എഐ ഇംപാക്ട് സമ്മിറ്റിൽ പ്രതിഷേധം; നാല് യൂത്ത് കോൺഗ്രസ് പ്രവർത്തകർ അറസ്റ്റിൽ

ന്യൂഡൽഹി: എഐ ഇംപാക്ട് സമ്മിറ്റിൽ കേന്ദ്ര സർക്കാരിനും ഇന്ത്യ-യുഎസ് വ്യാപാര കരാറിനുമെതിരെ യൂത്ത് കോൺഗ്രസ് പ്രവർത്തകരുടെ പ്രതിഷേധം നേപ്പാളിലെ ജെൻസി പ്രക്ഷോഭത്തിന് സമാനമാണെന്ന് പോലീസ് കോടതിയിൽ. നാല് യൂത്ത് കോൺഗ്രസ് പ്രവർത്തകരെയാണ് പ്രതിഷേധവുമായി ബന്ധപ്പെട്ട് ഡൽഹി പോലീസ് അറസ്റ്റ് ചെയ്തത്.പ്രദർശന ഹാളിൽ സർക്കാരിനെതിരായ മുദ്രാവാക്യങ്ങൾ എഴുതിയ ടി-ഷർട്ടുകൾ ഉയർത്തിപ്പിടിച്ചും മുദ്രാവാക്യങ്ങൾ വിളിച്ചും പ്രതിഷേധിച്ച ഇവരെ സുരക്ഷാ ഉദ്യോഗസ്ഥർ ഉടൻ തന്നെ നീക്കം ചെയ്യുകയായിരുന്നു. പിടിയിലായവരെ അഞ്ച് ദിവസത്തെ കസ്റ്റഡിയിൽ ആവശ്യപ്പെട്ട് പട്യാല ഹൗസ് കോടതിയിൽ ഹാജരാക്കിയ ഡൽഹി പോലീസ്, ഇത് രാജ്യത്തെ അന്താരാഷ്ട്ര തലത്തിൽ അപകീർത്തിപ്പെടുത്താനുള്ള വലിയ ഗൂഢാലോചനയാണെന്ന് ആരോപിച്ചു.

നേപ്പാളിൽ നടന്ന പ്രതിഷേധങ്ങൾക്ക് സമാനമാണ് ഇതെന്നും പോലീസ് കോടതിയെ അറിയിച്ചു. ലോകനേതാക്കളുടെയും പ്രമുഖ വ്യക്തികളുടെയും സാന്നിധ്യത്തിൽ ഇവർ രാജ്യവിരുദ്ധ മുദ്രാവാക്യങ്ങൾ വിളിച്ചതായും പബ്ലിക് പ്രോസിക്യൂട്ടർ കോടതിയിൽ വാദിച്ചു. സംഭവസ്ഥലത്തുനിന്ന് രക്ഷപ്പെട്ട മറ്റ് പ്രതികളെ കണ്ടെത്താനും ഈ പ്രതിഷേധത്തിന് പിന്നിൽ ഫണ്ടിംഗ് നടന്നിട്ടുണ്ടോ എന്ന് പരിശോധിക്കാനും പ്രതികളുടെ കസ്റ്റഡി അത്യാവശ്യമാണെന്ന് അന്വേഷണ ഉദ്യോഗസ്ഥർ പറഞ്ഞു.

പ്രതിഷേധക്കാരുടെ മൊബൈൽ ഫോണുകൾ വീണ്ടെടുക്കേണ്ടതുണ്ടെന്നും, പ്രതിഷേധത്തിനിടെ മൂന്ന് പോലീസ് ഉദ്യോഗസ്ഥർക്ക് പരിക്കേറ്റതായും പോലീസ് വ്യക്തമാക്കി. നാല് വ്യത്യസ്ത സ്ഥലങ്ങളിൽ നിന്നുള്ളവർ ഒത്തുചേർന്ന് ഒരേ രീതിയിലുള്ള ടി-ഷർട്ടുകൾ പ്രിന്റ് ചെയ്തത് ആഴത്തിലുള്ള ഗൂഢാലോചനയുടെ ഭാഗമാണെന്നും പോലീസ് പറയുന്നു. എന്നാൽ ഈ ആരോപണങ്ങളെ പ്രതിഭാഗം വക്കീൽ ശക്തമായി എതിർത്തു. പ്രതിഷേധം തികച്ചും സമാധാനപരമായിരുന്നുവെന്നും യാതൊരുവിധ അക്രമങ്ങളും ഉണ്ടായിട്ടില്ലെന്നും അദ്ദേഹം വാദിച്ചു. ഒരു രാഷ്ട്രീയ പാർട്ടിയിൽപ്പെട്ട ആളുകൾ എന്ന നിലയിൽ പ്രതിഷേധിക്കാനുള്ള അവകാശം വിനിയോഗിക്കുക മാത്രമാണ് അവർ ചെയ്തതെന്നും, പ്രതികൾ ഉയർന്ന വിദ്യാഭ്യാസമുള്ളവരാണെന്നും അദ്ദേഹം ചൂണ്ടിക്കാട്ടി. അവർക്കെതിരെയുള്ള എഫ്ഐആർ വെറും രാഷ്ട്രീയ പ്രേരിതമായ നീക്കം മാത്രമാണെന്നും അദ്ദേഹം കൂട്ടിച്ചേർത്തു.

പ്രതിപക്ഷ പാർട്ടിയിൽപ്പെട്ടവരായതിനാലാണ് പോലീസ് ഇവരെ ലക്ഷ്യം വെക്കുന്നതെന്നും, കസ്റ്റഡിയിൽ വെച്ച് ഇവർക്ക് ക്രൂരമായ മർദ്ദനമേറ്റതായും പ്രതിഭാഗം അഭിഭാഷകൻ ജാമ്യാപേക്ഷയിൽ ആരോപിച്ചു. യുവാക്കളുടെ കരിയർ നശിപ്പിക്കുന്ന രീതിയിൽ രാഷ്ട്രീയ വിയോജിപ്പുകളെ അടിച്ചമർത്തരുതെന്നും അദ്ദേഹം പറഞ്ഞു. രാഷ്ട്രീയമായ പ്രതിഷേധങ്ങളെ ക്രിമിനൽ കുറ്റമായി കാണരുതെന്നും പ്രതിഭാഗം വാദിച്ചു.