ആഗോള സംഘർഷങ്ങൾ മൂന്നാം ലോകമഹായുദ്ധത്തിലേക്ക്? ചൈനയുടെ 'കിഴക്കൻ കാറ്റിൽ' വിറങ്ങലിച്ച് ലോകശക്തികൾ

 അന്തർദേശീയം : ലോകം ഒരു മൂന്നാം ലോകമഹായുദ്ധത്തിന്റെ വക്കിലാണെന്ന മുന്നറിയിപ്പുമായി പ്രമുഖ പ്രതിരോധ നിരീക്ഷകനും മാധ്യമപ്രവർത്തകനുമായ പീറ്റര്‍ ആപ്സ് രംഗത്തെത്തിയിരിക്കുകയാണ്.

വൻശക്തികൾ തമ്മിലുള്ള നേരിട്ടുള്ള ഏറ്റുമുട്ടലിലേക്ക് കാര്യങ്ങൾ നീങ്ങുന്നുവെന്ന ആശങ്ക പീറ്ററിന്റെ പ്രവചനങ്ങളിൽ നിഴലിക്കുന്നു. റഷ്യ-ഉക്രൈൻ യുദ്ധം അവസാനമില്ലാതെ തുടരുന്നതും, പശ്ചിമേഷ്യയിലും ലാറ്റിനമേരിക്കയിലും അമേരിക്കൻ സഖ്യശക്തികൾ നടത്തുന്ന ഇടപെടലുകളും ഈ ഭീതിക്ക് ആക്കം കൂട്ടുന്നു

തന്ത്രപരമായ നീക്കങ്ങളും പ്രതിരോധ നിരയും

സിറിയ, ഗാസ, ലെബനോൻ, വെനസ്വേല, ഇറാൻ തുടങ്ങിയ മേഖലകളിൽ റഷ്യയുടെയും ചൈനയുടെയും സഖ്യകക്ഷികളെ ലക്ഷ്യം വെച്ചുകൊണ്ടുള്ള യുഎസ്-യൂറോപ്യൻ നീക്കങ്ങൾ കൃത്യമായ ഗൂഢലക്ഷ്യത്തോടെയാണെന്ന് പുടിനും ഷീ ജിൻപിങ്ങും തിരിച്ചറിഞ്ഞുകഴിഞ്ഞു. ഈ രാജ്യങ്ങളെ ഓരോന്നായി ദുർബലപ്പെടുത്തിയ ശേഷം തങ്ങൾക്കെതിരെ നീങ്ങാനാണ് പാശ്ചാത്യ ശക്തികളുടെ പദ്ധതിയെന്ന തിരിച്ചറിവ് റഷ്യയെയും ചൈനയെയും പ്രതിരോധ തന്ത്രങ്ങൾ മാറ്റാൻ പ്രേരിപ്പിക്കുന്നു.

ചൈനയുടെ ആണവായുധ കരുത്ത്: ഡോങ്ഫെങ് മിസൈലുകൾ

യുദ്ധഭീതി നിലനിൽക്കുന്ന പശ്ചാത്തലത്തിൽ ചൈന തങ്ങളുടെ ആയുധ പരീക്ഷണങ്ങൾ ദ്രുതഗതിയിലാക്കിയിരിക്കുകയാണ്. 'കിഴക്കൻ കാറ്റ്' എന്നർത്ഥം വരുന്ന ഡോങ്ഫെങ് (Dongfeng) മിസൈലുകൾ ലോകത്തിന് മുന്നിൽ ചൈന പ്രദർശിപ്പിച്ച ഏറ്റവും മാരകമായ ആയുധങ്ങളാണ്.

ഡിഎഫ്-5ബി (DF-5B): പീപ്പിൾസ് ലിബറേഷൻ ആർമിയുടെ റോക്കറ്റ് ഫോഴ്സിന്റെ പക്കലുള്ള അതിമാരകമായ ഭൂഖണ്ഡാന്തര ബാലിസ്റ്റിക് മിസൈലാണിത്. ശബ്ദത്തേക്കാൾ എട്ട് മടങ്ങ് വേഗതയിൽ (Mach 8) സഞ്ചരിക്കാൻ ശേഷിയുള്ള ഇതിന് 12,000 കിലോമീറ്റർ പരിധിയിലുള്ള ലക്ഷ്യങ്ങൾ തകർക്കാൻ സാധിക്കും. പണ്ട് ഹിരോഷിമയിൽ പ്രയോഗിച്ച ആറ്റംബോംബിനേക്കാൾ 200 മടങ്ങ് പ്രഹരശേഷിയുള്ള ഇതിന് ന്യൂയോർക്ക് നഗരത്തിലെത്താൻ വെറും ഒരു മണിക്കൂർ മതി.

ഡിഎഫ്-5സി (DF-5C): 5ബി യേക്കാൾ കരുത്തും വേഗതയും ഏറിയതാണ് ഇതിന്റെ പരിഷ്കരിച്ച രൂപമായ 5സി. ശബ്ദത്തേക്കാൾ 22 മടങ്ങ് വേഗതയിൽ സഞ്ചരിക്കാൻ ശേഷിയുള്ള ഈ മിസൈൽ ന്യൂയോർക്കിലെത്താൻ വെറും 25 മിനിറ്റ് മതിയാകും.

ആഗോള സുരക്ഷ നേരിടുന്ന വെല്ലുവിളി

പല രാജ്യങ്ങളിലും പരീക്ഷണാടിസ്ഥാനത്തിൽ വിന്യസിച്ചിരിക്കുന്ന ഈ മിസൈലുകൾ ആഗോള സുരക്ഷയ്ക്ക് വലിയ ഭീഷണിയാണ് ഉയർത്തുന്നത്. വൻശക്തികൾ തമ്മിലുള്ള ബലപരീക്ഷണം സായുധ പോരാട്ടത്തിലേക്ക് നീങ്ങിയാൽ അത് മനുഷ്യരാശിയുടെ നിലനിൽപ്പിനെത്തന്നെ ബാധിച്ചേക്കാവുന്ന വൻ ദുരന്തമായിരിക്കുമെന്നാണ് പ്രതിരോധ വിദഗ്ധർ വിലയിരുത്തുന്നത്.