project) ഈ സൗകര്യം ഏർപ്പെടുത്തിയിരിക്കുന്നത്. ഇത് വിജയിക്കുന്ന പക്ഷം സ്ഥിരമായ ഇളവായി മാറാനാണ് സാധ്യത. മിഡിൽ ഈസ്റ്റേൺ വിമാനത്താവളങ്ങളെ അപേക്ഷിച്ച് യൂറോപ്യൻ റൂട്ടുകളിൽ എയർ ഫ്രാൻസ് പോലുള്ള വിമാനക്കമ്പനികളെ തിരഞ്ഞെടുക്കാൻ ഇന്ത്യക്കാരെ ഈ തീരുമാനം പ്രേരിപ്പിക്കും.

കണക്ഷൻ വിമാനങ്ങൾക്കായി ഫ്രാൻസിനെ ആശ്രയിക്കുന്ന പ്രവാസികൾക്കും പഠനത്തിനായി വിദേശ രാജ്യങ്ങൾ തേടുന്ന വിദ്യാർത്ഥികൾക്കും ഒരുപോലെ ഗുണകരമാണ് പ്രസിഡന്റ് മക്രോണിന്റെ ഈ പുതിയ നീക്കങ്ങൾ.

ഇന്ത്യൻ വിദ്യാർത്ഥികൾക്കും മക്രോൺ വലിയ വാഗ്ദാനങ്ങൾ നൽകി. 2030-ഓടെ 30,000 ഇന്ത്യൻ വിദ്യാർത്ഥികളെ ഫ്രാൻസിലെത്തിക്കുക എന്നതാണ് ലക്ഷ്യം. ഇതിനായി വിസ നടപടികളിൽ താഴെ പറയുന്ന പ്രധാന മാറ്റങ്ങൾ വരുത്തി:

പഠനകാലയളവ് വരെ വിസ: 

ഇനി മുതൽ വിദ്യാർത്ഥികൾക്ക് അവരുടെ കോഴ്സ് കാലാവധി എത്രയാണോ അത്രയും കാലത്തേക്ക് ഒറ്റത്തവണ വിസ അനുവദിക്കും. ഓരോ വർഷവും വിസ പുതുക്കേണ്ടി വരുന്നത് വിദ്യാർത്ഥികൾക്കും രക്ഷിതാക്കൾക്കും വലിയ സാമ്പത്തിക-മാനസിക പ്രയാസമായിരുന്നു. പിഎച്ച്.ഡി വിദ്യാർത്ഥികൾക്ക് അവരുടെ ഗവേഷണം പൂർത്തിയാക്കാൻ ആവശ്യമായ മൂന്നോ നാലോ വർഷത്തെ വിസ ഒറ്റയടിക്ക് ലഭിക്കും.

ക്ലാസസ് ഇന്റർനാഷണൽസ്:

ഫ്രഞ്ച് ഭാഷ അറിയില്ല എന്ന കാരണത്താൽ ഫ്രാൻസിലെ പഠനം ഉപേക്ഷിക്കേണ്ടതില്ല. ഇന്ത്യൻ വിദ്യാർത്ഥികൾക്കായി ‘ക്ലാസസ് ഇന്റർനാഷണൽസ്’ (Classes Internationales) എന്ന പദ്ധതി ആരംഭിക്കും. ഒരു വർഷം ഫ്രഞ്ച് ഭാഷാ പഠനത്തിനായി ചിലവഴിച്ച ശേഷം വിദ്യാർത്ഥികൾക്ക് ഇഷ്ടപ്പെട്ട കോഴ്സുകളിലേക്ക് പ്രവേശിക്കാം.

5 വർഷത്തെ അലുംനി വിസ

ഫ്രാൻസിൽ നിന്ന് മാസ്റ്റേഴ്സ് ബിരുദം നേടുന്ന ഇന്ത്യക്കാർക്ക് അഞ്ച് വർഷത്തെ ദീർഘകാല ഷോർട്ട് സ്റ്റേ വിസ (5 വർഷത്തെ അലുംനി വിസ) ലഭിക്കും. ഇത് അവർക്ക് യൂറോപ്പിലെ ബിസിനസ് ആവശ്യങ്ങൾക്കും തൊഴിൽ അന്വേഷണങ്ങൾക്കും വലിയ സഹായമാകും. 

ഡൽഹി എയിംസിൽ നടന്ന ചടങ്ങിൽ സംസാരിക്കവെ, വിസ നടപടികൾ കൂടുതൽ സുതാര്യമാക്കുമെന്നും പേപ്പർവർക്കുകൾ കുറയ്ക്കുമെന്നും മക്രോൺ ഉറപ്പ് നൽകി. 

“ഇന്ത്യൻ യുവാക്കൾക്ക് ഫ്രാൻസ് ഒരു രണ്ടാം വീടായി മാറണം. അറിവും സംസ്കാരവും കൈമാറുന്നതിൽ വിസകൾ ഒരു തടസ്സമാകരുത്,” അദ്ദേഹം പറഞ്ഞു. ഇതുകൂടാതെ യുപിഐ (UPI) ഇടപാടുകൾ ഫ്രാൻസിൽ വ്യാപകമാക്കുന്നത് ഇന്ത്യൻ വിദ്യാർത്ഥികൾക്ക് പണം ചിലവാക്കുന്നത് എളുപ്പമാക്കും. ഗവൺമെന്റ് നൽകുന്ന താമസ സബ്‌സിഡികൾ (CAF) ഇന്ത്യൻ വിദ്യാർത്ഥികൾക്കും പ്രയോജനപ്പെടുത്താം.

ഫ്രാൻസിലെ വിദ്യാഭ്യാസ മേഖലയിൽ വൻ കുതിച്ചുചാട്ടം ലക്ഷ്യമിട്ടുള്ള വിദ്യാർത്ഥി വിസ ഇളവുകൾക്കൊപ്പം യാത്രക്കാർക്കായി പ്രഖ്യാപിച്ച ഈ ഇളവ് അന്താരാഷ്ട്ര യാത്രാരംഗത്ത് വലിയ മാറ്റങ്ങൾക്കും കുറഞ്ഞ യാത്രാചിലവിനും വഴിയൊരുക്കും. യൂറോപ്പിലേക്കും അമേരിക്കയിലേക്കും യാത്ര ചെയ്യുന്ന ലക്ഷക്കണക്കിന് ഇന്ത്യൻ യാത്രക്കാർക്ക് ആശ്വാസമായി ഫ്രഞ്ച് സർക്കാരിന്റെ നിർണ്ണായക പ്രഖ്യാപനം.