കേരളം വികസന വിരോധികൾ ഭരിക്കുന്നു; നിക്ഷേപകർ സംസ്ഥാനം വിടുന്നു: ലോക്സഭയിൽ രൂക്ഷവിമർശനവുമായി നിർമല സീതാരാമൻ

 ന്യൂഡൽഹി: കേരളത്തിലെ ഇടതുമുന്നണി സർക്കാരിനെതിരെ കടുത്ത രാഷ്ട്രീയ-സാമ്പത്തിക ആരോപണങ്ങളുമായി കേന്ദ്ര ധനമന്ത്രി നിർമല സീതാരാമൻ.

കമ്മ്യൂണിസ്റ്റുകൾ അധികാരത്തിലിരുന്നിടത്തെല്ലാം സാമ്പത്തിക അടിത്തറ തകർന്ന ചരിത്രമാണുള്ളതെന്ന് ബജറ്റ് ചർച്ചയ്ക്കുള്ള മറുപടി പ്രസംഗത്തിൽ മന്ത്രി പറഞ്ഞു. വ്യവസായ സൗഹൃദ അന്തരീക്ഷമില്ലാത്തതിനാൽ നിക്ഷേപകർ കേരളം വിടുകയാണെന്നും അവർ ചൂണ്ടിക്കാട്ടി.

വ്യവസായ പലായനവും സാമ്പത്തിക പ്രതിസന്ധിയും

കേരളത്തിലെ നിക്ഷേപ സാഹചര്യങ്ങളെക്കുറിച്ച് മന്ത്രി പറഞ്ഞ പ്രധാന കാര്യങ്ങൾ:

 3,500 കോടി രൂപയുടെ നിക്ഷേപവുമായി ഒരു പ്രമുഖ വ്യവസായി കേരളം വിട്ടുവെന്ന് കിറ്റക്സ് ഗ്രൂപ്പിന്റെ പേര് പരാമർശിക്കാതെ മന്ത്രി പറഞ്ഞു. കേരളത്തിലെ ശ്വാസംമുട്ടിക്കുന്ന സാഹചര്യമാണ് നിക്ഷേപം തെലങ്കാനയിലേക്ക് മാറ്റാൻ പ്രേരിപ്പിച്ചത്. സാമ്പത്തിക പ്രതിസന്ധിയെത്തുടർന്ന് കേരളത്തിൽ 399 സഹകരണ സ്ഥാപനങ്ങൾ അടച്ചുപൂട്ടിയതായി മന്ത്രി സഭയെ അറിയിച്ചു.

രാഷ്ട്രീയ കൊലപാതകങ്ങളും ക്രമസമാധാനവും

സംസ്ഥാനത്തെ ക്രമസമാധാന നില തകരാറിലാണെന്ന് ആരോപിച്ച ധനമന്ത്രി, മുഖ്യമന്ത്രി പിണറായി വിജയനെ നേരിട്ട് ലക്ഷ്യമിട്ടാണ് സംസാരിച്ചത്.

 കേരളത്തിൽ ഇതുവരെ 125 രാഷ്ട്രീയ കൊലപാതകങ്ങൾ നടന്നുവെന്നും അതിൽ 30 എണ്ണം നിലവിലെ മുഖ്യമന്ത്രിയുടെ ഭരണകാലത്താണെന്നും നിർമല സീതാരാമൻ ആരോപിച്ചു. ദേശീയ ക്രൈം റെക്കോർഡ്സ് ബ്യൂറോയുടെ (NCRB) കണക്കുകൾ ഉദ്ധരിച്ച് കേരളത്തിൽ ദളിത്-ആദിവാസി വിഭാഗങ്ങൾക്കെതിരായ അതിക്രമങ്ങൾ വർധിക്കുന്നതായും മന്ത്രി ചൂണ്ടിക്കാട്ടി. പട്ടികവർഗ വിഭാഗങ്ങൾക്കെതിരായ അതിക്രമങ്ങളിൽ 6 ശതമാനവും പട്ടികജാതി വിഭാഗങ്ങൾക്കെതിരെ 1.2 ശതമാനവും വർധനയുണ്ടായി.

വികസന പദ്ധതികളും രാഷ്ട്രീയ വിയോജിപ്പും

ബംഗാളിലെ തൃണമൂൽ സർക്കാരിനെതിരെ നടത്തിയ വിമർശനങ്ങൾക്ക് പിന്നാലെയാണ് ധനമന്ത്രി കേരളത്തിന് നേരെ തിരിഞ്ഞത്. കേന്ദ്ര ബജറ്റിൽ പ്രഖ്യാപിച്ച നാളികേര-കശുവണ്ടി വികസന പദ്ധതികൾ കേരളത്തിന് ഏറെ ഗുണകരമാകുമെന്ന് വ്യക്തമാക്കിയ മന്ത്രി, സംസ്ഥാന സർക്കാരിന്റെ വികസന വിരുദ്ധ നയം ഇത്തരം പദ്ധതികളുടെ ഗുണം ജനങ്ങളിലെത്തുന്നതിന് തടസ്സമാണെന്നും പരോക്ഷമായി സൂചിപ്പിച്ചു.