പേരാമ്പ്രയിൽ വീട്ടമ്മയ്ക്കും കുഞ്ഞിനും നേരെ മുളകുപൊടി എറിഞ്ഞ് കവർച്ചാ ശ്രമം; പ്രതിക്കായി തിരച്ചിൽ തുടരുന്നു

 കോഴിക്കോട്: പേരാമ്പ്രയിൽ വീട്ടമ്മയുടെയും രണ്ടു വയസ്സുകാരിയായ മകളുടെയും മുഖത്ത് മുളകുപൊടി എറിഞ്ഞ് സ്വർണാഭരണങ്ങൾ കവർച്ച ചെയ്യാൻ ശ്രമം.

പേരാമ്പ്ര സ്വദേശിനിയായ റമീസയ്ക്കും മകൾക്കുമാണ് അജ്ഞാതന്റെ ആക്രമണത്തിൽ പരിക്കേറ്റത്. കഴിഞ്ഞ ദിവസം വൈകുന്നേരം റമീസ വീടിന്റെ അടുക്കളയിൽ പാത്രം കഴുകിക്കൊണ്ടിരിക്കെയായിരുന്നു അപ്രതീക്ഷിതമായി ആക്രമണം ഉണ്ടായത്.

അടുക്കളവാതിലിലൂടെ എത്തിയ ആക്രമി റമീസയുടെയും അരികിലുണ്ടായിരുന്ന കുഞ്ഞിന്റെയും മുഖത്തേക്ക് മുളകുപൊടി എറിയുകയായിരുന്നു. പെട്ടെന്നുണ്ടായ ആക്രമണത്തിൽ പതറാതെ ഇരുവരും ഉച്ചത്തിൽ ബഹളം വെച്ചതോടെ പിടിയിലാകുമെന്ന് ഭയന്ന പ്രതി ഉടൻ തന്നെ സംഭവസ്ഥലത്തുനിന്ന് ഓടി രക്ഷപ്പെട്ടു. റമീസയും മകളും സ്വർണാഭരണങ്ങൾ ധരിച്ചിരുന്നത് ശ്രദ്ധയിൽപ്പെട്ട കവർച്ചക്കാരൻ ഇത് ലക്ഷ്യമിട്ടാണ് എത്തിയതെന്നാണ് പ്രാഥമിക നിഗമനം.

സംഭവത്തെത്തുടർന്ന് വീട്ടുകാർ പേരാമ്പ്ര പോലീസിൽ പരാതി നൽകി. പോലീസ് സ്ഥലത്തെത്തി വിശദമായ പരിശോധനകൾ നടത്തുകയും മൊഴി രേഖപ്പെടുത്തുകയും ചെയ്തിട്ടുണ്ട്. പ്രദേശത്തെ സിസിടിവി ദൃശ്യങ്ങൾ കേന്ദ്രീകരിച്ച് പ്രതിയെ കണ്ടെത്താനുള്ള ഊർജിതമായ അന്വേഷണം പോലീസ് ആരംഭിച്ചു. ജനവാസ മേഖലയിൽ നടന്ന ഈ ആക്രമണം പ്രദേശവാസികൾക്കിടയിൽ വലിയ ആശങ്കയുണ്ടാക്കിയിട്ടുണ്ട്.